Read Iban Baruk 3 Bible Online

Baruk 3 - Iban bible

Baruk 3

¹O Tuhan ti Pemadu Bekuasa, Allah Taala Israel, enggau ati pemadu tusah kami ngangau ke Nuan.

²O Tuhan, dinga sereta kasih meh ke kami laban kami udah bedosa ngelaban Nuan.

³Nuan meruan merintah baka raja, tang kami parai lalu nadai agi ke selama-lama iya.

⁴O Tuhan ti Pemadu Bekuasa, Allah Taala Israel, dinga meh sembiang kami ke nyau deka parai. Aki ini kami udah bedosa ngelaban Nuan, Tuhan, Allah Taala sida. Sida enggai talukka Nuan, ketegal nya, diatu kami nanggung semua penusah.

⁵Anang ingatka penyai aki ini kami tang ba maya ti baka tu, ingat aja meh ke kuasa enggau pemanah nama Nuan,

⁶laban Nuan meh Tuhan, Allah Taala kami, nya kebuah kami deka muji Nuan.

⁷Nuan ngasuh kami nangika Nuan ngambi kami besembiang ngagai Nuan. Ba menua tu endur kami dibuai, kami deka muji Nuan laban kami udah ngenyauhka diri ari semua penyalah aki ini kami.

⁸Nuan udah muai kami lalu mambarka kami begulai enggau bansa bukai, lalu ngasuh kami dikemaruh sereta disumpah sida. Nya meh ukum kami laban penyalah aki ini kami ti nguing ari Nuan, O Tuhan, Allah Taala kami.”

⁹ O Israel, dingaka semua pengasuh ti meri pengidup, lalu peratika semua utai nya ngambika kita bepenemu.

¹⁰O Israel, nama kebuah nuan ba menua munsuh? Nama kebuah nuan nyau tuai di menua orang bukai?

¹¹Nama kebuah nuan ngamahka diri baka orang ke mati, lalu begulai enggau raban orang ke mati?

¹²Nuan baka nya laban nuan udah ninggalka pun penemu-dalam!

¹³Enti sema nuan nitihka peneka Allah Taala, tentu pengidup nuan deka bisi pemaik ke selama-lama iya.

¹⁴Belajar meh ba sebarang endur ti bisi penemu-dalam, pengering enggau pemereti ati, lalu nuan deka terus nemu endur ngulihka umur panjai enggau pengelantang, penampak ti meri penerang ngagai pengidup enggau pemaik.

¹⁵ Sapa udah tetemuka endur penemu-dalam tauka udah tama ngagai rumah endur pengaya reta iya?

¹⁶Dini endur bala tuai raban bansa enggau orang ke ngasu jelu siga sereta nangkap burung peneka ati sida?

¹⁷Dini endur orang ke nugungka mas enggau pirak, reta tengkira ti dikarapka sida? Dini endur orang nya ke enda nemu puas deka bempu utai nya?

¹⁸Dini endur sida ke bendar amat bekereja ngulihka pirak tang pengawa sida nadai dipeda?

¹⁹Semua sida nya udah nyau nurun ngagai dunya pemati, lalu orang bukai pansut nganti sida.

²⁰Lalu ada meh rebak baru diau di dunya tu. Tang sida enda tetemu tauka enda meretika jalai penemu-dalam, lalu anak uchu sida tesat jauh agi.

²²Penemu-dalam nadai ditemu orang Kanaan enggau orang Edom.

²³Peturun Hagar mega nadai tetemuka penemu-dalam, taja sida ngiga iya di dunya tu. Pia mega sida ke bedagang datai ari Meran enggau Teman, enggau bala penusi cherita enggau sida ke ngiga pemereti, enda tetemu jalai ngagai penemu-dalam

²⁴O Israel, besai amat endur Allah Taala diau! Besai amat dunya ti diempu Iya.

²⁵Semua nya besai magang lalu nadai sekat, pemesai enggau peninggi iya enda ulih disukat.

²⁶ Din dulu suba ada orang ke besai gamal ke tebilang, sida kering sereta landik beperang.

²⁷Tang ukai sida nya ke dipilih Allah Taala; ukai sida nya ti diberi Iya jalai penemu-dalam.

²⁸Sida nya udah dirusak lalu punas laban sida nadai penemu-dalam enggau pemereti ati.

²⁹Nadai siku orang udah ke serega ngambi penemu-dalam lalu mai iya nurun ke baruh ari remang.

³⁰Nadai siku orang udah ngelayang tasik besai lalu ngulihka penemu-dalam, tauka meli iya ngena mas ti pemadu berega.

³¹Nadai siku orang nemu jalai ngulihka iya tauka beratika jalai nuju ngagai iya.

³²Semina Allah Taala siku aja ti nemu semua utai tetemuka penemu-dalam ngena pemereti ati Iya. Iya ngaga dunya ti meruan belama, lalu ngisi iya enggau mayuh macham jelu.

³³Iya ngangauka penampak, lalu penampak gegetar datai. Iya ngirumka penampak, penampak ningaka Iya, lalu mansang.

³⁴Semua bintang bekebelik manchar naka pemanah, penuh enggau pengaga ba endur sida.

³⁵Lebuh Tuhan ngangau, semua bintang nyaut enggau jampat; sida bekebelik manchar, lalu ngerinduka Iya ti ngaga sida.

³⁶Iya meh Allah Taala kitai, lalu siku pen nadai baka Iya.

³⁷Iya meh ke nemu semua jalai nuju penemu-dalam, lalu meri iya ngagai orang Israel, nembiak ke dikerindu Iya.

³⁸Kenyau ari nya, penemu-dalam bisi dipeda di dunya, lalu begulai enggau mensia.