Read Iban Esekiel 22 Bible Online

Esekiel 22 - Iban bible

Esekiel 22

¹Ku TUHAN bejaku ngagai aku,

²“Anak mensia, kati nuan sedia deka ngakim nengeri ti penuh laban pemunuh tu? Padahka ngagai nengeri nya semua penyai ti udah dikereja iya.

³Sebut munyi tu: Ku TUHAN Allah Taala bejaku: O nengeri, nuan udah munuh mayuh amat nembiak nuan empu. Nuan udah ngamahka diri begaga lalu besembahka engkeramba. Maya nuan udah datai.

⁴Nuan udah salah laban nuan munuh orang, lalu nuan kamah laban engkeramba ti udah digaga nuan. Nya alai nuan empu udah ngasuh timpuh datai semak. Timpuh nuan udah datai! Nya alai Aku udah ngemaluka nuan di mua semua bansa ngambika nuan dikeleseka semua menua.

⁵Menua ti semak enggau ti jauh ngeleseka nuan, nuan ti jai, ke penuh laban pengachau.

⁶Semua bala tuai orang Israel ti diau dalam nuan, genap iku orang ke bekuasa, sigi keran deka munuh orang.

⁷ Apai indai ti diau dalam nuan, nadai dibasa siku; orang kampar ti diau dalam nuan, abis kena tipu; orang ke patu balu ti diau dalam nuan, abis diperinsa.

⁸ Nuan udah ngeleseka utai Aku ti kudus, lalu ngamahka Hari Sabat Aku.

⁹Sekeda orang ke diau dalam nuan bejaku bula pasal orang bukai, ngambika sida dibunuh. Sekeda sida makai piring ti diberi ngagai engkeramba. Sekeda endang seruran nurutka pengingin tubuh diri.

¹⁰ Sekeda tinduk enggau bini apai sida. Sekeda mejalka indu ke benung datai kain beleman enggau sida.

¹¹Sekeda butang, lalu sekeda nguji ngulihka tubuh menantu indu tauka menyadi-tiri sida empu.

¹² Sekeda sida makai gaji bebunuhka orang. Sekeda minta bungai duit ti dijali ngagai diri sama diri ke sama bansa orang Israel, lalu bulih pengaya ketegal ngambi ulih ba sida. Sida enda ingatka Aku.” TUHAN Allah Taala udah bejaku.

¹³Aku deka ngerusak pengawa nuan ti ngerumpak, enggau bebunuhka orang.

¹⁴Kati nuan ngumbai diri agi berani tauka agi bisi pengering ngedarka jari diri lebuh Aku udah tembu ngukum nuan? Aku ti TUHAN udah bejaku, lalu Aku deka ngamatka jaku Aku.

¹⁵Aku deka ngachirka bala nembiak nuan ngagai semua menua enggau bansa, lalu Aku deka muai semua pengamah ari nuan.

¹⁶Lalu ketegal penyai kita semua bansa deka ngeleseka Aku. Nya baru kita deka nemu Aku endang TUHAN.’ ”

¹⁷Ku TUHAN bejaku ngagai aku,

¹⁸“Anak mensia, Aku enda begunaka orang Israel. Sida tu baka tai besi - engkeraju, tin, besi, enggau bangkang - utai ti tinggal lebuh pirak udah dituchi ngena api.

¹⁹Nya alai, ku TUHAN ti Allah Taala bejaku: Laban semua kita udah nyadi tai besi magang, Aku deka ngempuruka semua kita di Jerusalem

²⁰baka ke ngempuruka batu ti ngundan pirak, engkeraju, besi, bangkang enggau tin lalu ngeluluhka sida dalam api. Baka nya meh Aku deka ngempuru lalu ngeluluhka kita ngena api laban Aku ringat pedis ati ngagai kita.

²¹Aku deka ngempuruka kita lalu ngesuhka api pengeringat Aku ngagai kita, lalu ngeluluhka kita dalam api nya.

²²Baka ti ngeluluhka pirak, baka nya meh kita deka luluh dalam api pengeringat Aku. Nya baru kita deka nemu Aku ti TUHAN udah mubuhka pengeringat Aku ngagai kita.”

²³Ku TUHAN bejaku ngagai aku baru,

²⁴“Anak mensia, padahka ngagai orang Israel, menua sida enda kudus, lalu Aku deka ngukum menua tu laban Aku ringat.

²⁵Bala tuai menua tu baka singa ti nerekam jelu lalu negung. Bala tuai tu munuh orang, ngerampas semua duit enggau reta tengkira orang, lalu ngaga mayuh sida ke nyadi balu.

²⁶ Bala imam ngelanggar Adat Aku, lalu enda bebasaka utai Aku ti kudus. Sida enda ngaga bida entara utai ti kudus enggau utai ti enda kudus. Sida enda ngajar orang pasal bida entara utai ti tuchi enggau ti enda tuchi, lalu sida enda bebasaka Hari Sabat Aku. Sida enda bebasaka Aku.

²⁷Bala pemesai perintah nyau baka ukui kampung ti becharikka jelu. Sida bebunuhka orang laban sida deka nyadi kaya.

²⁸Bala nabi udah ngelalaika dosa tu baka orang ke ngechat dinding. Sida meda genera ti pelesu, lalu madahka utai ti bula. Ku sida, “TUHAN Allah Taala udah bejaku munyi tu,” tang iya ti bendar, TUHAN nadai udah bejaku.

²⁹Orang di menua tu udah nipu sereta ngerumpak pangan diri lalu butang. Sida udah nekanka pengidup orang ke seranta, enggau orang ke suntuk, lalu udah ngambi ulih ba orang bansa bukai.

³⁰Aku begigaka orang ke nemu ngaga dinding kuta, ke ulih bediri ba endur alai kuta udah runtuh, lalu nyaga menua, ngambika Aku enda ngerusak nengeri tu lebuh Aku ringat, tang Aku nadai tetemuka orang ke baka nya.

³¹Nya alai Aku udah ringat ngagai sida. Aku udah ngerusak sida ngena api pengeringat Aku, ketegal penyalah sida.” TUHAN Allah Taala udah bejaku.