Read Iban Sabak Kenang 4 Bible Online

Sabak Kenang 4 - Iban bible

Sabak Kenang 4

¹Emas ti beperenching nyau enda beperenching agi. Batu ti udah dikena ngaga Rumah Sembiang nyau ngachir ba sebelah jalai raya.

²Orang ke biak di Sion endang dikesayauka kami baka emas, tang diatu sida nyau digaga nyadi baka periuk tanah.

³Indah indu ukui kampung deh nemu nusuka anak, tang bala nembiak aku baka burung unta, jai enggau anak diri.

⁴Sida nejuka anak sida mati laban lapar enggau aus. Bala anak mit minta pemakai, tang nadai orang deka meri sida pemakai.

⁵Orang ke udah teleba makai pemakai ti pemadu nyamai, diatu mati lapar ba sebelah jalai raya. Sida ke udah nyamai diau, diatu ngair ba tugung uras ngiga pemakai.

⁶ Bala nembiak aku udah balat agi diukum ari orang ke diau di Sodom, ke ngenyit dialahka Allah Taala.

⁷Bala anak raja[8] kami enda kamah, tang tuchi baka seleju, regas, kering, sereta bepengerai.

⁸Diatu sida nyau betegaring ba sebelah jalai raya enda dikelala orang. Mua sida chelum agi ari aruk. Kulit sida rangkai baka kayu, ngeriut malut tulang sida.

⁹Lantang agi orang ke mati beperang ari orang ke mati udah lepas nya, ke mati keberuran, laban sida nadai pemakai kena idup.

¹⁰ Penusah ti ninggang bala aku amat ngasuh geli. Sida ke indai manduk anak ke dikesayauka sida nyadika pemakai.

¹¹TUHAN mubuhka pengeringat Iya. Iya nunu Sion, lalu ngeretungka nengeri nya nyentuk ke tanah.

¹²Nadai siku orang di semua endur, nyengkaum bala raja menua bukai, arapka orang ke nyerang ulih tama mua pintu nengeri Jerusalem.

¹³Tang utai nya udah nyadi, laban bala nabi nengeri Jerusalem udah bedosa, lalu bala imam udah salah bebunuhka orang ke nadai penyalah.

¹⁴Bala tuai nengeri nya bejalai segau-segau ba sebelah jalai raya baka ke buta, abis dibalut darah datai ke orang nyau enggai negu sida.

¹⁵“Rari kita ari tu,” ku orang merak sida. “Kita tu kamah! Anang negu aku!” Nya alai sida segau-segau bejalai ari menua siti ngagai menua siti, enda diterima orang.

¹⁶TUHAN enggai agi ibuhka sida. TUHAN Empu ke ngachirka sida. Iya enggai agi bebasaka bala imam enggau tuai kitai.

¹⁷Kami gining-gining ngiga orang nyaup, tang nadai ga orang datai. Kami majak nganti tulung ari siti bansa, tang iya nadai ulih nulung kami.

¹⁸Munsuh nengkilaka kami, datai ke kami nyau enda berani bejalai nengah jalai raya. Kami nyau deka mati. Seput kami nyau abis.

¹⁹Bala munsuh begagaika kami laju agi ari menaul ti nyambar ari langit. Sida nyidi kami ba sebelah bukit. Sida negah kami di menua puang.

²⁰Sida ngalahka pun pengidup kami, raja ti udah dipilih TUHAN, ke dikarapka kami nyaga kami ari semua orang ke nyerang.

²¹Ketawa meh kita, orang Edom enggau orang Us. Gaga ati meh kita kala lebuh kita agi ulih. Penusah ti besai deka mega ninggang kita. Kita deka mega bejalai guir-guir telanjai sereta malu.

²²Sion udah diukum ketegal dosa iya. TUHAN enggai agi nejuka kami diau di menua bukai. Tang nuan Edom, TUHAN deka ngukum nuan. Iya deka mandangka penyalah ti udah dikereja nuan.