Read Iban Esekiel 11 Bible Online

Esekiel 11 - Iban bible

Esekiel 11

¹Roh Allah Taala ngangkatka aku lalu mai aku ngagai pintu timur Rumah Sembiang. Ba semak pintu nya aku tepedaka dua puluh lima iku orang, nyengkaum Jasaniah anak Asur enggau Pelatiah anak Benaiah, dua iku tuai bansa.

²Allah Taala lalu bejaku enggau aku, “Mensia, bala orang tu ngaga pelan ti jai, sereta meri jaku lalau ti jai dalam nengeri tu.

³Ku sida, ‘Enda lama da agi kitai deka berumah baru.[15] Nengeri tu baka periuk ti dikena berapi, lalu kitai tu baka dagin dalam periuk nya, tang periuk nya nyaga kitai ari api.’

⁴Nya alai, mensia, bejaku meh nuan ngelaban sida diatu.”

⁵Roh TUHAN lalu bekuasa ba aku, lalu TUHAN ngasuh aku meri pesan tu ngagai orang mayuh: “Kita orang Israel, Aku nemu utai ti disebut kita, enggau utai ti diperambu kita.

⁶Kita udah munuh mayuh orang di nengeri tu, datai ke jalai raya nyau penuh laban bangkai sida.

⁷“Nya alai tu utai ti disebut Aku TUHAN Allah Taala, ngagai kita. Nengeri tu endang amat periuk kena berapi, tang dagin nama nya? Dagin nya bangkai orang ke udah dibunuh kita! Tang Aku deka muai kita ari nengeri tu!

⁸Kati kita takutka pedang? Tang Aku deka ngasuh bala soldadu nyerang kita ngena pedang.

⁹Aku deka muai kita ari nengeri tu, lalu nyerahka kita ngagai orang menua bukai. Aku udah ngeletak kita diukum bunuh,

¹⁰lalu kita deka mati beperang dalam menua kita empu. Nya baru semua orang deka nemu Aku endang TUHAN.

¹¹Nengeri tu enggai nyaga kita, enda baka periuk ti nyaga dagin ti di dalam iya. Aku deka ngukum kita di sebarang endur kita diau dalam menua Israel.

¹²Kita deka nemu aku tu endang TUHAN, lalu lebuh kita nitihka adat orang bansa bukai ke berimbai menua enggau kita, kita ngelanggar adat Aku sereta enda ngasika pesan Aku.”

¹³Lebuh aku agi benung benabi, Pelatiah rebah lalu mati. Aku lalu nyungkurka diri ke tanah, lalu ngangau enggau nyawa ti inggar, “Anang, TUHAN Allah Taala! Kati Nuan deka munuh semua orang ke agi tinggal di menua Israel?”

¹⁴Ku TUHAN bejaku ngagai aku,

¹⁵“Anak mensia, orang ke diau di Jerusalem berandauka pasal nuan, enggau pasal bansa nuan ti udah kena buai ngagai menua bukai. Ku sida bejaku, ‘Orang ke udah kena buai kelalu jauh alai diau lalu enda ulih nyembah TUHAN. TUHAN udah meri menua tu nyadika pesaka kitai.’

¹⁶“Nya alai padahka ngagai orang ke sama kena buai baka nuan empu, utai ti disebut Aku. Aku tu ti udah ngasuh sida diau di menua ti jauh, lalu ngachirka sida ngagai menua bukai. Tang taja pia, ba maya ti diatu Aku deka begulai enggau sida di menua ti udah digagai sida.

¹⁷“Nya alai padahka ngagai sida utai ti disebut Aku TUHAN Allah Taala. Aku deka ngempuruka sida ari mayuh bengkah menua ti udah alai Aku ngachirka sida, lalu Aku deka meri menua Israel tu pulai baru ngagai sida.

¹⁸Lebuh sida pulai baru ngagai menua tu, sida enda tau enda muai semua engkeramba ti kamah, ti jai, ti ditemu sida.

¹⁹ Aku deka meri sida ati ti baru, enggau runding ti baru. Aku deka muai ati sida ke keras baka batu, lalu meri sida ati ti ngasi.

²⁰Nya baru sida deka nitihka Adat Aku lalu ngasika jaku Aku enggau ati ti tetap. Sida deka nyadi nembiak Aku, lalu Aku deka nyadi Allah Taala sida.

²¹Tang Aku deka ngukum orang ke rindu nyembah engkeramba ti kamah sereta jai. Aku deka ngukum sida ketegal utai ti udah dikereja sida.” TUHAN Allah Taala udah bejaku.

²² Sida melikat cherub lalu belabuh terebai, lalu kaki kerita nya mupuk sama enggau sida. Penampak mulia Allah Taala ke disembah orang Israel beperenching ba atas sida.

²³Udah nya perenching mulia Allah Taala nya angkat ari nengeri nya, lalu mindah ngagai bukit ti di timur nengeri nya.

²⁴Dalam genera nya, Roh Allah Taala ngangkatka aku, lalu mai aku pulai baru ngagai orang ke udah dibuai ngagai menua Babilon. Udah nya genera nya lalu ayas-seayas lalu lesap,

²⁵lalu aku madahka ngagai semua orang ke udah kena buai ngagai menua bukai, semua utai ti udah diayanka TUHAN ngagai aku.