Read Iban Susanna 1 Bible Online

Susanna 1 - Iban bible

Susanna 1

¹Di Babilon bisi siku lelaki benama Joakim.

²Iya jadi enggau Susanna, anak indu Hilkiah. Susanna nya indu ke bajik sereta kering dalam pengarap.

³Apai indai iya bansa Judah ke kering ba pengarap lalu ngiring anak indu seduai nitihka Adat Moses.

⁴Laki iya Joakim orang ke kaya amat. Rumah iya dikelinggi kebun ti badas, lalu orang Judah selalu begempuru baum dia laban semua sida bebasa amat ke iya.

⁵Tiap iku orang ke bisi chara datai ngagai rumah Joakim, ti alai dua iku akim ningaka pechara dalam kot. Ketuai raban bansa Judah dua iku nya empai lama udah dipadu megai pengawa nya. Tuhan bisi udah nyebut pasal seduai tu, ku Iya, “Di Babilon bisi penyai; akim enda ulih meri lalau ngiring orang.”

⁶

⁷Tiap-tiap hari maya tengah hari, lebuh semua orang nyau merarau, Susanna selalu bejalai dalam kebun.

⁸Dua iku akim nya tetarit ati amat meda Susanna. Nya alai, seduai nganti sereta nengkilaka iya.

⁹Seduai nya ingin amat ke tubuh iya, nya alai seduai nyau enggai besembiang sereta enda ingatka tanggung jawab seduai ke nyadi akim.

¹⁰Seduai bela dekaka Susanna, tang nadai siku ari seduai madahka pengingin ati diri ngagai pangan.

¹¹Kebuah pia laban seduai bela malu ngayanka pengamah ati diri.

¹²Nya alai tiap-tiap hari seduai gagit amat deka nengkilaka iya.

¹³Nyadi sekali, lebuh tengah hari seduai bejaku enggau pangan diri, “Diatu maya merarau, aram tua pulai ke rumah.”

¹⁴Seduai beserara tang enda sama jalai. Tang enda lama udah nya, seduai bela nikal baru laban deka nengkilaka Susanna, tang enda mukai-mukai seduai betemu enggau pangan diri. Terubah iya seduai deka nguji nerang ngagai pangan diri nama kebuah seduai dia, tang pengujung iya seduai bela ngaku ingin ke Susanna. Seduai iya berundingka maya ti ngena alai seduai ulih tetemuka Susanna kediri.

¹⁵Nya alai seduai iya nganti maya ke ngena. Bisi sekali Susanna enggau kuli iya dua iku bejalai di kebun baka selama. Semina dua iku akim nya bisi dia, belalai nengkilaka Susanna. Laban hari panas amat Susanna lalu deka mandi. Nya alai ku iya bejaku ngagai kuli iya dua iku nya, “Alai seduai ngambi minyak kena mandi enggau minyak wangi, lalu kunchi pintu pagar ngambi orang enda ulih ngachau aku.”

¹⁶

¹⁷

¹⁸Kuli iya ngunchi pintu besai lalu pansut nengah pintu mit ngambi utai baka ti diasuh Susanna. Kuli dua iku nya enda meda dua iku lelaki ke belalai dia.

¹⁹Udah kuli nya pansut, akim dua iku nya lalu tekala nya engkechit ari endur seduai ke belalai, sereta belanda ngagai Susanna,

²⁰lalu bejaku ngagai iya, “Semua pintu kebun udah dikunchi. Nadai orang meda kitai. Kami duai udu ingin amat deka beleman enggau nuan, nya alai beri meh kami duai utai ti diketengukka kami.

²¹Enti nuan enggai, kami duai deka mai nuan ngagai kot lalu besumpah nusi nuan ngasuh kuli nuan ke bukai ngambika nuan ulih kediri enggau siku orang bujang.”

²²“Enti baka tu nadai jalai aku,” pia ku Susanna. “Enti aku nyerahka diri ngagai seduai, aku tentu deka diukum bunuh ketegal butang. Enti aku enggai, agi meh aku kena panjuk seduai.

²³Tang deka agi aku dituduhka seduai ari ke bepenyalah ngelaban Tuhan.”

²⁴Iya lalu nyerauh enggau nyawa ti naka penginggar, akim dua iku nya pen lalu meradakka nyawa nyalah iya.

²⁵Siku ari seduai nya belanda lalu muka pintu pagar.

²⁶Lebuh bala kuli di rumah ninga orang nyerauh, sida tekala nya belanda ngagai kebun nengah pintu mit deka nemu nama utai ti ngachau Susanna.

²⁷Akim dua iku nya lalu nusi cherita seduai iya. Lebuh bala kuli ninga cherita nya, sida tekenyit amat sereta malu. Sida nadai kala ninga rita utai baka nya nyadi ba Susanna.

²⁸Hari siti, lebuh orang begempuru di rumah Joakim, akim dua iku nya datai, enggau ati ti bebendar deka bejalaika atur ti jai ngambika Susanna diukum bunuh.

²⁹Di mua orang mayuh seduai bejaku, “Kangauka Susanna bini Joakim, anak indu Hilkiah.” Lebuh dikangau,

³⁰iya datai enggau apai indai iya, bala anak iya, enggau semua kaban belayan iya.

³¹Gamal iya likun sereta bajik amat

³²nya alai dua iku orang ke jai nya ngasuh iya muka tudung mua iya ngambika seduai puas ati meda iya.

³³Bala sida sebilik enggau semua orang bukai nyau labuh ai mata.

³⁴Udah nya akim dua iku nya bediri di mua orang mayuh, lalu ngengkah jari seduai atas pala Susanna sereta belabuh nyalah iya.

³⁵Iya nyabak, tang iya nengkadah ke atas ngagai serega laban iya arapka Tuhan.

³⁶Seduai dua nya meri penerang munyi tu: “Kami duai bejalai di kebun lebuh indu tu datai enggau dua iku indu kuli iya. Iya ngunchi pintu besai lalu ngasuh kuli iya pulai.

³⁷Udah nya siku orang bujang ke belalai di kebun nya pansut, lalu mansang ngagai iya. Seduai iya gali berimbai.

³⁸Kami duai di sukut kebun nya, lalu lebuh kami meda utai ti nyadi, kami lalu belanda

³⁹sereta nangkap seduai iya benung salah pengawa. Kami duai nguji nangkap lelaki nya, tang iya kering agi ari kami duai. Iya belanda muka pintu lalu rari.

⁴⁰tang kami ulih ngetanka indu tu. Kami duai nanya iya sapa lelaki nya tadi, tang iya enggai madahka kami. Kami besumpah, penerang tu endang amat.”

⁴¹Orang dua iku nya ukai semina tuai raban bansa sida, tang mega akim, nya alai, orang arapka cherita seduai lalu ngasuh Susanna diukum bunuh.

⁴²Udah nya Susanna lalu ngangau enggau nyawa ti inggar, “Allah Taala ke meruan, nadai utai ulih dipelalaika ari Nuan; Nuan dulu nemu semua utai sebedau iya nyadi.

⁴³Diatu aku deka mati, tang Nuan nemu aku amat nadai salah. Orang tu sigi bula. Nama kebuah aku mesti dibunuh?”

⁴⁴Tuhan ningaka sembiang iya

⁴⁵lalu ngasuh siku orang bujang benama Daniel bejaku, sebedau Susanna dibai ke bukai ngambika dibunuh.

⁴⁶Daniel bejaku enggau inggar, “Aku enggai nabakka diri ba hal pemati iya!”

⁴⁷Semua orang malik magang ngagai iya lalu nanya, “Nama reti jaku nuan?”

⁴⁸Daniel bediri di mua sida lalu bejaku, “Orang Israel, naka meh pemeli kita. Kati kita ngeletak ukum ngagai indu bansa Israel, bepanggai ba penerang ti baka nya? Kita nadai nguji ngiga penerang ti amat.

⁴⁹Kes tu patut didingaka baru. Penerang ti disebut orang nya bula.”

⁵⁰Nya alai semua orang berumban mulaika diri ngagai kot. Pemesai ke gawa dia lalu bejaku ngagai Daniel, “Allah Taala udah meri nuan penemu taja nuan agi biak, nya alai aram enggau kami lalu terangka nama reti utai ku nuan.”

⁵¹Ku Daniel madahka sida, “Serara akim dua iku nya. Awakka aku nanya seduai iya siko-siku.”

⁵²Udah nya Daniel ngangauka akim keterubah, lalu bejaku, “Nuan orang tuai ke jai, diatu nuan deka nanggung ukum semua dosa ti udah digaga nuan.

⁵³Nuan udah meri pemutus ti enda patut. Nuan udah ngukum orang ke enda salah lalu ngelepaska orang ke salah, taja Tuhan udah madah, ‘Anang ngeletak ukum bunuh ngagai orang ke enda salah.’

⁵⁴Enti nuan amat bisi meda seduai iya, diatu padahka aku, ba baruh kayu ni seduai iya beleman? “Ba baruh kayu ti mit,” pia ku saut iya.

⁵⁵Daniel bejaku, “Au meh! Pemula nuan nya tau munuh nyawa nuan. Melikat Allah Taala udah diasuh munuh nuan.”

⁵⁶Udah nya akim keterubah dibai ke bukai lalu akim kedua dibai betunga enggau Daniel. “Nuan tu baka orang Kanaan ukai baka orang Judah,” ku Daniel bejaku ngagai iya. Pemajik indu tu nyau ngelimpangka runding nuan lalu pengamah ati nuan ngasuh pikir nuan enda betul.

⁵⁷Nuan udah teleba ngayahka indu orang Israel peneka ati nuan laban sida takutka nuan, tang tu indu bansa Judah, iya sigi enggai nyerahka diri.

⁵⁸Diatu padah ngagai aku, ba baruh kayu ni nuan meda seduai iya?” Ba baruh kayu ti besai,” ku saut iya.

⁵⁹Daniel bejaku, “Au meh! Pemula nuan tau munuh nyawa nuan; Melikat Allah Taala udah nganti enggau pedang ba jari iya sedia deka munuh nuan. Udah nya baru seduai nadai agi.”

⁶⁰Udah nya semua orang manjung muji Allah Taala, ke nyelamatka orang ke arapka Iya.

⁶¹Sida lalu ngelaban akim dua iku nya laban Daniel udah nentuka seduai iya meri penerang ti bula enggau sumpah.

⁶²Adat Moses madahka, orang ke meri penerang ti bula deka nerima ukum ti sebaka enggau orang ke kena dawa. Nya alai, dua iku akim nya diukum bunuh, lalu indu ke nadai salah nya selamat.

⁶³Apai indai Susanna, laki iya, enggau semua kaban belayan iya bela muji Allah Taala laban iya udah ditemu nadai salah.

⁶⁴Berengkah ari sehari nya, Daniel dibasa orang amat.