Read Iban Esekiel 19 Bible Online

Esekiel 19 - Iban bible

Esekiel 19

¹TUHAN ngasuh aku nyanyi lagu tusah ati tu ke dua iku anak raja menua Israel:

²Indai nuan baka indu singa! Iya nginang anak iya ba raban singa lelaki ti mangah.

³Indu singa nya nginang anak iya, lalu anak iya mansang besai, belajar ngulihka pemakai, lalu bepakaika mensia.

⁴Semua bansa ninga pasal iya lalu ngaga lubang kebung kena ngulihka iya. Sida ngirit iya ngagai menua Ejip ngena pengait.

⁵Indu singa nya nganti nyentuk ngagai maya iya nadai utai dikarapka agi. Udah nya iya nginang siku agi anak iya, lalu anak iya nya mansang besai lalu nyadi singa ti mangah.

⁶Lebuh iya nyau udah besai tuai, iya ngasu enggau bala singa ti bukai, belajar ngasu lalu bepakaika mensia.

⁷Iya ngeruntuhka kuta, lalu ngaga nengeri nyadi tembawai. Orang di menua nya balat takut genap kali iya negung.

⁸Semua bansa ngelaban iya ari semua menua ti ngelingi iya. Sida mintarka jarin sida atas iya; iya udah labuh ngagai lubang kebung sida.

⁹Sida ngena pengait nyimpan iya dalam sangkar lalu mai iya ngagai raja menua Babilon. Sida nutup iya, ngambika nyawa iya nadai agi didinga ba sebelah bukit ti di menua Israel.

¹⁰Indai nuan baka batang anggur ti ditanam semak sungai. Laban ai dia mayuh, anggur nya lebat laban daun enggau buah.

¹¹Dan iya kering lalu tumbuh nyadi tungkat diraja. Batang anggur nya tumbuh tinggi nyentuk ngagai remang, lalu semua orang meda pemayuh daun enggau peninggi iya.

¹²Tang jari orang ke ringat nyabut iya kenyau ari urat lalu ngempaska iya ke tanah. Ribut ari timur ngerangkaika buah iya. Dan iya patah. Dan iya rangkai lalu ditunu.

¹³Diatu anggur nya ditanam di menua puang, di menua ti rangkai nadai ai.

¹⁴Batang anggur nya diempa api. Api nganguska dan enggau buah iya. Dan iya enda ulih nyadi kering baru, enda agi nyadi tungkat diraja. Tu lagu tusah ati. Lagu tu udah selalu dinyanyi.