Read Iban Sabak Kenang 3 Bible Online

Sabak Kenang 3 - Iban bible

Sabak Kenang 3

¹Aku tu orang ke udah ngasaika ukum Allah Taala.

²Iya muru aku jauh-sejauh ke dalam pemetang;

³lalu enda ngetu-ngetu malu aku.

⁴Iya udah ngemakalka aku, lalu matahka tulang aku.

⁵Iya udah nutup aku dalam rumah jil, lalu merinsa sereta ngenusah.

⁶Iya udah mejalka aku diau dalam pemetang baka orang ke udah mati dulu kelia.

⁷Iya udah nanchang aku ngena rantai. Aku tu orang tutup ti enda ulih ngerarika diri.

⁸Aku nyabak rauh-rauh minta tulung, tang Allah Taala enggai mending.

⁹Iya udah mempang jalai aku ngena lampang batu ti udah dipansap, Iya udah ngaga jalai aku bingkuk.

¹⁰Iya ngipa aku baka beruang, baka singa ti deka nerekam aku.

¹¹Iya muru aku ari jalai raya, nyarikka tubuh aku, lalu ninggalka aku.

¹²Iya ngambi panah, lalu nyelintingka laja Iya ngagai aku.

¹³Iya nimbakka laja Iya dalam bendar masuk ngagai tubuh aku.

¹⁴Orang ketawaka aku sepemanjai hari. Aku tu orang ke dikeleseka semua sida.

¹⁵Iya udah balat merinsaka aku, baka orang ke dipejalka ngirup ai ti pemadu pait.

¹⁶Iya nginsarka mua aku ngagai batu, lalu matahka ngeli aku.

¹⁷Aku nyau nadai pengelantang agi; aku nyau enda ingatka utai ti dikumbai pemaik.

¹⁸Aku enda lama agi idup, lalu aku nadai agi utai diadang ari TUHAN.

¹⁹Lebuh aku berundingka pemerinsa diri, enggau pasal aku ti nadai rumah alai diau, utai nya pait baka rachun.

²⁰Aku seruran berundingka utai nya, lalu ati aku tusah.

²¹Tang taja pia, pengadang datai baru lebuh aku ngingatka utai siti tu:

²²Pengerindu enggau pengasih TUHAN enda nemu abis,

²³nyadi baru belama tiap pagi, naka meh penetap ati Nuan.

²⁴Semina TUHAN aja ke dikemisi aku, nya alai aku manggaika pengadang aku ba Iya.

²⁵TUHAN endang manah enggau orang ke arapka Iya, enggau orang ke ngiga Iya.

²⁶Nya alai manah kitai nganti Iya enggau ati ti liat, nganti Iya ngidupka kitai.

²⁷Manah kitai belajar liat ati lebuh kitai agi biak.

²⁸Lebuh TUHAN ninggang kitai enggau pemerinsa, kitai patut duduk kediri enda bemunyi sereta liat ati.

²⁹Kitai patut meremika pala nunduk ngagai Iya, nyangka kitai agi bisi pengadang.

³⁰Taja pen kitai ditampar sereta dikeleseka orang, kitai patut nerima semua utai nya.

³¹TUHAN endang kasihka kitai, lalu Iya enggai nulak kitai belama iya.

³²Iya nyangka ngasuh ati kitai tusah, tang pengerindu Iya ke kitai endang meruan sereta kering;

³³laban Iya ukai deka ngemerinsa tauka ngenusahka kitai.

³⁴TUHAN nemu lebuh kitai dalam rumah jil, ati kitai tusah.

³⁵Iya nemu lebuh orang ngerampas hak ti udah diberi Iya ngagai kitai.

³⁶Iya nemu lebuh orang meri atur ti enda lurus dalam kot.

³⁷Peneka TUHAN aja ti seruran dipejalaika.[6]

³⁸Utai ti manah enggau utai ti jai dikereja nitihka jaku Iya.

³⁹Nama kebuah kitai mutap lebuh kitai diukum ketegal dosa kitai empu?[7]

⁴⁰Aram kita meresa ulah diri, lalu pulai baru ngagai TUHAN.

⁴¹Aram kitai muka ati kitai ngagai Allah Taala ti di serega, lalu besampi,

⁴²“Kami udah bedosa lalu udah angkat ngelaban Nuan, TUHAN, lalu Nuan apin ngampun kami.

⁴³“Nuan udah begagaika kami lalu munuh kami. Pengasih Nuan dilamun Nuan ngena pengeringat.

⁴⁴Ati Nuan dilamun Nuan ngena ransi, baka mua hari ti tebal, datai ke sampi kami enda ulih datai ba Nuan.

⁴⁵Nuan udah ngaga kami nyadi baka tugung uras, di mua semua orang.

⁴⁶“Kami dipechat sereta diketawaka semua munsuh kami.

⁴⁷Kami udah ditinggang pemedis enggau pemerinsa; kami diau tusah sereta takut.

⁴⁸Mata aku semampai basah laban ai mata, laban bansa aku dirusak.

⁴⁹“Ai mata aku deka lilih enda ngetu-ngetu,

⁵⁰datai ke TUHAN nilik ke baruh ari serega, lalu meda kami.

⁵¹Ati aku balat tusah meda utai ti nyadi ba orang ke diau di nengeri nya.

⁵²“Aku tu baka burung, dipanjuk bala munsuh ke begedika aku enggau nadai kebuah.

⁵³Sida nikauka aku idup-idup ngagai lubang kebung, lalu nutup mua lubang kebung nya ngena batu.

⁵⁴Ai lalu belabuh ngampuhka aku, lalu aku ngumbai diri nyau deka mati.

⁵⁵“Ari buntut lubang kebung, aku nyabak ngangauka Nuan, O TUHAN!

⁵⁶Lalu lebuh aku minta Nuan mendingka sabak aku, Nuan ningaka aku.

⁵⁷Nuan nyaut aku, lalu Nuan enda ngasuh aku takut.

⁵⁸“Nuan datai lalu ngelepaska aku, TUHAN, lalu nebus aku.

⁵⁹Beri atur ti lurus lebuh Nuan ngakim aku. Nuan nemu utai ti salah ti udah dikereja orang ngagai aku.

⁶⁰Nuan nemu pemalat bala munsuh aku begedika aku, enggau jalai sida bepekat ngelaban aku.

⁶¹“Nuan udah ninga sida mechat aku, O TUHAN. Nuan nemu semua akal sida.

⁶²Sida bejaku jai pasal aku sepemanjai hari, lalu bepekat.

⁶³Kenyau ari pagi nyentuk ngagai malam, sida beduan aku.

⁶⁴“O TUHAN, ukum sida ketegal utai ti udah dikereja sida.

⁶⁵Sumpah sida, lalu asuh sida tusah ati!

⁶⁶Buru sida, lalu rusak sida abis lengis ari dunya tu!”