Read Iban Esekiel 21 Bible Online

Esekiel 21 - Iban bible

Esekiel 21

¹Ku TUHAN bejaku ngagai aku,

²“Anak mensia, alai nuan bejaku ngelaban Jerusalem enggau ngelaban endur alai orang mayuh besembah. Benabi nuan ngelaban menua Israel

³lalu sebut ngagai menua nya: ‘Ku TUHAN bejaku: Aku deka ngelaban kita. Aku deka nyintak pedang Aku lalu munuh ari semua kita, nemuka kita manah tauka jai.

⁴Aku deka ngena pedang Aku ngelaban semua orang kenyau ari selatan nyentuk ke utara.

⁵Semua orang deka nemu Aku ti TUHAN udah nyintak pedang Aku, lalu Aku enggai nyelitka pedang nya baru.’

⁶“Anak mensia, bedemuh meh nuan, baka ke tusah ati. Bedemuh tusah ati ba endur alai semua orang ulih meda nuan.

⁷Lebuh sida nanyaka kebuah nuan bedemuh, padahka ngagai sida, nuan bedemuh laban berita ti deka datai. Lebuh sida nerima berita nya, sida deka takut, lembut tulang, enda berani agi, lalu patung sida deka getar-getar. Maya udah datai. Tu meh maya iya.” TUHAN Allah Taala udah bejaku.

⁸Ku TUHAN bejaku ngagai aku,

⁹“Anak mensia, benabi nuan. Padahka ngagai orang mayuh utai ti disebut Aku ti TUHAN munyi tu: ‘Siti pedang, pedang ti udah diansah sereta dipugar.

¹⁰Pedang nya diansah kena munuh mensia, dipugar ngambika iya bekilap baka kilat. Orang mayuh enda tau rami gaga, laban bala nembiak Aku enggai ibuhka semua jaku tangkan enggau ukum.

¹¹Pedang nya benung dipugar, ngambika iya sedia tau dikena. Iya diansah sereta dipugar, lalu disuaka ngagai jari orang ke pemunuh.

¹²Nyabak duie-duie meh nuan, anak mensia, laban pedang nya ngelaban bala nembiak Aku, ngelaban semua bala tuai orang Israel. Sida deka ditikauka ngagai pedang sama enggau bala nembiak Aku. Pandam meh dada kita laban kita tusah ati!

¹³Aku nguji bala nembiak Aku, lalu enti sida enggai nesal ati, semua utai tu deka nyadi ba sida.’

¹⁴“Nya alai, anak mensia benabi meh nuan diatu. Tempapka jari nuan, lalu pedang nya deka mantap enda ngetu-ngetu. Iya nya pedang ti munuh, pedang ti ngenakut, enggau pedang ti nyayat.

¹⁵Iya ngasuh bala nembiak Aku lemi semengat lalu rebah. Aku ngemba nengeri sida ngena pedang ti bekilap ti sedia deka munuh.

¹⁶Pantap ke kanan enggau ke kiba, nuan pedang ti tajam! Pantap genap kali nuan bepusin.

¹⁷Aku deka mega nempapka jari Aku, lalu badu agi ringat. Aku ti TUHAN udah bejaku.”

¹⁸Ku TUHAN bejaku ngagai aku,

¹⁹“Anak mensia, dirika papan tanda ba dua iti jalai raya ti deka ditengah raja menua Babilon datai mai pedang iya. Jalai dua iti nya berengkah ba siti menua aja. Dirika papan tanda ba simpang jalai dua iti nya.

²⁰Siti papan tanda nunjukka jalai ngagai nengeri Rabah di menua orang Amon, lalu siti nunjukka jalai ngagai menua Judah, ngagai nengeri Jerusalem ti bekuta.

²¹Raja menua Babilon deka bediri ngimbai papan tanda ba simpang jalai raya nya, lalu ngusak laja[23] kena iya nujum bagi jalai ti deka ditengah iya. Iya betanya ngagai bala engkeramba iya. Iya betilitka nasit ba atau jelu ti diberi nyadika piring.

²²Jari kanan iya megai laja ti udah ditulis enggau nama ‘Jerusalem’! Laja nya madahka iya patut mupuk lalu ngaga utai kena ngentung pintu kuta, ngasuh iya nyerang enggau panjung, ngengkahka utai ti dikena ngentung pintu kuta nya di mua pintu kuta, ngaga kuta tanah, sereta numbak parit ti dalam.

²³Tang orang Jerusalem enda arapka diri deka diserang laban sida udah ngaga sempekat enggau orang Babilon. Tang tujum nya ngasuh sida ingatka dosa sida, sereta nangkan sida madahka sida deka ditangkap.

²⁴Nya alai, tu meh utai ti disebut Aku TUHAN Allah Taala: Dosa kita ayan. Semua orang nemu pemesai penyalah kita. Kita ngayanka dosa kita ba semua utai ti dikereja kita. Kita deka diukum, lalu Aku deka nyerahka kita ngagai bala munsuh kita.

²⁵“Nuan ti nadai guna, ti jai, ke merintah menua Israel, maya nuan udah datai, maya nuan nerima ukum ti penudi.

²⁶Ku TUHAN Allah Taala bejaku: Buai labung, ingkaska makota; Semua utai enda tau enda diubah magang. Angkatka orang ke seranta, turunka pangkat orang ke tinggi pangkat!

²⁷Tembawai! Tembawai! Tembawai! Aku deka ngaga nengeri nya nyadi tembawai. Tang utai tu apin nyadi sebedau orang siku ke diasuh Aku ngukum nengeri nya datai. Aku deka nyerahka nengeri nya ngagai iya.

²⁸ “Anak mensia, benabi meh nuan, lalu sebut: Ku TUHAN Allah Taala bejakuka pasal orang Amon ke mechat orang Israel: Siti pedang sedia deka ngerusak, udah diansah lalu bekilat, sedia deka munuh.

²⁹Kita orang Amon meda genera ti pelesu, lalu jaku tujum kita bula magang. Kita tu orang ke jai, lalu timpuh kita nyau deka datai, maya kita deka diukum ke penudi iya. Pedang nya deka mumpung pala kita.

³⁰Selitka pedang! Aku deka ngakim kita ba endur alai kita digaga, di menua alai kita ada.

³¹Kita deka ngasaika pengeringat Aku lebuh Aku mubuhka pengeringat Aku ngagai kita baka api ti mau. Lalu Aku deka nyerahka kita ngagai orang ke mangah, ti landik ngerusak.

³²Kita deka dirusak ngena api. Darah kita deka tepambur di menua kita empu, lalu nadai orang deka ingatka kita agi.’ ” TUHAN udah bejaku.