Read Iban Esekiel 13 Bible Online

Esekiel 13 - Iban bible

Esekiel 13

¹Ku TUHAN bejaku ngagai aku,

²“Anak mensia, nuan enda tau enda bejaku ngelaban bala nabi menua Israel ke benabi ngena penemu sida empu. Asuh sida mendingka jaku TUHAN.”

³Tu utai ti disebut TUHAN Allah Taala: “Tulah meh sida nabi ke beli! Sida bulih penemu ari runding sida empu, lalu ngaga genera ke diri empu.

⁴Orang Israel, bala nabi kita nadai guna, baka bala munsang ti diau ba sebelah tembawai nengeri.

⁵Sida enda nyaga endur alai kuta ti udah runtuh, lalu sida enda mega ngaga kuta nya baru. Nya alai menua Israel enda ulih dijaga lebuh perang nyadi ba Hari TUHAN.

⁶Genera sida bula, lalu jaku tujum sida mega bula. Sida ngumbai diri madahka pesan Aku, tang Aku nadai ngirumka sida. Tang taja pia, sida ngarapka jaku diri dikamatka!

⁷Aku madahka ngagai sida: genera ti dipeda kita nya pelesu magang, lalu jaku tujum kita nya jaku ti bula. Kita madahka jaku ti disebut kita nya jaku Aku, tang Aku nadai udah kala bejaku ngagai kita!”

⁸Nya alai TUHAN Allah Taala nyebut ngagai sida, “Jaku kita bula, lalu genera kita pelesu. Aku ngelaban kita.

⁹Aku deka ngukum kita nabi ke nusui genera ti pelesu, lalu bejaku nesatka orang. Kita tentu nadai dia lebuh bala nembiak Aku begempuru mutuska penemu ila. Nama kita enda dituliska dalam list nama orang Israel ti bukai. Kita enda agi pulai ngagai menua kita empu. Nya baru kita deka nemu Aku endang TUHAN Allah Taala.

¹⁰ “Sida nabi nya nesatka bala nembiak Aku lebuh sida madahka semua utai deka nyadi menyana magang. Tang nadai utai nyadi menyana! Bala nembiak Aku udah nirika kuta ngena batu. Udah nya bala nabi datai lalu ngechat kuta nya ngena kapu.

¹¹Padahka ngagai sida nabi, kuta sida deka runtuh. Aku deka ngasuh hari balat ujan. Ujan batu deka ninggang kuta nya, lalu ribut ti balat deka mangka ngagai iya.

¹²Kuta nya deka runtuh, lalu semua orang deka nanya ngagai nuan nama guna kapu ti dikena ngechat dinding kuta nya.”

¹³Nya alai tu utai ti disebut TUHAN Allah Taala: “Aku ringat, lalu Aku deka ngasuh ribut biaubalai, ujan ti lebat, enggau ujan batu ngerusak dinding kuta nya.

¹⁴Aku deka ngeruntuh lalu ngeredakka dinding kuta ti udah dichat burak, datai ke batu pemun iya ayan. Kita deka mati ditinggang dinding kuta nya rebah. Nya baru semua orang deka nemu Aku endang TUHAN.

¹⁵“Dinding kuta nya enggau sida ke udah ngechat iya deka ngasaika pengeringat Aku. Udah nya baru Aku deka madahka ngagai kita dinding kuta nya enggau orang ke ngechat iya, sama nadai agi, iya nya

¹⁶sida nabi ke madahka semua utai di Jerusalem deka nyadi menyana magang, taja pen utai dia enda nyadi menyana!” TUHAN Allah Taala udah bejaku.

¹⁷Ku TUHAN bejaku, “Anak mensia, perening ngagai sida indu ke begulai enggau kita, ti ngeluluka diri nemu benabika pasal utai ti deka nyadi jemah ila. Bejaku nuan ngelaban sida

¹⁸lalu padahka jaku ti disebut TUHAN Allah Taala ngagai sida: “Tulah meh kita ti indu ke begagaka gelang keramat ke semua orang, lalu kita ngaga tungguk keramat kena orang nudung pala ngambika sida bekuasa atas pengidup orang bukai. Kita keran deka bekuasa atas pengidup enggau pemati bala nembiak Aku, lalu kita ngena kuasa nya ngiga penguntung ke kita empu.

¹⁹Kita enda bebasaka Aku di mua bala nembiak Aku laban kita keran deka ngulihka segenggam barli enggau roti. Kita munuh orang ke enda patut diukum bunuh, lalu ngidupka orang ke enda patut diidupka. Kita madahka utai ti bula ngagai bala nembiak Aku, lalu sida arapka kita.”

²⁰Nya alai tu utai ti disebut TUHAN Allah Taala: “Aku begedika gelang keramat kita ke dikena kita ngulihka kuasa atas pengidup enggau pemati. Aku deka ngeruntun gelang keramat nya ari lengan kita, lalu ngelepaska orang ke dikuasa kita.

²¹Aku deka ngeruntun tudung pala kita, lalu ngelepaska bala nembiak Aku ari kuasa kita belama iya. Nya baru kita deka nemu Aku endang TUHAN.

²²“Ngena pemula kita, kita ngelemika semengat orang ke badas, orang ke enda diasuh Aku pedis. Kita nagang orang ke jai ngelengkaka penyai lalu ngidupka nyawa diri.

²³Nya alai, kita diatu nadai agi meda genera ti pelesu, nadai agi nyebut jaku tujum ti pelesu. Aku deka ngelepaska bala nembiak Aku ari jari kita. Nya baru kita deka nemu Aku endang TUHAN.”