Read Iban Baruk 4 Bible Online

Baruk 4 - Iban bible

Baruk 4

¹ Penemu-dalam nya bup pengasuh Allah Taala, Adat Moses ti meruan selama-lama iya. Semua orang ke bepegai ba Adat nya deka idup, tang orang ke ninggalka iya deka mati.

²O Israel, pulai meh, lalu bepegai teguh ba penemu-dalam nya. Bejalai meh nuju penampak ti dipancharka iya.

³Anang nyerahka mulia enggau ungkup kita ngagai bansa bukai.

⁴Beberekat amat meh kitai orang Israel laban kitai nemu utai ti dikedeka Tuhan ti Allah Taala.

⁵Keringka ati nuan, O bansa aku ti seruran ngidupka nama Israel.

⁶Kita udah dijual ngagai bansa bukai, tang enda mudah dirusak. Kita udah ngasuh Allah Taala ringat, nya alai, Iya nyerahka kita ngagai bala munsuh kita.

⁷Kita ngasuh Iya ti ngaga kita ringat lebuh kita enda meri piring ngagai Allah Taala tang meri piring ngagai sitan.

⁸Kita enda ingatka Allah Taala ti meruan belama, ke nupi kita kenyau ari mit, lalu kita ngenusah Jerusalem ti baka indai kita.

⁹Jerusalem meda kita diukum pengeringat Allah Taala, nya alai, ku Jerusalem bejaku enggau nengeri ti ngelingi iya, “Peda pemesai penusah ti diasuh Allah Taala ninggang aku!

¹⁰Aku meda bala anak aku ditangkap ari asuh Allah Taala ti meruan belama.

¹¹Aku udah nupi sida enggau ati gaga; tang diatu aku tusah ati, lalu nyabak meda sida ditabanka orang.

¹²Nadai siku orang patut gaga ketegal aku. Aku tu siku balu ti lenyau mayuh anak. Aku siku aja diau kediri laban bala anak aku udah bedosa ngelengkaka Adat Allah Taala.

¹³Sida enda pedulika semua atur Iya, enda nitihka semua pengasuh Iya, sereta enda nitihka jalai ti betul baka ti dikedeka Iya.

¹⁴O semua nengeri ti berimbai enggau aku, ingat meh ke bala anak aku ti ditangkap ari asuh Allah Taala ti meruan belama.

¹⁵Allah Taala udah ngirum ngagai sida siti bansa ari jauh, bansa ti enda beradat ti ngena jaku bansa bukai. Sida enda bebasaka orang tuai, lalu sida mega enda kasih ke bala anak mit.

¹⁶Nya meh bansa ke nabanka bala anak ti dikesayau aku, lalu aku nyadi balu tinggal kediri.

¹⁷O bala anak aku, aku nadai daya nulung kita.

¹⁸Semina Iya ti ngasuh kita tusah ulih ngelepaska kita ari munsuh kita.

¹⁹Alai meh, O anak aku, alai meh! Aku sunyi tinggal kediri.

²⁰Gari ti dikena aku lebuh bisi pemaik udah aku buka, lalu diganti aku enggau kain guni tanda ngulit. Sekumbang aku idup, aku deka ngangau minta tulung Allah Taala ti meruan belama.

²¹Keringka ati kita, O bala anak aku, kangauka Allah Taala. Iya tentu deka ngelepaska kita ari kuasa enggau perinsa munsuh.

²²Aku andalka Allah Taala ti meruan belama deka jampat ngelepaska kita. Iya ti Kudus, Pengelepas ti meruan belama deka ngasuh aku gaga lebuh Iya mandang ke pengasih Iya ngagai kita.

²³Lebuh kita dibai ditaban ke bukai, aku tusah ati lalu nyabak. Tang Allah Taala deka mai kita pulai ngagai aku, lalu ngelantangka aku selama-lama iya.

²⁴Nengeri bukai ti berimbai enggau kitai ti meda kita ditangkap, deka meda kita jampat dilepaska Allah Taala ti meruan belama, ti datai ngagai kita enggau kuasa enggau mulia ti besai.

²⁵O bala anak aku, liatka ati kita ngenatka ukum ari Allah Taala. Diatu munsuh ngagai kita, tang enda lama da kita deka meda sida dirusak sereta minta kasihka kita.

²⁶O bala anak aku ti dikesayau aku, kita mesti nengah jalai ti mar, lalu ditaban ke bukai bebala mayuh baka raban domba ti dirampas ari munsuh.

²⁷Keringka ati kita, O bala anak aku, kangauka Allah Taala. Iya ke ngasuh kita tusah deka ingatka kita baru.

²⁸Suba kita keran amat deka ninggalka Allah Taala, baka nya mega diatu kita keran amat deka pulai ngagai Iya, lalu gawa ke Iya sepuluh kali rajin ari suba.

²⁹Iya ti ngenataika semua penusah nya ngagai kita deka ngelepaska kita, lalu meri kita pengelantang ti meruan belama.”

³⁰Keringka ati nuan, O Jerusalem! Iya ke udah meri nuan nama deka merindang nuan.

³¹Sida ke ngayahka nuan lalu berami meda nuan dirusak deka kena penusah.

³²Semua nengeri ti beulunka bala anak nuan deka kena penusah. Penusah deka ninggang menua Babilon endur bala anak nuan ditangkap.

³³Semua nengeri ti berami meda kita dirusak deka tusah ati meda sida empu dirusak.

³⁴Aku deka ngerampas bala iya ti mayuh ke dikegagaka iya, lalu ngubah jaku sumbung sida betukar nyadi leka sabak.

³⁵Aku, Allah Taala ti meruan belama deka ngenataika api atas iya, api nya deka idup chukup lama. Semua utai iya ti runtuh deka endur sitan deka diau lama.

³⁶Perening meh ke timur, O Jerusalem, lalu peda meh pengaga ti dibai Allah Taala ngagai nuan.

³⁷Peda bala anak nuan ke dilakka nuan ditabanka orang, diatu pulai ngagai nuan. Sida udah digempuruka ari timur enggau ari barat diasuh Allah Taala ti Kudus. Diatu, sida pulai enggau ati gaga ketegal mulia Allah Taala.