Read Iban Esekiel 18 Bible Online

Esekiel 18 - Iban bible

Esekiel 18

¹Ku TUHAN bejaku ngagai aku,

² “Nama reti jaku-dalam tu ti selalu disebut orang di menua Israel? ‘Apai indai makai buah anggur ti masam, tang bala anak ke ngasaika nyawa diri masam.’

³Ku TUHAN Allah Taala bejaku, “Laban Aku tu Allah Taala ti idup, kita enda tau agi besebutka jaku-dalam nya di menua Israel.

⁴Seput semua orang, seput apai indai enggau seput anak endang enggi Aku. Semina orang ke bedosa aja ti deka mati.

⁵“Enti sema orang siku lurus lalu ngereja utai ti beradat sereta ngena.

⁶Iya enda nyembah engkeramba orang Israel tauka makai piring ti diberi ba rumah alai nyembah engkeramba. Iya enda nguji ngulihka bini orang, tauka beleman enggau indu ke benung datai kain.

⁷Iya enda nekanka pengidup orang, tang mulaika gadai orang ke nginjau duit ari iya, enda ngerumpak utai orang, meri roti ngagai orang ke lapar, lalu meri gari ngagai orang ke telanjai.

⁸Iya ukai ngiga untung lebuh iya nyali orang duit. Iya enggai ngereja penyai, lalu iya meri pemutus penemu ti betul lebuh iya ngatur laya orang.

⁹ Iya ngasika pesan Aku, lalu bejimat nitihka Adat Aku. Nya meh orang ke lurus, lalu iya deka idup,” ku TUHAN Allah Taala bejaku.

¹⁰“Enti sema orang nya bisi anak lelaki ke mangah sereta munuh orang

¹¹lalu ngereja utai ti jai nya (taja pen apai iya nadai ngereja utai nya), makai piring ti udah diberi ba endur alai nyembah engkeramba, nguji ngulihka bini orang,

¹²nekanka pengidup orang ke seranta, ngerumpak orang, enggai mulaika gadai ti dikena orang nginjau duit ari iya, nyembah engkeramba, ngereja penyai,

¹³ngiga untung lebuh iya nyali duit ngagai orang: kati orang nya deka idup? Enda. Iya enda ulih idup. Iya udah ngereja semua utai ti jai nya. Nya alai iya tetap deka mati. Iya empu deka betanggungjawapka pemati diri.

¹⁴“Tang enti orang nya bisi anak lelaki ke meda semua dosa ti dikereja apai iya, lalu iya berunding lalu enda nunda penyalah apai iya,

¹⁵enda nyembah engkeramba ti disembah orang Israel, tauka makai piring ti diberi ba endur alai nyembah engkeramba, enda nguji ngulihka bini orang,

¹⁶enda nekanka pengidup orang, enda ngerumpak orang, enda minta gadai ari orang ke nginjau duit, enda ngerumpak orang, tang meri roti ngagai orang ke lapar, lalu meri gari ngagai orang ke telanjai,

¹⁷enggai ngereja penyai, enda ngiga untung lebuh iya nyali duit ngagai orang, nitihka Adat Aku, lalu ngasika pesan Aku, iya enda mati ketegal dosa apai iya. Iya tetap deka idup.

¹⁸Tang pasal apai iya empu, laban iya nipu sereta ngerumpak, lalu ngereja penyai ngagai orang, iya deka mati ketegal penyai iya.

¹⁹“Tang kita nanya, ‘Nama kebuah anak enda kena perinsa ketegal penyai ti dikereja apai iya?’ Saut iya baka tu: Lebuh anak ngereja utai ti ngena sereta manah, lalu bejimat ngasi sereta nitihka Adat Aku, iya tetap deka idup.

²⁰ Orang ke bedosa deka mati. Anak enda tau kena perinsa ketegal penyai ti dikereja apai iya, lalu apai pen enda mega tau kena perinsa ketegal penyai ti dikereja anak iya. Orang ke manah deka diberi upah ketegal sida ngereja utai ti manah, lalu orang ke jai deka kena perinsa ketegal penyai ti dikereja sida.

²¹“Enti orang ke jai badu agi bedosa, lalu ngasika Adat Aku, enti iya ngereja utai ti ngena sereta manah, iya enda mati. Iya tetap deka idup.

²²Semua dosa iya deka diampun magang, lalu iya deka idup, laban iya ngereja utai ti ngena.

²³Kati nuan ngumbai Aku gaga meda orang ke jai mati?’ ku TUHAN Allah Taala nanya. “Enda! Aku rindu agi meda sida nesal ati lalu idup.

²⁴“Tang enti orang ke lurus badu agi ngereja utai ti manah, lalu belabuh ngereja semua utai ti jai, baka ke dikereja orang ke jai, kati iya deka majak idup? Enda! Nadai siti utai ti manah ti udah dikereja iya deka dikingatka. Iya deka mati laban iya enda tetap ati ngagai Aku, enggau laban dosa iya.

²⁵“Tang ku nuan, ‘Utai ti dikereja TUHAN nya salah.’ Pendingka Aku, kita orang Israel. Kati kita ngumbai Aku ngereja utai ngena jalai ti salah? Jalai kita ke salah.

²⁶Lebuh orang ke lurus badu agi ngereja utai ti manah, lalu belabuh ngereja penyai, lalu udah nya iya mati, iya mati laban penyai ti udah dikereja iya.

²⁷Lebuh orang badu agi bedosa, lalu ngereja utai ti ngena sereta manah, iya ngidupka nyawa diri.

²⁸Iya nemu utai ti dikereja diri, lalu badu agi bedosa. Nya alai iya tetap enda mati, tang deka idup.

²⁹Lalu ku kita orang Israel, ‘Utai ti dikereja TUHAN nya salah.’ Kati kita ngumbai jalai Aku salah? Jalai kita ke salah.

³⁰“Diatu Aku TUHAN Allah Taala, madahka ngagai kita orang Israel, Aku deka ngakim genap iku kita nitihka utai ti udah dikereja kita. Lengkaka semua penyai ti benung dikereja kita diatu, lalu anang nejuka dosa ngerusak kita.

³¹Lengkaka semua penyai ti benung dikereja kita, lalu awakka runding enggau ati kita digaga nyadi baru. Nama kebuah kita orang Israel deka mati?

³² Aku enggai meda orang mati,” ku TUHAN Allah Taala bejaku. “Nesal ati ke dosa kita, lalu idup.”