Read Iban Esekiel 26 Bible Online

Esekiel 26 - Iban bible

Esekiel 26

¹ Kena satu hari bulan[30] dalam taun ti kesebelas kami udah dibuai ngagai menua Babilon, TUHAN bejaku ngagai aku.

²Ku Iya, “Anak mensia, tu utai ti ngasuh orang ke diau di Tire rami gaga. Ku sida manjung, ‘Jerusalem udah anchur! Iya nadai agi kuasa bedagang! Iya enda agi ulih bepekit ngelaban kitai!’

³Nya alai ku TUHAN Allah Taala bejaku: Nengeri Tire, Aku ngelaban nuan. Aku deka ngasuh mayuh bengkah bansa nyerang nuan, lalu sida deka datai baka gelumbang.

⁴Sida deka ngerusak kuta nengeri nuan, lalu ngeruntuhka menara nuan. Aku deka ngikis lalu muai semua tanah ari nuan, lalu ninggalka semina batu aja.

⁵Batu nya, ti ba puak tasik nya, deka nyadi endur alai orang berikan nyembui pukat sida. Aku TUHAN Allah Taala udah bejaku. Semua bansa deka ngerumpak Tire,

⁶lalu ngena pedang sida, sida deka munuh orang ke diau di nengeri ti di menua nya. Nya baru sida deka nemu Aku endang TUHAN.”

⁷Laban ku TUHAN Allah Taala bejaku: Aku deka ngasuh raja ti pemadu kering ari utara, iya nya Raja Nebukadnesar menua Babilon, nyerang Tire. Iya deka datai mai mayuh bala soldadu, kuda, kerita perang enggau soldadu ke nepan kuda.

⁸Orang ke diau di nengeri ti mit di menua nya deka dibunuh iya ngena pedang. Iya deka numbak parit ti dalam, ngaga kuta tanah, lalu nusun terabai nyadika atap kena ngelaban nuan.

⁹Iya deka ngentung kuta kita ngena batang kayu lalu ngeruntuhka menara kita ngena kapak.

¹⁰Kuda iya amat mayuh datai ke abus ti tekebu laban kuda sida, deka malut kita. Munyi kuda ti narit kerita, enggau kerita perang deka ngasuh kuta kita berenyang, lebuh iya tama nengah pintu kuta nengeri ti udah bumbus.

¹¹Bala soldadu iya ke nepan kuda deka nyerang nengah jalai raya kita, munuh bala kita ngena pedang. Tiang besai kita deka rebah ke tanah.

¹²Sida deka ngerampas pengaya enggau barang kita. Sida deka ngeruntuhka dinding kita, lalu ngerubuh rumah kita ke manah. Sida deka ngambi batu, kayu ramu enggau semua rapuh rumah kita lalu muai utai nya ngagai tasik.

¹³ Aku deka madamka semua musik lagu nuan, lalu munyi belikan nuan nadai agi didinga.

¹⁴Aku deka ngaga nuan nyadi batu ti ngalan nadai utai mungkur, nyadika endur alai orang berikan nyembui pukat sida. Nuan enda digaga baru laban Aku TUHAN Allah Taala udah bejaku.”

¹⁵Ku TUHAN Allah Taala bejaku ngagai nengeri Tire: “Lebuh nuan alah, orang ke diau nisi tebing tasik deka takut ninga orang ke benung dibunuh nyerauh.

¹⁶ Semua raja ke merintah menua ti ba tebing tasik deka nurun ari kerusi diraja sida. Sida deka muka pekayan diraja enggau gari sida ke disulam, lalu getar-getar duduk ba tanah. Sida deka balat takut meda utai ti nyadi ba nuan, datai ke sida enda nemu badu begetar.

¹⁷Sida deka bepantun ngena leka sabak tu ke nuan: ‘Nengeri ti tebilang nya udah dirusak! Kapal iya udah karam di tasik. Orang ari nengeri nya udah bekuasa di tasik lalu udah ngenakutka semua orang ke diau ba tebing tasik.

¹⁸Tang diatu, lebuh iya alah, semua pulau begetar magang, lalu orang ba pulau nya tusah ati meda iya dirusak.’

¹⁹Laban ku TUHAN Allah Taala bejaku: “Aku deka ngaga nuan nyadi tembawai nengeri, lalu enda diuan mensia. Aku deka ngelamun nuan ngena ai tasik.

²⁰Udah nya Aku deka ngasurka nuan ngagai dunya pemati, ngagai orang ke udah idup dulu kelia, lalu Aku deka mejalka nuan diau ba dunya ti di baruh, ba tembawai ti mengkang belama iya, begulai enggau orang di dunya pemati, ngambika nuan enda diuan mensia, tauka bisi endur ba dunya orang ke idup.

²¹ Aku deka munuh nuan, lalu nuan deka abis lengis. Taja pen orang begigaka nuan, tang sida nadai agi tetemuka nuan, ku TUHAN Allah Taala bejaku.