Read Iban Esekiel 24 Bible Online

Esekiel 24 - Iban bible

Esekiel 24

¹Kena sepuluh hari bulan ti kesepuluh dalam taun ti kesemilan kami udah dibuai ngagai menua Babilon, TUHAN bejaku ngagai aku.

² Ku Iya, “Anak mensia, tuliska hari bulan sehari tu, laban sehari tu raja menua Babilon deka berengkah ngelulung nengeri Jerusalem.

³Padahka ngagai bala nembiak Aku ke angkat ngelaban tu siti sempama ti diberi Aku TUHAN Allah Taala ngagai sida: Tanggarka periuk lalu tuang ai ngagai periuk nya.

⁴Tabakka dagin ti pemadu manah, iya nya isi berang enggau kaki, lalu tabakka mega tulang ti manah.

⁵Pilih isi dagin bedus ti pemadu manah. Tugungka kayu api[26] di baruh periuk nya. Awakka ai nya melidih. Panduk tulang enggau dagin nya.”

⁶Tu utai ti disebut TUHAN Allah Taala: “Tulah meh nengeri ti penuh laban bala pemunuh nya! Nengeri nya baka periuk ti betegar, ti seruran kamah. Ambi kerat dagin nya siti-siti sekali ari periuk nya, datai ke nadai agi kerat dagin tinggal.

⁷Orang bisi bebunuhka orang di nengeri nya, tang darah nadai tepambur ke tanah lalu dilamun amau. Darah nya tepambur ba batu.

⁸Aku udah nejuka darah nya mengkang ba atas batu nya enda dilamun, ngambika iya ngangau minta Aku malas.”

⁹Tu utai ti disebut TUHAN Allah Taala: “Tulah meh nengeri ti penuh laban bala pemunuh nya! Aku Empu deka nugungka kayu api.

¹⁰Bai mayuh agi kayu! Tiup api nya! Panduk dagin nya! Panduk iya datai ke kuah iya langkang! Tunu tulang nya!

¹¹Tanggarka periuk temaga ti puang nya, lalu awakka iya nyau mirah chinang-chinang. Nya baru periuk nya deka nyadi tuchi baru, lebuh tegar iya udah angus,

¹²taja pen semua tegar nya enda ulih dibuai abis ngena api.[27]

¹³Jerusalem, pengawa nuan ti kanji, udah ngamahka nuan. Taja pen Aku nguji nuchi nuan, tang nuan agi mengkang kamah. Nuan enda ulih nyadi tuchi baru sebedau nuan ngasaika pengeringat Aku.

¹⁴Aku ti TUHAN udah bejaku. Maya deka datai alai Aku deka bekereja. Aku tetap deka ingatka dosa nuan, lalu enda sinu tauka kasihka nuan. Nuan deka diukum ketegal utai ti udah dikereja nuan.” TUHAN Allah Taala udah bejaku.

¹⁵Ku TUHAN bejaku ngagai aku,

¹⁶“Anak mensia, Aku deka nabanka siku orang ke balat dikerinduka nuan. Nuan enda tau mutap tauka nyabak, tauka bekeberai ai mata.

¹⁷Anang nyabak didinga orang. Anang ngelai diri ngulit lalu bejalai enda belabung tauka enda bekasut. Anang nambai mua nuan, tauka makai pemakai ti diempa orang ke ngulit.”

¹⁸Tumu pagi nya aku bejaku enggau orang. Lemai nya bini aku mati, lalu hari siti aku ngereja utai ti diasuh TUHAN.

¹⁹Orang lalu nanya aku, “Nama kebuah nuan baka tu?”

²⁰Aku lalu nyaut sida, “TUHAN udah bejaku ngagai aku, ngasuh aku

²¹madahka pesan tu ngagai kita orang Israel: Kita temegahka penegap Rumah Sembiang. Kita rindu meda pemanah gaya rumah nya, lalu kita rindu nemuai ngagai rumah nya, tang TUHAN deka ngamahka endur nya, lalu bala anak kita ke tinggal deka mati dibunuh ngena pedang.

²²Nya baru kita deka ngereja utai ti udah dikereja aku. Kita enda nambai mua diri, lalu enda mega makai pemakai ti diempa tukang sabak.

²³Pala kita dibalut labung, lalu kita bejalai bekasut. Kita enda mega ngulit tauka nyabak, tang kita deka tusah ati ke penyai kita lalu bedemuh mantaika serebana kita ngagai pangan diri.

²⁴Nya baru aku, Esekiel, deka nyadi tanda ke kita. Kita deka ngereja semua utai baka ke udah dikereja aku. Ku TUHAN bejaku, lebuh utai nya nyadi, nya baru kita deka nemu Aku endang TUHAN Allah Taala.”

²⁵Ku TUHAN bejaku, “Anak mensia, diatu Aku deka ngambi Rumah Sembiang ti dikemegahka, dikegagaka, dikerinduka sereta digusung sida. Lalu Aku deka nabanka bala anak lelaki enggau bala anak indu sida.

²⁶Ba hari Aku ngereja nya, sekeda sida ke ulih ngerarika diri ari pengerusak nya, deka datai lalu madahka ngagai nuan pasal utai nya.

²⁷Ba hari nya mega, nuan ulih bejaku baru, lalu nuan deka bejaku enggau sida. Nya meh jalai nuan deka nyadi teladan ke orang mayuh, lalu sida deka nemu Aku endang TUHAN.”