Read Iban Esekiel 23 Bible Online

Esekiel 23 - Iban bible

Esekiel 23

²“Anak mensia, nyadi sekali bisi dua iku indu diri menyadi ke sama saum indai.

³Lebuh seduai iya agi biak, diau di menua Ejip, seduai iya tetemuka lelaki lalu nyadi indu sundal.

⁴Iya ke tuai agi benama Oholah[24] (Iya ngelambangka menua Samaria), lalu iya ke biak agi benama Oholibah[25] (Iya ngelambangka Jerusalem). Aku jadi enggau seduai iya, lalu seduai iya beranak.

⁵Taja pen Oholiah endang enggi Aku, tang iya majak nyadi indu sundal, lalu seruran inginka bala ambai iya ari menua Asiria.

⁶Sida nya bala soldadu ke ngena pekayan ti ungu, bala orang ke tampak nama, enggau bala pemesai soldadu ti tinggi pangkat. Semua sida nya pemesai soldadu ke nepan kuda magang lalu sida sigat gamal.

⁷Oholiah nyundalka diri ngagai semua pemesai orang Asiria, lalu pengingin iya ti deka beleman ngujungka iya ngamahka diri besembahka engkeramba orang Asiria.

⁸Oholiah majak nyundal baka ke udah dikereja iya di menua Ejip, alai iya ke terubah meri tubuh diri ngagai lelaki. Kenyau ari maya iya agi biak, lelaki tinduk enggau iya, lalu ngaga iya baka indu sundal.

⁹Nya alai Aku nyerahka iya ngagai bala ambai iya ari menua Asiria, ke balat dikerinduka iya.

¹⁰Sida nelanjaika iya, nangkap bala anak lelaki enggau anak indu iya, lalu munuh iya ngena pedang. Sida ke indu di semua endur berandauka pasal pemati iya.

¹¹“Menyadi indu iya Oholibah meda utai nya, tang iya lebih balat agi nyundal ari Oholah.

¹²Oholibah mega balat keran deka beleman enggau orang Asiria ti tinggi pangkat enggau bala pemesai soldadu - soldadu ke ngena senyata perang - enggau bala pemesai ke nepan kuda, semua sida ke agi biak sereta sigat gamal.

¹³Aku meda Oholibah endang ngereja pengawa ti kamah baka aka iya Oholah.

¹⁴“Makin lama, makin balat agi ga Oholibah ngamahka pendiau diri. Iya balat amat tetarit ati deka meda gambar bala pemesai orang Babilon ti ditebuk ba batu, lalu dichat mirah, punggung dibelit enggau selampai lalu pala sida dibalut labung.

¹⁵

¹⁶Lebuh Oholibah meda sida, iya balat keran deka beleman enggau sida, lalu iya ngasuh bala seruan betemu enggau sida di menua Babilon.

¹⁷Orang Babilon datai lalu beleman enggau iya. Sida ngayahka tubuh iya, lalu balat amat ngamahka iya datai ke nyau kejika sida.

¹⁸Iya ngayanka tubuh diri di mua orang mayuh, lalu ngasuh orang nemu iya endang sundal. Aku kejika iya baka Aku ke kejika menyadi iya Oholah.

¹⁹Oholibah majak balat agi nyundal ari ti udah, ngereja pengawa baka ke dikereja iya lebuh iya agi biak, lebuh iya nyadi indu sundal di menua Ejip.

²⁰Iya balat amat keran deka beleman enggau lelaki ke kanji baka keledai, tauka baka kuda ti lelaki.” (

²¹Oholibah, nuan bisi ati deka nandu kereja kamah ti udah dikereja nuan lebuh nuan agi biak di menua Ejip, alai orang lelaki ke bemain enggau tusu nuan, lalu nuan nyerahka tubuh nuan keterubah iya ngagai sida.)

²²“Nya alai, Oholibah, tu utai ti disebut Aku TUHAN Allah Taala ngagai nuan. Nuan nyau leju begulai enggau bala ambai nuan, tang Aku deka ngasuh sida ringat ngagai nuan, lalu ngasuh sida ngelulung nuan.

²³Aku deka mai semua orang Babilon enggau orang Kaldea, bala lelaki ari Pekot, Soa, enggau ari Koa, enggau semua orang Asiria datai. Aku deka ngempuruka semua orang ke tinggi pangkat, bala pemesai soldadu ke sigat gamal, semua bala tuai bukai, enggau bala pemesai soldadu ke nepan kuda.

²⁴Sida deka nyerang nuan ari utara, mai mayuh soldadu, kerita perang, enggau kerita ti dikena mai bekal. Belindung ngena terabai enggau selapuk kebal, sida deka ngelulung nuan. Aku deka nyerahka nuan ngagai sida, lalu sida deka ngakim nuan nitihka adat sida empu.

²⁵Laban Aku ringat ngagai nuan, Aku deka nejuka sida ringat lalu munuh nuan. Sida deka netak idung enggau pending nuan, lalu munuh bala anak nuan. Sida deka nabanka bala anak lelaki enggau bala anak indu nuan, lalu nunu sida idup-idup.

²⁶Sida deka ngeruntun gari ari tubuh nuan, lalu ngerampas perengka batu berega nuan.

²⁷Aku deka madamka pengingin nuan ke seruran deka beleman, enggau semua penyai ti udah dikereja nuan kenyau ari maya nuan di menua Ejip. Nuan enggai agi malik ngagai engkeramba, tauka berundingka menua Ejip.”

²⁸Tu utai ti disebut TUHAN Allah Taala: “Aku deka nyerahka nuan ngagai orang ke dipegedika sereta dikenggaika nuan.

²⁹Lalu laban sida begedika nuan, sida deka nabanka semua utai ti udah ulih nuan, lalu ninggalka nuan telanjai baka indu sundal. Pengingin nuan ti deka beleman, enggau pengawa nuan ke nyundal

³⁰udah nyungkak utai tu nyadi ba nuan. Nuan udah nyadi indu sundal ke semua bansa lalu udah ngamahka diri besembahka engkeramba sida.

³¹Nuan nitihka abi kaki menyadi nuan, nya alai, ketegal nya Aku deka meri mangkuk ukum ngagai nuan baka ke diberi Aku ngagai menyadi nuan.”

³²Ku TUHAN Allah Taala bejaku, “Nuan deka ngirup ari mangkuk menyadi nuan. Mangkuk nya besai sereta jebung. Semua orang deka ngelanyai sereta ketawaka nuan. Mangkuk nya penuh.

³³Mangkuk nya deka ngasuh nuan merinsa sereta mabuk, mangkuk penakut enggau pengerusak, mangkuk menyadi nuan Samaria.

³⁴Nuan deka ngirup ari mangkuk nya datai ke mangkuk nya rangkai, lalu ngena kerimpak mangkuk nya nuan deka ngurik tusu diri. Aku TUHAN Allah Taala, udah bejaku.”

³⁵Tu utai ti disebut TUHAN Allah Taala: “Laban nuan enda ingatka Aku, lalu ngemelakangka Aku, nuan deka merinsa ketegal pengingin nuan ti deka beleman, enggau ketegal nuan ke nyundal.”

³⁶Ku TUHAN bejaku ngagai aku, “Anak mensia, kati nuan sedia deka ngakim Oholiah seduai Oholibah? Padahka ngagai seduai iya empu penyai seduai iya.

³⁷Seduai iya udah butang sereta bebunuhka orang - butang enggau engkeramba sereta munuh bala anak mit ke diadaka seduai iya ke Aku. Seduai iya ngenjuk bala anak Aku nyadika piring ti diberi sida ngagai engkeramba sida.

³⁸Tang seduai iya ukai semina ngereja nya aja. Seduai iya udah mega ngamahka Rumah Aku, lalu ngelanggar Hari Sabat ti udah ditumbuhka Aku.

³⁹Ba hari seduai iya munuh bala anak Aku nyadika piring ti diberi sida ngagai engkeramba, nya mega hari seduai iya ngamahka Rumah Aku!

⁴⁰“Seduai iya enda ngetu-ngetu ngasuh bala seruan ngambi orang ke lelaki ari menua jauh datai, lalu sida datai. Seduai iya mandi, ngechat mata diri ngena linsu, lalu ngias diri ngena batu ti berega.

⁴¹Seduai iya duduk ba kerusi-panjai ti manah gaya, lalu di mua seduai iya diengkahka seduai iya siti mija ti penuh laban utai ti manah, nyengkaum menyan enggau minyak kana ti udah diberi Aku ngagai seduai iya.

⁴²Munyi nyawa orang ke ngelantangka diri bisi didinga, iya nya bala lelaki ke dibai ari menua puang. Sida lelaki nya ngerasukka gelang ba lengan indu dua iku nya, enggau makota ti manah gaya ba pala seduai iya.

⁴³Lalu ku Aku berunding dalam ati Diri: sida tu ngaga indu tu nyadi indu sundal, taja pen iya udah luya laban pengawa butang.

⁴⁴Sida seruran datai ngagai indu sundal dua iku nya, iya nya Oholah seduai Oholibah, indu ke kamah nya.

⁴⁵Orang ke lurus deka ngukum seduai iya, bedawaka seduai iya butang sereta bebunuhka orang, laban seduai iya endang butang lalu jari seduai iya dibalut darah.”

⁴⁶Tu utai ti disebut TUHAN Allah Taala: “Asuh bala orang ke enda beradat datai lalu ngemba sereta ngerumpak seduai iya.

⁴⁷Awakka bala orang nya nuku seduai iya ngena batu, lalu nyerang seduai iya ngena pedang, munuh bala anak seduai iya, lalu nunu rumah seduai iya.

⁴⁸Aku deka madamka semua pengawa ti kamah di serata menua tu, kena ngajar semua orang ke indu ngambika sida enda butang baka seduai iya.

⁴⁹Lalu Aku deka ngukum seduai menyadi, ketegal kereja kamah ti udah dikereja seduai iya, enggau ketegal dosa ti dikereja seduai iya ke besembahka engkeramba. Nya baru seduai iya deka nemu Aku endang TUHAN Allah Taala.”