Read Iban Esekiel 12 Bible Online

Esekiel 12 - Iban bible

Esekiel 12

¹Ku TUHAN bejaku ngagai aku,

² “Anak mensia, nuan diau begulai enggau orang ke seruran angkat ngelaban, ke bisi mata kena meda, tang enda meda, ke bisi pending, tang enda ninga, laban sida nya orang ke seruran angkat ngelaban.

³“Nya alai, anak mensia, sikap gari nuan baka orang ke tasah, lalu mupuk sebedau hari malam. Awakka semua orang meda nuan mupuk lalu mansang ngagai endur bukai. Nyangka ukur orang ke angkat ngelaban nya ulih meda nuan.[16]

⁴Lebuh hari agi siang, sikap gari ti deka dibai nuan, ngambika sida ulih meda nuan, lalu udah nya awakka sida ngemataka nuan mupuk lebuh lemai hari, indah-indah baka orang ke dibuai ngagai menua Babilon.

⁵Lebuh sida benung ngemataka nuan, bumbuska dinding rumah nuan, lalu bai tungkus gari nuan nengah lubang nya.

⁶Awakka sida meda nuan manggaika tungkus gari nuan nya ba bau nuan, lalu meda nuan bejalai nengah petang bepampul mata, ngambika nuan enda ulih meda tunga nuan bejalai. Utai ti dikereja nuan nya deka nyadika jaku tangkan ke orang Israel.”

⁷Aku lalu ngereja utai ti diasuh TUHAN. Ba hari nya aku nungkus gari aku baka orang ke tasah, lalu lemai nya, lebuh hari nyau deka petang, aku lalu ngerumbak lubang ba dinding ngena jari aku, lalu pansut. Lebuh semua orang benung ngemataka aku, aku manggaika tungkus gari aku ba bau aku, lalu mupuk.

⁸Pagi hari siti TUHAN bejaku ngagai aku.

⁹Ku Iya, “Anak mensia, lebuh orang Israel ke angkat ngelaban nya nanyaka utai ti dikereja nuan,

¹⁰padahka ngagai sida utai ti disebut Aku TUHAN Allah Taala ngagai sida. Pesan tu diungkupka anak raja ke megai perintah di Jerusalem, enggau ke semua orang ke diau dia.

¹¹Padahka ngagai sida, utai ti udah dikereja nuan nya nandaka utai ti deka nyadi ba sida - sida deka tasah sereta nyadi orang tangkap.

¹²Anak raja ke megai sida deka ngesan tungkus gari iya empu dalam petang, lalu rari nengah lubang ti dikerumbak sida ke iya ba dinding kuta. Iya deka mampul mata diri, lalu enda ulih meda tunga iya bejalai.

¹³ Tang Aku deka nan pukat kena ngipa iya. Udah nya Aku deka mai iya ngagai nengeri Babilon, alai iya deka mati, tang iya enda meda nengeri nya.

¹⁴Aku deka ngachirka ngagai semua endur semua bala orang ke gawa dalam istana iya, bala penyanding penemu iya, enggau bala orang ke nyaga iya, lalu orang deka ngiga sida lalu munuh sida.

¹⁵“Lebuh Aku ngachirka sida ba sebelah bansa bukai, enggau ngagai menua bukai, nya baru sida deka nemu Aku endang TUHAN.

¹⁶Aku deka nejuka sekeda sida idup lalu enda mati beperang, enda mati keberuran, enda mati sakit, ngambika lebuh sida di menua bukai, sida deka nemu penyai ti udah dikereja sida, lalu ngaku Aku tu TUHAN sida.”

¹⁷Ku TUHAN bejaku ngagai aku,

¹⁸“Anak mensia, awakka nuan getar-getar takut lebuh nuan makai, lalu getar-getar takut lebuh nuan ngirup.

¹⁹Padahka ngagai semua orang Israel, tu pesan TUHAN Allah Taala ke orang Jerusalem ti agi mengkang diau di menua sida: Sida deka getar-getar takut lebuh sida makai, lalu getar-getar takut lebuh sida ngirup. Semua utai deka dirampas magang ari menua sida, laban semua orang ke diau dia endang nadai beradat magang.

²⁰Nengeri ti penuh laban mensia diatu deka dirusak, lalu menua tu deka nyadi menua puang. Nya baru sida deka nemu Aku endang TUHAN.”

²¹Ku TUHAN bejaku ngagai aku,

²²“Anak mensia, nama kebuah orang Israel besebutka jaku-dalam ti munyi tu: ‘Timpuh udah ngelebus, tang utai ti dipadahka deka nyadi, nadai nyadi siti’?

²³Padahka ngagai sida diatu utai ti disebut Aku TUHAN Allah Taala pasal pekara nya. Aku deka madamka jaku-dalam nya. Jaku-dalam nya enda agi disebut orang di menua Israel. Maya endang udah datai, lalu utai ti dipadahka deka nyadi, deka dikamatka!

²⁴“Genera ti ditempaka ngapa enggau jaku benabi ti nesatka mensia, nadai agi ba orang Israel.

²⁵Aku ti TUHAN deka bejaku ngagai sida, lalu utai ti disebut Aku deka dikamatka. Aku enda betangguh agi. Lebuh kita ke angkat ngelaban tu agi mengkang idup, Aku deka ngereja utai ti udah dipadahka Aku ngagai kita. Aku udah bejaku,” ku TUHAN Allah Taala bejaku.

²⁶Ku TUHAN bejaku ngagai aku,

²⁷“Anak mensia, orang Israel ngumbai genera enggau jaku ti benabi ti disebut nuan nya pasal utai ti deka nyadi jauh jemah ila.

²⁸Nya alai padahka ngagai sida, utai ti disebut Aku TUHAN Allah Taala: Aku enda betangguh agi. Utai ti udah disebut Aku, deka dikamatka. Aku TUHAN Allah Taala udah bejaku!”