Read Iban Esekiel 25 Bible Online

Esekiel 25 - Iban bible

Esekiel 25

¹ Ku TUHAN bejaku ngagai aku,

²“Anak mensia, kuingka mua nuan tunga ngagai menua Amon, lalu benabi ngelaban sida.

³Asuh sida mendingka utai ti disebut Aku TUHAN Allah Taala: Kita gaga ati meda Rumah Aku kamah, meda menua Israel dirusak, meda orang Judah dibuai ngagai menua Babilon.

⁴Nya alai Aku deka ngasuh bansa ti datai ari menua puang ti di timur ngalahka kita. Sida deka nirika kem sida di menua kita. Sida deka makai buah kita lalu ngirup ai tusu kita.

⁵Aku deka ngubah nengeri Rabah nyadi padang rumput alai nginang jelu unta, lalu semua menua Amon deka nyadi endur alai nginang jelu bedus. Nya baru kita nemu Aku endang TUHAN.

⁶Ku TUHAN Allah Taala bejaku: Laban kita nempapka jari lalu ngentakka kaki kita laban kita gaga pedis ati ngagai menua Israel,

⁷nya alai Aku deka ngunjurka jari Aku ngelaban kita, lalu deka nyerahka kita ngagai bansa bukai ngambika sida ngerumpak kita. Aku deka ngerusak bansa kita abis lengis, ngambika kita nadai agi bansa, nadai agi menua. Aku deka ngerusak kita. Nya baru kita deka nemu Aku endang TUHAN.”

⁸ Ku TUHAN Allah Taala bejaku, “Laban Moap[28] udah bejaku ngumbai Judah sebaka enggau semua bansa bukai,

⁹Aku deka nejuka semua nengeri ti nyaga garis entara menua Moap diserang, nyengkaum nengeri ti pemadu manah, iya nya Bet-jesimot, Baal-meon, enggau Kiriataim.

¹⁰Aku deka ngasuh bansa ari menua puang ti di timur ngalahka Moap enggau Amon, ngambika Moap[29] nadai agi nyadi siti bansa.

¹¹Aku deka ngukum Moap. Nya baru sida deka nemu Aku endang TUHAN.”

¹² Ku TUHAN Allah Taala bejaku: Laban orang Edom balat amat malas orang Judah, ti ngujungka Edom ditinggang penyalah ti besai,

¹³nya alai ku TUHAN Allah Taala bejaku: Aku deka ngunjurka jari Aku ngelaban Edom, lalu munuh semua mensia enggau jelu di menua nya, lalu ngaga menua nya nyadi menua ti nadai orang nguan. Kenyau ari Teman nyentuk ngagai Dedan, semua mensia ti diau dia deka mati beperang.

¹⁴Aku deka malas Edom ngena jari nembiak Aku Israel, lalu sida deka ngereja utai di Edom nitihka pengeringat enggau pemedis ati Aku. Nya baru Edom deka nemu Aku udah malas iya, ku TUHAN Allah Taala bejaku.

¹⁵ Ku TUHAN Allah Taala bejaku: Laban orang Pilistin udah balat amat malas ngelaban munsuh lama sida, lalu ngerusak sida laban sida udu begedi,

¹⁶nya alai ku TUHAN Allah Taala bejaku, Aku deka ngunjurka jari Aku ngelaban orang Pilistin, ngeluska orang Keretit, lalu ngerusak semua mensia ti agi idup ba sebelah tebing tasik.

¹⁷Aku deka malas sida ngena ukum ti balat laban Aku pedis ati ngagai sida. Nya baru sida deka nemu Aku endang TUHAN.”