Read Iban Esekiel 15 Bible Online

Esekiel 15 - Iban bible

Esekiel 15

¹Ku TUHAN bejaku ngagai aku,

²“Anak mensia, baka ni ku batang anggur tau dibandingka enggau batang kayu? Nama pemanah dan anggur enti dibandingka enggau kayu ti dalam utan?

³Kati nuan ulih ngena dan anggur begagaka sebarang utai? Kati nuan ulih ngaga pengait ari iya kena ngantung utai?

⁴Kati utai nya semina manah kena menyadika api? Lalu lebuh puting iya udah diempa api, lalu batang ba tengah angus, kati nuan ulih ngaga utai ari nya?

⁵Sebedau iya ditunu, iya endang nadai guna. Lebuh iya udah diempa api lalu angus, iya lebih agi nadai guna.”

⁶Nya alai, tu utai ti disebut TUHAN Allah Taala: “Baka batang anggur ti diambi ari babas nyadika kayu api, baka nya meh Aku deka ngambi orang ke diau di Jerusalem

⁷lalu ngukum sida. Sida udah ulih ngerarika diri ari api, tang diatu api deka nganguska sida. Lebuh Aku ngukum sida, nya baru nuan deka nemu Aku endang TUHAN.

⁸Sida udah enda tetap ati ngagai Aku, nya kebuah Aku deka ngasuh menua tu nyadi menua puang.” TUHAN Allah Taala udah bejaku.