Read Iban Esekiel 10 Bible Online

Esekiel 10 - Iban bible

Esekiel 10

¹ Aku malik ngagai kebung ti ari atas pala sida melikat cherub, lalu ari atas sida nya bisi utai ti baka kerusi diraja, ti baka batu nilam.

² Ku Allah Taala bejaku ngagai orang ke ngena kain linin, “Alai nuan bejalai nengah entara kaki kerita ti di baruh melikat cherub nya, lalu ambi segenggam bara api. Udah nya taburka bara api nya ngagai nengeri tu.” Aku lalu ngemataka iya mupuk.

³Nyadi bala melikat cherub nya benung bediri muak ari selatan Rumah Sembiang lebuh orang nya tama. Siti mua hari lalu ngisi tengah laman ti muak ari dalam.

⁴Penampak mulia TUHAN angkat ari sida melikat cherub, lalu mindah ngagai mua pintu Rumah Sembiang. Udah nya mua hari lalu ngemenuhka Rumah Sembiang, lalu tengah laman nya terang laban mulia TUHAN.

⁵Munyi kebap sayap sida melikat cherub ulih didinga ari tengah laman ti di luar, munyi nyawa Allah Taala ti Pemadu Bekuasa lebuh Iya bejaku.

⁶Lebuh TUHAN ngasuh orang ke ngena kain linin nya mai api ari entara kaki kerita ti di baruh sida melikat cherub nya, orang nya mansang lalu bediri ngimbai siti kaki kerita nya.

⁷Melikat cherub nya lalu ngunjurka jari iya ke dalam api ti ba tengah-tengah sida, ngambi bara api, lalu ngengkahka bara api nya ba jari orang ke ngena kain linin nya. Orang nya lalu ngambi bara api nya, lalu mupuk.

⁸Aku meda sida melikat cherub nya baka ke bisi utai ti baka jari mensia di baruh sayap sida.

⁹ Aku mega meda empat iti kaki kerita nya sebaka magang, siti-siti ngimbai siku-siku melikat cherub nya. Kaki kerita nya beperenching baka batu ti berega, lalu genap iti kaki kerita nya bisi siti kaki kerita ti bukai ti melintang dalam kaki kerita nya.

¹¹Lebuh sida mindah, sida ulih mindah ngagai sebarang tunga, enda ibuh bekuing. Semua sida mindah ngagai tunga ti dikedekaka sida, lalu enda ibuh bekuing.

¹² Tubuh, belakang, jari, sayap sida, enggau kaki kerita nya penuh laban mata.

¹³Aku ninga munyi nyawa ngangau, “Kaki kerita ti bepusin.”

¹⁴ Tiap iku melikat cherub nya bisi empat iti mua. Mua ti terubah nya mua melikat cherub, ti kedua mua mensia, ti ketiga mua singa, lalu ti keempat mua menaul.

¹⁵(Bala melikat cherub nya meh sida ke udah dipeda aku ba tebing Sungai Kebar.) Lebuh sida melikat cherub nya angkat terebai

¹⁶lalu mindah, kaki kerita nya mindah sama enggau sida. Genap kali sida ngerembaika sayap sida deka terebai, kaki kerita nya mupuk enggau sida, tang enda bekuing.

¹⁷Lebuh sida melikat cherub nya ngetu, kaki kerita nya mega ngetu. Lalu lebuh sida melikat cherub nya terebai, kaki kerita nya mupuk sama enggau sida, laban roh utai ti idup nya bisi dalam kaki kerita nya.

¹⁸Udah nya penampak mulia TUHAN ti terang lalu angkat ari mua pintu Rumah Sembiang, lalu mindah ngagai endur ba atas sida melikat cherub nya.

¹⁹Sida melikat cherub nya ngerembaika sayap sida, lalu terebai ke atas ari dunya tu lebuh aku benung ngemata, lalu kaki kerita nya sama mupuk enggau sida. Sida ngetu enda lama ba pintu timur Rumah Sembiang, lalu mulia Allah Taala ke disembah orang Israel bisi ba atas sida.

²⁰Sida nya utai ti idup ti udah dipeda aku di baruh Allah Taala ke disembah orang Israel ba tebing Sungai Kebar. Diatu baru aku nemu sida nya bala melikat cherub.

²¹Genap iku sida bisi empat iti mua, empat iti sayap, enggau utai ti baka jari mensia di baruh sayap sida.

²²Mua sida nya betul-betul mua ti udah dipeda aku ba tebing Sungai Kebar. Genap iku sida nya mindah nuju ke mua.