Read Iban Esekiel 1 Bible Online

Esekiel 1 - Iban bible

Esekiel 1

¹ Kena lima hari bulan ti keempat dalam taun ti ketiga puluh,[1] aku, Imam Esekiel anak Busi, diau begulai enggau orang Judah ti udah kena buai ngagai tebing Sungai Kebar di menua Babilon. Langit tebuka, lalu aku begenera meda Allah Taala. (

² Tu taun ti kelima Raja Jehoiakin udah dibuai ngagai menua Babilon.)

³Aku ninga TUHAN bejaku ngagai aku ba tebing Sungai Kebar di menua Babilon, lalu aku ngasaika kuasa Iya.

⁴Aku engkadah lalu tepedaka biaubalai datai ari utara: siti mua hari ti besai ti beperenching, enggau api ti enda nemu ngetu nyelar, lalu ba tengah-tengah api nya, bisi siti utai ti beperenching baka temaga ti udah dipugar.

⁵ Lalu aku mega tepedaka empat iku utai ti idup, ti baka gamal mensia, ba tengah-tengah biaubalai nya,

⁶lalu genap iku sida nya bisi empat iti mua enggau empat iti sayap.

⁷Kaki sida lurus, lalu bisi tunjing baka tunjing sapi. Kaki sida beperenching baka temaga ti udah dipugar.

⁸Ari baruh genap iti sayap sida, bisi jari.

⁹Lalu sayap sida siku-siku negu puting sayap pangan diri, datai ke sida empat iku nya dipeda besegi empat. Lebuh sida mindah, sida sama-sama mindah, enda ibuh nguingka tubuh diri.

¹⁰ Genap iku utai ti idup nya bisi empat iti mua: mua mensia muak ari mua, mua singa muak ari kanan, mua sapi muak ari kiba, enggau mua menaul muak ari belakang.

¹¹Sayap sida ke di atas dikerembaika sida, negu puting sayap pangan diri. Lalu sayap dua iti ti bukai dikena iya nyerayung tubuh diri.

¹²Genap iku sida bela mindah ke mua. Kini-kini ke tunga roh sida mindah, kia ke meh sida mindah, lalu sida enda ibuh nguingka tubuh diri.

¹³ Lalu gamal utai ti idup nya baka bara api, baka sempun ti mau; api nya terang, lalu ari api nya pansut kilat ti nyelar.

¹⁴Utai ti idup nya terebai kin kitu laju baka kilat.

¹⁵ Lebuh aku benung merening ngagai empat iku utai ti idup nya, aku tepedaka empat iti kaki kerita ba tanah, lalu siti kaki kerita nya ngimbai siku-siku utai ti idup nya.[2]

¹⁶Kaki kerita empat iti nya sebaka gaya magang. Siti-siti beperenching baka batu ti berega, lalu ba tiap iti kaki kerita nya bisi siti kaki kerita ti bukai ti melintang dalam kaki kerita nya,

¹⁷ngambika kaki kerita nya tau bejalai ngagai sebarang tunga iya deka.

¹⁸ Bingkai kaki kerita nya tinggi sereta ngenakut, lalu penuh laban mata.[3]

¹⁹Genap kali utai ti idup nya mindah, kaki kerita nya mindah sama enggau sida, lalu lebuh utai ti idup nya angkat ari tanah, kaki kerita nya mega angkat.

²⁰Kini-kini ke tunga roh nya mindah, utai ti idup nya mega mindah, lalu kaki kerita nya mindah sama enggau sida; laban roh utai ti idup nya dalam kaki kerita nya.

²¹Nya alai genap kali utai ti idup nya mindah, tauka ngetu, tauka angkat ke atas, kaki kerita nya nitih belama.

²² Pala utai ti idup nya dirungkup ngena utai ti baka kebung langit, ti beperenching baka batu kristal.

²³Di baruh kebung nya, sayap utai ti idup nya dikerembaika iya ngagai siku ti nangkanka iya, lalu iya nyerayung tubuh diri ngena sayap dua iti ti bukai.

²⁴ Aku bisi ninga munyi sayap sida lebuh sida terebai, munyi segum pangka gelumbang, munyi nyawa bala soldadu, munyi nyawa Allah Taala ti Pemadu Bekuasa. Lebuh sida ngetu terebai, sida nyimpul sayap sida.

²⁵Tang munyi utai agi bisi didinga datai ari atas kebung ti ngerungkup pala sida.

²⁶ Ba atas kebung ti ngerungkup pala sida nya bisi siti utai ti baka kerusi diraja ti baka batu nilam; lalu duduk ba atas utai ti baka kerusi diraja nya, bisi siti utai ti baka gamal mensia.

²⁷ Lalu ari atas utai ti baka punggung, aku meda utai ti beperenching baka temaga ti dikelingi api; lalu ari baruh utai ti baka punggung, aku bisi meda utai ti baka api, ti dikelingi penampak.

²⁸Penampak nya baka gaya anakraja ti ba mua hari lebuh hari ujan. Nya meh gaya mulia TUHAN. Lebuh aku meda utai nya, aku lalu nyungkurka diri ke tanah, lalu ninga munyi nyawa bejaku.