Read Iban Esekiel 14 Bible Online

Esekiel 14 - Iban bible

Esekiel 14

¹Sekeda bala tuai orang Israel datai ngagai aku lalu nanyaka pasal peneka TUHAN:

²Udah nya TUHAN lalu bejaku ngagai aku.

³Ku Iya, “Anak mensia, orang tu udah nyerahka ati sida ngagai engkeramba, lalu nejuka engkeramba mai sida ngagai dosa. Kati nuan ngumbai Aku deka nyaut sida?

⁴“Bejaku ngagai sida diatu, lalu padahka ngagai sida utai ti disebut Aku TUHAN Allah Taala: Genap iku kita orang Israel ti udah nyerahka ati diri ngagai engkeramba, lalu nejuka sida mai kita ngagai dosa, lalu udah nya betanya ngagai nabi, deka disaut Aku magang - saut ti endang patut diberi ngagai bala engkeramba kita!

⁵Semua engkeramba nya udah ngelimpangka orang Israel ari Aku, tang ngena saut ari Aku, Aku ngarapka Diri ulih ngasuh sida taluk ngagai Aku baru.

⁶“Nya alai padahka ngagai orang Israel utai ti disebut Aku TUHAN Allah Taala: Kita enda tau enda nesal ati, lalu ninggalka engkeramba kita ke jai nya.

⁷“Genap kali kita orang Israel tauka orang bukai ti diau begulai enggau orang Israel, ngelengkaka Aku, lalu nyembah engkeramba, lalu udah nya betanya ngagai nabi, Aku ti TUHAN, deka nyaut kita!

⁸Aku deka ngelaban kita. Aku deka ngaga kita nyadika teladan kena ngajar orang bukai. Aku deka muai kita ari bala nembiak Aku, ngambika semua kita deka nemu Aku endang TUHAN.

⁹“Enti nabi kena tipu lalu meri saut ti bula, sida ngereja nya laban Aku ti TUHAN udah nipu sida, lalu Aku deka muai sida ari bansa orang Israel.

¹⁰Nabi enggau orang ke betanyaka utai ngagai sida, deka sebaka ukum.

¹¹Aku deka ngereja tu kena nagang orang Israel ninggalka Aku, lalu ngamahka diri ngena dosa. Sida deka nyadi nembiak Aku, lalu Aku deka nyadi Allah Taala sida.” TUHAN Allah Taala udah bejaku.

¹²Ku TUHAN bejaku ngagai aku,

¹³“Anak mensia, enti menua bedosa, lalu enda tetap ati ngagai Aku, Aku deka ngunjurka jari Aku lalu ngerusak penatai pemakai sida. Aku deka ngasuh lapar pungkang nyadi, lalu munuh mensia enggau jelu.

¹⁴Enti sema Noah, Danel,[17] enggau Jop bisi dia, pengelurus sida semina ulih ngidupka nyawa sida empu aja.” TUHAN Allah Taala udah bejaku.

¹⁵“Enti sema Aku ngasuh jelu babas munuh orang di nengeri nya, lalu ngasuh menua nya enda ulih ditengah mensia,

¹⁶lalu enti sema orang tiga iku nya diau dia - seagi-agi Aku tu TUHAN Allah Taala, Allah Taala ti idup - indah sida nya deh enda ulih ngidupka nyawa anak sida empu. Sida semina ulih ngidupka nyawa diri empu aja, lalu menua nya deka nyadi menua puang.

¹⁷“Enti sema Aku ngasuh perang nyadi di menua nya, lalu ngasuh senyata ti bisa ngeluska semua mensia enggau jelu,

¹⁸lalu enti sema orang tiga iku nya diau dia - seagi-agi Aku tu TUHAN Allah Taala, Allah Taala ti idup - sida tentu enda mega ulih ngidupka nyawa bala anak sida, tang semina ulih ngidupka nyawa sida empu aja.

¹⁹“Enti sema Aku ngasuh penyakit berampit di menua nya, lalu Aku ringat lalu ngambi mayuh nyawa, bebunuhka mensia enggau jelu,

²⁰lalu enti sema Noah, Danel, enggau Jop bisi dia - seagi-agi Aku tu TUHAN Allah Taala, Allah Taala ti idup - sida tentu enda ulih ngidupka nyawa anak sida empu. Pengelurus sida semina ulih ngidupka nyawa sida empu aja.”

²¹ Tu utai ti disebut TUHAN Allah Taala: “Aku deka ngasuh empat bengkah ukum ti pemadu jai, iya nya perang, lapar pungkang, jelu babas, enggau penyakit ngerusak mensia enggau jelu.

²²Enti sida agi idup lalu ulih ngidupka nyawa bala anak sida, peda gamal sida lebuh sida datai ngagai nuan. Peda nuan gaya penyai sida, ngambika nuan nemu, ukum ti diasuh Aku ninggang Jerusalem nya ukum ti endang patut diberi.

²³Nya baru nuan deka nemu Aku endang bisi kebuah ngereja semua utai nya.” TUHAN Allah Taala udah bejaku.