Read Iban Baruk 1 Bible Online

Baruk 1 - Iban bible

Baruk 1

¹ Tu meh bup ti ditulis Baruk anak Neriah, uchu Mahseiah, peturun Sedekiah, Hasadiah enggau Hilkiah. Bup tu ditulis di Babilon,

²kena tujuh haribulan bulan nya[1] dalam taun kelima pengudah orang Babilon ngerebut, lalu nunu nengeri Jerusalem.

³Bup tu dibacha ulih Baruk empu ba mua Raja Jekoniah[2], anak lelaki Raja Jehoiakim, raja Judah enggau ba mua orang mayuh ke diau di Babilon, semak sungai Sud. Orang ke bepangkat, bala anak raja, bala tuai; enggau semua orang enda ngira sapa sida, datai magang laban deka ninga bup nya dibacha.

⁵Udah bup nya dibacha, sida nyabak, bepuasa lalu besembiang ngagai Tuhan.

⁶Sida mega bela meri duit enggau naka ulih sida.

⁷Duit nya lalu dikirum sida ke Jerusalem ngagai Imam Besai Jehoiakim anak Hilkiah, uchu Salum enggau ngagai bala imam bukai, nyengkaum semua orang ke begulai enggau Imam Besai di Jerusalem.

⁸Kena hari kesepuluh dalam bulan Siwan, Baruk ngambi semua perengka kudus ti udah dirumpak ari Rumah Sembiang, lalu mulaika utai nya ngagai menua Judah. Semua perengka pirak nya digaga Sedekiah, anak lelaki Josiah raja menua Judah,

⁹pengudah Jekoniah, bala tuai, bala tukang,[3] orang ke bepangkat enggau semua orang ke dibai ari Jerusalem ngagai Babilon, endur sida dibuai nitihka atur Nebukadnesar, raja Babilon.

¹⁰Tu utai ditulis orang Judah di Babilon: “Beli meh jelu ngena duit tu ti dikirum kami ngambika diberi nyadi piring tunu enggau piring ngampun penyalah. Beli mega menyan enggau gandum ke piring gandum. Serahka semua piring nya ba atas alta Tuhan, Allah Taala kitai.

¹¹Besembiang meh ke Raja Nebukadnesar, raja Babilon enggau Beltesasar, anak lelaki iya. Awakka seduai iya idup lantang senang belama.

¹²Awakka Tuhan ngering sereta ngiring kami ngambika kami ulih idup dalam ibun Raja Nebukadnesar, raja Babilon, enggau anak lelaki iya Beltesasar. Asuh kami talukka seduai nya seumur idup kami sampai ke kami ngerinduka seduai iya.

¹³Menyadi, besembiang meh ke kami ngagai Tuhan Allah Taala kitai laban kami udah bepenyalah ngelaban Iya, lalu diatu pengeringat Iya balat amat agi ninggang kami.

¹⁴Bacha meh bup tu ti dikirum kami ngagai kita, lalu ngaku penyalah kita dalam Rumah Sembiang ba hari keterubah Gawai Belangkau enggau hari bukai maya kita begempuru.

¹⁵Kita patut ngaku penyalah baka tu, “Tuhan, Allah Taala kami lurus tang kami agi berasai malu. Semua kami orang Judah ke diau di Jerusalem,

¹⁶bala raja kami, bala tuai kami, bala imam, bala nabi enggau bala aki ini kami malu,

¹⁷laban kami udah bedosa ngelaban Tuhan, Allah Taala kami,

¹⁸lalu enda talukka Iya. Kami enda ningaka Iya lalu enda nitihka semua pengasuh Iya dalam pengidup kami.

¹⁹Kenyau ari maya Tuhan mai aki ini kami pansut ari Ejip sampai ke sehari tu, kami enda talukka Iya, lalu enda nitihka pengasuh Iya.

²⁰ Dulu munya, lebuh Tuhan nguluka aki ini kami pansut ari Ejip ngambika Iya meri kami menua ti kaya sereta ami. Iya nyumpah kami nengah nembiak Iya Moses, lalu sehari tu kami merinsa ketegal sumpah nya.

²¹Kami enggai ningaka jaku Tuhan Allah Taala kami nengah bala nabi.

²²Ari ti ningaka Iya, kami nitihka pengingin ati kami ti jai nyembah petara bukai lalu ngereja pengawa ti dibenchi Tuhan, Allah Taala kami.