Read Iban Esekiel 27 Bible Online

Esekiel 27 - Iban bible

Esekiel 27

¹Ku TUHAN bejaku ngagai aku,

²“Anak mensia, nyabak meh nuan ngena leka sabak kenang tu ke nengeri Tire,

³nengeri ti bediri ba tebing tasik, ti bedagang enggau orang ke diau ba semua tebing tasik. Padahka ngagai iya utai ti disebut TUHAN Allah Taala: “Tire, nuan temegahka pemajik gamal diri.

⁴Tasik nyadika rumah nuan. Tukang ngaga nuan baka kapal ti manah gaya.

⁵Sida ngaga nuan ari kayu saipris ti diambi ari Bukit Hermon Lalu ngaga tiang layar nuan ari kayu sidar ti diambi ari menua Lebanon.

⁶Sida ngambi kayu oak kena ngaga sengayuh. Sida ngaga geladak nuan ari kayu pain ti diambi ari pulau Saiprus lalu nyampak geladak nuan ngena gading.

⁷Layar nuan digaga ari linin, kain linin ti disulam di menua Ejip, ti nyamai dikelala ari jauh. Kajang nuan digaga ari kain ti pemadu manah, ari kain ungu ti dibeli ari pulau Saiprus.

⁸Orang ke bedayung ke nuan datai ari nengeri Sidon enggau Arbat. Orang ke nyadi kelasi nuan nya bala nuan empu ti landik belayar.

⁹Bala tukang ke ngaga kapal endang orang ke udah dilatih, ke datai ari Gebal. Bala kelasi ari semua kapal ti belayar di tasik bedagang dalam kedai nuan.

¹⁰“Bala soldadu ari menua Persia, Lidia, enggau ari Libia gawa nyadi soldadu nuan. Sida ngantung terabai enggau selapuk kebal sida dalam rumah soldadu nuan. Sida nya meh orang ke ngemuliaka nuan.

¹¹Soldadu ari Arbat nyaga kuta nuan, lalu bala soldadu ari Gamat nyaga menara nuan. Sida ngantung terabai sida ba dinding kuta nuan. Sida nya meh orang ke ngasuh nuan manah gaya.

¹²“Nuan bedagang di menua Spain lalu orang di menua nya meli barang nuan ngena pirak, besi, tin, enggau bangkang.

¹³Nuan bedagang di menua Gerika, Tubal, enggau Mesek, lalu nuan meli ulun, enggau perengka temaga ngena barang nuan.

¹⁴Nuan ngena barang nuan bebelika kuda kena gawa, kuda kena beperang, enggau keledai ari Bet Togarmah.

¹⁵Orang di Rot[31] bedagang enggau nuan. Orang ari mayuh bengkah menua ti ba tebing tasik meli barang nuan ngena gading, enggau kayu arang.

¹⁶Orang menua Siria meli barang enggau mayuh macham utai ti dikeluarka nuan. Sida meli barang nuan ngena batu samerut, kain ungu, kain ti disulam, kain linin ti alus, batu karang enggau batu delima.

¹⁷Judah enggau Israel meli barang nuan ngena gandum,[32] ai manyi, minyak kana, enggau rempah.

¹⁸Orang Damaskus meli barang nuan enggau utai ti dikeluarka nuan ngena wain ari Helbon, enggau bulu bedus ari Sahar.[33] Sida nyual besi tempa enggau rempah kena sida meli barang nuan.

²⁰Orang di Dedan meli barang nuan ngena kain ti dikena nyelap belakang kuda.

²¹Orang Arab enggau bala orang ke merintah di menua Kedar meli barang nuan ngena anak domba, bedus, enggau kambin.

²²Orang dagang ari Sheba enggau ari Ramah meli barang nuan ngena batu ti berega, emas enggau rempah ti pemadu manah.

²³Nengeri Haran, Kaneh, enggau Eden, bala orang dagang ari Sheba, ari nengeri Asur enggau Kilmat semua bedagang enggau nuan magang.

²⁴Sida nyual ngagai nuan kain ti manah, kain ungu, kain ti disulam, tikai perdani ti bechura mayuh macham, enggau tali ti chukup manah digaga.

²⁵ Barang nuan dibai ngena kapal ti besai. “Nuan baka kapal ti di tasik ti sarat laban barang ti berat.

²⁶Lebuh bala orang ke bedayung mai nuan ke tasik, ribut ari timur ngaramka nuan jauh ari tebing.

²⁷Semua barang ti dikena nuan bedagang, semua bala kelasi nuan, bala tukang kapal nuan enggau bala orang ke bedagang, genap iku soldadu ke nepan kapal nuan, mati magang di tasik lebuh kapal nuan karam.

²⁸Panjung bala kelasi ke nyau deka lemas ulih didinga ari tebing.

²⁹“Semua kapal diatu nyau ditinggalka orang, lalu semua kelasi udah niki ke tebing.

³⁰Semua sida balat amat ngulitka nuan, ngerabuka amau ngagai pala sida, lalu maringka diri ba amau.

³¹Sida ngukur pala sida ketegal nuan lalu begari ngena kain guni. Ati sida balat tusah lebuh sida nyabak.

³²Sida nyabakka nuan ngena leka sabak kenang tu: ‘Sapa ulih dibandingka enggau Tire, enggau Tire ti nadai bemunyi dalam tasik?

³³Lebuh barang nuan dibai ngagai menua tasik, nuan nyual semua utai ti dipeguna semua bansa. Bala raja nyadi kaya laban barang nuan ti berega.

³⁴Diatu nuan udah karam di tasik. Nuan udah tengelam ngagai buntut tasik. Barang nuan enggau semua orang ke bekereja ke nuan udah lesap sama enggau nuan ke dalam tasik.’

³⁵“Genap iku orang ke diau ba tebing tasik tekenyit ati magang ninga utai ti udah nyadi ba nuan. Indah bala raja sida deh takut, lalu mua sida tepuchat-kelat.

³⁶Nuan nyau nadai agi, lesap belama iya, lalu bala orang dagang di serata dunya bela takut magang enggai ke diri dituntung penusah baka nuan.”