Read Iban Surat Jeremiah 1 Bible Online

Surat Jeremiah 1 - Iban bible

Surat Jeremiah 1

¹Tu salin surat kirum ari Jeremiah nuju orang Jerusalem, sebedau sida dialahka raja menua Babilon, lalu dibai ngagai menua nya. Surat tu ngundan pesan Allah Taala ngagai Jeremiah ti diasuh Iya tusi ngagai sida.

²Kita udah bepenyalah ngelaban Allah Taala. Nya kebuah kita enda lama da deka dibai baka orang jil ngagai menua Babilon ulih Raja Nebukadnesar.

³Kita diau di menua orang betaun-taun, sampaika tujuh serak; udah nya baru Allah Taala nguluka kita pulai baru ari Babilon enggau lantang.

⁴Di Babilon kita deka meda engkeramba digaga ari kayu, pirak enggau mas - engkeramba ti disan orang ngasuh orang kapir takut amat.

⁵Kita anang enda bejimat enggai ke kita nunda orang kapir. Anang ngasuh engkeramba sida ngenakutka kita lebuh engkeramba nya disembah sida maya iya dibai orang bejalai bebala mayuh.

⁶Ke bendar, kita patut bejaku dalam ati, “Semina Nuan siku aja, Tuhan, ke enda tau enda disembah kami.”

⁷Melikat Allah Taala deka enggau kita lalu nyaga kita.

⁸Engkeramba sida nya disepuh ngena pirak enggau mas, lalu dilah sida digaga ulih tukang kayu. Tang sida ukai petara. Sida enda tau bejaku.

⁹Orang ngaga mahkota mas lalu dengkah atas pala engkeramba sida. Engkeramba nya digaga sida baka orang indu ke rinduka barang mas.

¹⁰Kadang-kadang bala imam sida ngenchuri pirak enggau mas ari engkeramba sida lalu rega nya dikena sida empu;

¹¹Sida mega bisi meri sekeda duit nya ngagai bala indu sundal ba rumah sembiang sida. Orang ngambi engkeramba nya ti digaga ari kayu, pirak enggau mas lalu ngari sida baka mensia.

¹²Tang taja engkeramba nya ngena baju panjai mirah redam baka raja, sida enda ulih nyaga diri ari betegar tauka dempa sampuk.

¹³Lebuh debu dalam rumah sembiang nya malut mua bala engkeramba, orang mesti ngendas debu ari mua sida.

¹⁴Baka mensia ke nyadi akim, jari sida mega bisi megai tungkat kuasa, tang sida nadai kuasa ngukum orang ke bepenyalah ngelaban sida.

¹⁵Kadang-kadang sida bisi megai kris enggau kapak, tang sida enda ulih nyaga diri ari kena rusak orang maya beperang. Sida mega enda ulih nyaga diri ari ditabanka penchuri.

¹⁶Semua utai tu nunjukka sida nya ukai petara, anang nyembah sida.

¹⁷Engkeramba ti duduk dalam rumah sembiang nya nadai guna sekali, baka mangkuk pechah. Mata sida kerabur laban debu ti tekesai laban kaki orang ke tama kia.

¹⁸Bala imam nguta rumah sembiang nya ngena pintu ti disengkal ngambi penchuri enda ulih tama ke dalam. Engkeramba dikunchi baka orang jil ke deka diukum bunuh ketegal salah ngelaban raja.

¹⁹Sida imam nungkun mayuh agi lampu ke engkeramba ari ti dikena sida empu, tang nadai siti lampu nya ulih dipeda engkeramba.

²⁰Dalam nyin udah dempa sampuk, sebaka enggau kayu alang rumah sembiang nya, lalu baju sida nyau charik, tang sida empu enda nemu nya.

²¹Mua sida nyau chelum laban asap dalam rumah sembiang nya.

²²Kesindap, burung lelayang enggau burung bukai inggap atas pala sida, nyentukka mayau duduk atas sida.

²³Semua utai tu nunjukka sida nya ukai petara, anang nyembah sida.

²⁴Engkeramba tu udah disepuh ngena mas ngambi sida manah, tang sida enda bekilat enti enda digusuk orang. Lebuh sida disalin ngagai chuan, sida nadai ngasaika utai.

²⁵Mar pen rega sida, nadai meh bida laban sida sigi enda enseput.

²⁶Peda! Sida nadai guna sekali. Sida enda ulih bejalai ngatika diri tang mesti dibai orang.

²⁷Sida ke ngibun engkeramba nya mega berasai malu lebuh siti ari engkeramba nya rebah lalu ulih nirika baru. Lebuh dengkah ba endur bukai, iya enda nemu mindah. Enti disandihka, iya enda nemu nirika diri empu. Meri piring ngagai sida baka ke meri ngagai bangkai.

²⁸Bala imam nyual utai ti diberi ngagai engkeramba sida lalu duit rega barang nya dikena sida empu. Bini sida enda magi dagin nya ngagai orang miskin sereta merinsa tang ngerami iya ngena garam ke guna dudi ila.

²⁹Endah sida indu ke benung datai kain tauka baru udah beranak tau negu pemeri nya. Semua tu nunjukka sida nya ukai petara - anang nyembah sida.

³⁰Baka ni engkeramba nya tau dikumbai petara laban sida ke indu tau mega nyuaka pemeri ngagai utai tu ti digaga ari kayu, pirak enggau mas?

³¹Bala imam tau duduk dalam rumah sembiang maya sida ngulit, ngena baju ti charik, bechukur sereta betabau pala tang enda betudung.

³²Bala imam nyerauh meradakka nyawa ba mua petara sida baka maya rabat lebuh orang parai.

³³Sida ngambi baju ari engkeramba lalu diberi ngagai bala bini enggau anak sida.

³⁴Nadai ngawa sekalika orang nya nulung tauka ngemedis petara nya, laban sida enda nemu malas. Sida enda ulih ngasuh orang nyadi raja tauka muai pangkat raja.

³⁵Sida mega enda ulih ngasuh orang kaya raja tauka meri iya duit ringgit. Enti sema orang besumpah ngaga semaya enggau sida tang enda ngasika semaya nya, nadai meh sida kala nyalah orang nya.

³⁶Sida enda kala ngidupka orang ari pemati, lalu sida mega enda kala nulung orang ke lemi ngelaban orang ke kering.

³⁷Sida enda kala ngasuh orang buta meda baru tauka nulung orang ke tusah udu.

³⁸Sida enda ulih meri pengasih tauka meri tulung ngagai orang ke balu tauka orang ke nadai apai indai.

³⁹Utai tu ti digaga ari kayu lalu disepuh ngena pirak enggau mas endang nadai kuasa sekali. Sida baka batu ti diambi ari bukit. Orang ke nyembah sida deka malu.

⁴⁰Kati ku orang berunding ngumbai sida nya petara? Orang Babilon enda bebasaka petara sida empu.

⁴¹Lebuh orang enda nemu bejaku, sida lalu mai orang nya ngagai rumah petara lalu ngasuh Bel meri kuasa ngambi orang nya tau bejaku, baka ke nemu utai ku sida Bel nya.

⁴²Tang taja orang nya nemu petara sida endang enda ulih nulung, agi meh sida nyembah petara nya laban pemeli sida.

⁴³Ukai semina nya aja, nyentukka orang indu melit diri empu enggau tali lalu duduk di tisi jalai nunu menyan lalu nyerahka diri nyadi indu sundal. Maya siku ari sida indu nya diambi beleman, lebuh iya pulai, iya lalu ngeleseka indu ke berimbai enggau iya laban siku nya enda dipilih laban kurang bajik.

⁴⁴Semua utai pasal engkeramba nya sigi bula magang. Kati ku orang berunding ngumbai sida nya petara?

⁴⁵Laban petara nya digaga bala tukang kayu enggau tukang mas, nya alai sida enda ulih nyadi utai bukai kelimpah ari ke nyadi utai ti dikedeka sida tukang nya.

⁴⁶Neh sida tukang nya enda gayu, dini sida ulih ngaga petara?

⁴⁷Sida tu nadai ninggalka utai ti badas, tang ninggalka penyai nyadi pesaka peturun sida jemah ila.

⁴⁸Lebuh perang enggau pengachau datai, bala imam ngiga endur belalai mai petara sida.

⁴⁹Bala engkeramba enda ulih nulung diri lebuh perang enggau maya kachau. Nama kebuah sida majak enda nemu engkeramba nya sigi ukai petara?

⁵⁰Engkeramba tu sigi enda lebih ari kayu ti disepuh enggau pirak enggau mas. Bisi maya ila sida deka ditemu nyengala ukai petara.

⁵¹Semua bansa enggau raja dudi ila deka nemu engkeramba sigi enda lebih ari utai ti digaga jari mensia

⁵²lalu tiap iku orang patut nemu utai nya endang ukai petara.

⁵³Engkeramba tu enda ulih ngaga orang nyadi raja tauka ngasuh hari ujan.

⁵⁴Sida enda ulih meri pemutus pasal hal sida empu. Sida mega enda ulih mulaika pengelurus ngagai orang ke dikumbai salah taja orang nya enda salah. Sida sigi enda sekali-kali ulih ngereja utai. Sida nadai guna baka burung kak ti terebai kia-kia.

⁵⁵Lebuh rumah engkeramba empa api, bala imam rari ngidupka nyawa diri empu. Nyadi engkeramba ti digaga ari kayu lalu disepuh enggau pirak enggau mas diteju dempa api baka kayu alang.

⁵⁶Sida enda ulih ngelaban raja tauka bamuk ngelaban munsuh. Baka ni orang tau arapka sida nya petara?

⁵⁷Engkeramba ti digaga ari kayu tu, ti disepuh enggau pirak enggau mas, enda ulih nyaga diri empu ari penchuri enggau penerumpak.

⁵⁸Sebarang orang ulih ngambi pirak, mas enggau baju sida, lalu nabanka semua utai nya. Petara nya enda ulih ngereja nama-nama kena nagang orang nya.

⁵⁹Nama-nama utai bukai, berengkah ari raja ke berani nyentuk ngagai mangkuk tanah, sigi beguna agi ari engkeramba. Neh pintu beguna agi ari engkeramba; baka pintu meri pengelikun ke barang dalam rumah. Neh tiang kayu di rumah raja bisi agi guna ari engkeramba.

⁶⁰Allah Taala ngaga mata hari, bulan enggau bintang meri penampak, lalu sida nitihka jaku Iya.

⁶¹Baka nya mega sida kilat enggau ribut. Kilat ulih dipeda ari jauh, lalu ribut bepuput di semua endur.

⁶²Lebuh Allah Taala ngasuh mua hari pambar ngagai semua endur di dunya, sida nitihka jaku Iya.

⁶³Lebuh Allah Taala ngirumka api ari serega ngambi nunu bukit enggau kampung, sida ngereja nitihka padah Iya. Engkeramba enda ulih ngereja semua utai nya - nunda aja, enda meh sida ulih.

⁶⁴Nama kebuah sida patut dikumbai petara, laban sida enda ulih nulung kitai tauka ngemedis kitai ngena sebarang jalai?

⁶⁵Nuan nemu sida nya ukai petara - anang nyembah sida.

⁶⁶Engkeramba tu nadai kuasa atas bala raja, enda ulih nyumpah sida tauka meri berekat ngagai sida.

⁶⁷Sida enda ulih ngaga tanda di langit ke semua bansa; sida enda ulih manchar baka mata hari tauka bulan.

⁶⁸Neh jelu beguna agi ari engkeramba nya. Jelu ulih ngerarika diri ari penusah kena nyaga diri empu.

⁶⁹Sida tu nyengala amat ukai petara - anang nyembah sida.

⁷⁰Engkeramba sida tu ti digaga ari kayu lalu disepuh ngena pirak enggau mas, semina ulih nulung baka engkeramba umai. Sida nadai ulih nyaga sekali-kali.

⁷¹Sida tu baka babas ti beduri di kebun; sida ukai ngenakutka burung, tang meri sida dan endur inggap. Sida tu baka bangkai orang mati ti ditikau ngagai pemetang.

⁷²Baju panjai ti mirah redam ti dikena sida nyau buruk. Ari nya kitai nemu sida tu endang ukai petara. Ke penudi iya bendar, sida lalu dempa sampuk, lalu dini-dini endur nadai siku orang deka begunaka sida.

⁷³Orang ke rurus sigi lebih ari orang bukai; iya nadai ngempu engkeramba, lalu orang enda kala ulih ngemelika iya.