Read Iban Esekiel 17 Bible Online

Esekiel 17 - Iban bible

Esekiel 17

¹Ku TUHAN bejaku ngagai aku.

²“Anak mensia, padahka siti sempama ngagai orang Israel

³ngambika sida nemu utai ti disebut Aku TUHAN Allah Taala: Nyadi sekali bisi siku burung menaul ti besai bendar. Bulu iya manah amat, lalu sayap iya besai sereta ngerembai. Iya terebai ngagai Bukit Lebanon, lalu matahka puchuk kayu sidar siti.

⁴Puchuk kayu sidar nya lalu dibai iya ngagai menua ti alai orang bedagang, lalu diengkahka iya ba nengeri alai bala orang ke bedagang diau.

⁵Udah nya iya lalu ngambi anak kayu siti ari menua Israel, lalu nanam anak kayu nya ba tanah ti ami, alai ti seruran bisi ai kena iya tumbuh.

⁶Kayu nya tumbuh lalu nyadi batang anggur ti baruh sereta ngelekar ngagai semua endur. Dan iya tumbuh ke atas ngagai menaul nya, lalu urat iya ngunjam ke dalam tanah. Batang anggur nya penuh laban dan enggau daun.

⁷“Bisi siku agi menaul ti besai. Sayap iya besai, lalu bulu iya tebal. Batang anggur nya lalu ngasuh urat enggau daun iya tumbuh ngagai menaul nya, ngarapka menaul nya deka meri batang anggur nya mayuh agi ai ari ti bisi ba kebun nya.

⁸Tang batang anggur nya udah ditanam ba tanah ti ami, ti mayuh ai kena iya mansutka daun lalu bebuah, sereta nyadi batang anggur ti menyana.

⁹“Nya alai Aku TUHAN Allah Taala, nanya: Kati batang anggur nya deka idup lalu mansang? Kada enda menaul ti keterubah nya deka mabut batang anggur nya enggau semua urat iya, ngugurka buah iya, matahka dan iya, lalu nejuka dan nya layu. Aku enda ibuh begunaka pengering, tauka bansa ti kering, nyabut batang anggur nya.

¹⁰Lebuh iya ditanam, kati iya deka idup lalu tumbuh? Lebuh iya dipuputka ribut ari timur, kati iya enda layu ba endur alai iya ti tumbuh?

¹¹Ku TUHAN bejaku ngagai aku,

¹² “Tanya orang ke angkat ngelaban nya, enti sida nemu reti jaku sempama nya. Padahka ngagai sida, raja menua Babilon dulu menya udah datai di Jerusalem, lalu nabanka raja enggau bala pemesai iya ngagai menua Babilon.

¹³Iya nabanka siku orang ari ruang bilik raja, ngaga siti sempekat enggau orang nya, lalu mejalka iya besumpah deka taluk ngagai perintah Babilon. Iya nabanka orang ke tinggi pangkat nyadika gadai

¹⁴kena nagang bansa Judah angkat baru, enggau kena nentuka sempekat nya dititihka.

¹⁵Tang raja menua Judah angkat ngelaban, lalu ngasuh pengari mansang ngagai menua Ejip ngambi mayuh kuda enggau bala soldadu. Kati iya deka mujur? Kati iya enda kena ukum ketegal pengawa nya? Iya tetap diukum enti iya ngelanggar sempekat nya!

¹⁶Ku TUHAN Allah Taala bejaku, “Laban Aku tu Allah Taala ti idup, raja tu deka mati di menua Babilon, laban iya ngelanggar sumpah diri empu, enggau sempekat ti udah digaga iya enggau raja menua Babilon, ti udah nyiri iya nyadi raja.

¹⁷Indah bala soldadu raja menua Ejip ti kering deh enda ulih nulung iya ngelaban orang Babilon lebuh orang Babilon ngaga kuta tanah, lalu numbak parit ti dalam lalu munuh mayuh orang Judah.

¹⁸Iya ngelanggar sumpah diri enggau sempekat ti udah digaga iya empu. Iya ngereja semua utai nya, lalu enda ulih ngerarika diri.”

¹⁹Ku TUHAN Allah Taala bejaku, “Laban Aku tu Allah Taala ti idup, Aku deka ngukum iya laban iya ngelanggar sempekat ti disemaya deka dititihka iya ngena sumpah dalam nama Aku.

²⁰Aku deka nan jarin ti dikena orang ngasu, lalu nangkap iya. Aku deka nabanka iya ngagai menua Babilon, lalu ngukum iya dia, laban iya udah enda tetap ati ngagai Aku.

²¹Bala soldadu iya ke pemadu kering, deka mati beperang, lalu sida ke agi idup deka diachirka ngagai semua endur. Nya baru kita deka nemu Aku ti TUHAN, udah bejaku.”

²²Tu utai ti disebut TUHAN Allah Taala: “Aku deka ngambi puchuk kayu sidar ti tinggi lalu matahka kantuk iya. Aku deka nanam iya ba sigi bukit ti tinggi,

²³ba bukit ti di menua Israel ti pemadu tinggi. Iya deka mansutka dan, lalu mansutka leka lalu nyadi kayu sidar ti manah. Semua macham burung deka diau dia lalu belindung ba iya.

²⁴Semua kayu di menua nya deka nemu Aku tu endang TUHAN. Aku nebang kayu ti tinggi lalu ngasuh kayu ti mit mansang tinggi. Aku ngasuh kayu layu lalu ngasuh kayu ti layu nyadi gadung. Aku ti TUHAN udah bejaku. Aku deka ngereja utai ti udah disebut Aku.”