Read Iban Baruk 2 Bible Online

Baruk 2 - Iban bible

Baruk 2

¹Ketegal nya Tuhan ngenusah kami, bala akim kami, bala raja enggau bala tuai kami enggau semua orang Israel enggau orang Judah.

²Di serata dunya nadai kala utai udah nyadi baka di Jerusalem lebuh Tuhan ngukum kami nitihka utai ti ditulis dalam Adat Moses,

³sampai kami makai bala anak diri empu.

⁴Tuhan mechahka bansa kami, lalu ngelakka kami dikuasa semua bansa ke ngelingi kami. Sida ngemaruhka kami lalu ngaga menua kami sunyi.

⁵Kami udah bepenyalah ngelaban Tuhan, Allah Taala kami, lalu enggai talukka Iya. Nya kebuah bansa kami enda ulih menang, tang diperintah bansa bukai.

⁶Tuhan Allah Taala kami endang lurus, tang kami enggau aki ini kami malu sampai ke sehari tu.

⁷Tuhan ngukum kami enggau penusah baka ti udah dipadahka Iya.

⁸Taja baka nya, kami lalu enda ga ngelengkaka runding kami ti jai.

⁹Tuhan lurus dalam semua utai ti dipadah Iya ngagai kami. Ketegal nya, Iya ngasuh kami tinggang mayuh penusah ti disedia Iya ke kami.

¹⁰Tang taja pia, kami lalu enda ga ningaka jaku Iya sereta enda idup nitihka pengasuh ti diberi Iya ke kami.”

¹¹“O Tuhan, Nuan Allah Taala Israel ti mai nembiak Nuan pansut ari Ejip ngena mayuh tanda, kereja ajih enggau kuasa besai. Ketegal nya, Nuan tebilang sampai ke seharitu.

¹²O Tuhan, Allah Taala kami, kami udah bedosa lalu ngereja penyai. Kami enda taluk lalu ngelaban pengasuh Nuan.

¹³Badu ringat ngagai kami laban kami ke dipambarka Nuan tinggal mimit aja begulai enggau bansa bukai.

¹⁴Dingaka sembiang peminta kami, O Tuhan, lalu lepaska kami ketegal pemanah nama Nuan. Kereja meh pengawa ngambika orang ke muai kami kasih ke kami.

¹⁵Nya baru serata dunya deka nemu Nuan Tuhan, Allah Taala kami, laban Nuan udah milih peturun Jakop nyadi nembiak Nuan empu.

¹⁶O Tuhan, perening meh kami ari endur ti kudus alai Nuan diau; ingat meh ke kami lalu dingaka sembiang kami.

¹⁷O Tuhan, perening lalu peratika kami. Orang ke udah parai ba dunya pemati enda ulih muji Nuan.

¹⁸O Tuhan, semina orang idup aja ulih muji Nuan, taja sida merinsa amat, bejalai bungkuk, nadai daya, mata nyau lanuk-lanuk sereta lapar.

¹⁹O Tuhan, Allah Taala kami, kami minta kasih ke Nuan, tang ukai laban pemanah aki ini kami tauka bala raja kami.

²⁰Pengeringat Nuan ngagai kami balat amat baka ti udah dipadahka Nuan nengah bala nabi. Ku Nuan,

²¹‘Kita mesti taluk ngagai raja Babilon lalu bekereja ke iya. Nya baru kita ulih diau ba menua ti diberi Aku ngagai aki ini kita.

²²Tang enti kita enggai ningaka jaku aku, lalu enggai gawa ke iya,

²³Aku deka ngemaduka tiap pengerami di sekeda nengeri di menua Judah enggau di Jerusalem. Semua lagu ti ngasuh ati gaga maya pengerami melah pinang deka badu didinga. Serata menua deka sunyi nadai orang.’

²⁴Tang kami lalu enda ngasika jaku Nuan ti ngasuh kami bekerejaka raja Babilon. Nya kebuah kami diukum baka ti udah dipadah Nuan nengah bala nabi. Nuan udah bejaku madahka tulang bala raja enggau aki ini kami deka dipansutka ari kubur sida.

²⁵Diatu semua tulang nya udah di luar kena panchar mata panas lebuh siang hari, lalu lebuh malam hari sida kena angin ti chelap. Sida udah parai merinsa laban lapar pungkang, perang enggau penyakit.

²⁶Ketegal penyai orang Israel enggau orang Judah, Rumah Sembiang Nuan ditejuka Nuan runtuh sampai ke sehari tu.

²⁷Taja pia, O Tuhan, Allah Taala kami, Nuan manah amat enggau kami laban pengasih Nuan besai

²⁸ baka ti udah disemaya Nuan nengah nembiak Nuan Moses lebuh Nuan ngasuh iya nuliska Adat Nuan di mua orang Israel.

²⁹Nuan udah bejaku, ‘Enti kita enda talukka Aku, penyampau tubuh kita ti mayuh deka nyadi mimit diau begulai enggau semua bansa ba endur Aku mambarka kita.

³⁰Aku nemu kita enggai talukka Aku laban kita bansa ti kieh ati. Tang ba menua endur kita dibuai, kita deka ngesal ati,

³¹lalu nemu Aku meh Tuhan, Allah Taala kita. Aku deka meri kita ati ti taluk enggau ati ti rindu ningaka Aku.

³²Ba menua endur kita dibuai, kita deka ingatka Aku lalu muji Aku.

³³Kita deka badu kieh ati tauka ngereja penyai laban kita ingatka utai ti ninggang aki ini kita lebuh sida bedosa ngelaban Tuhan.

³⁴Lalu Aku deka mai kita pulai ngagai menua ti udah disemaya Aku ngena sumpah enggau aki ini kita, enggau Abraham, Isak enggau Jakop. Menua nya deka diempu kita baru. Aku deka nambahka penyampau tubuh kita, lalu badu ngurangka iya.

³⁵ Aku deka ngaga sempekat ti meruan enggau kita: Aku nyadi Allah Taala kita lalu kita Israel nyadi nembiak Aku. Aku badu agi muru kita ari menua ti udah diberi Aku ngagai kita.’