Read Iban Esekiel 28 Bible Online

Esekiel 28 - Iban bible

Esekiel 28

¹Ku TUHAN bejaku ngagai aku,

²“Anak mensia, padahka ngagai raja menua Tire utai ti disebut Aku TUHAN Allah Taala ngagai iya: Nuan ngerigangka diri ngena penyumbung, lalu ngumbai diri petara. Kenu ku nuan, nuan duduk ba kerusi diraja baka petara, dikelingi tasik. Nuan nyangka ngaga diri nyadi petara, tang nuan ukai petara. Nuan semina mensia aja, ukai petara.

³Nuan ngumbai diri pintar agi ari Danel,[34] lalu ngumbai nadai utai ulih dilalaika ari nuan.

⁴Penemu-dalam nuan, enggau pengelandik nuan udah ngasuh nuan kaya laban reta emas enggau pirak.

⁵Nuan landik bedagang, lalu selalu bulih untung. Nuan temegahka pengaya diri!

⁶Nyadi diatu, tu utai ti disebut Aku TUHAN Allah Taala: Laban nuan ngumbai diri bepenemu-dalam baka petara,

⁷Aku deka ngasuh bala munsuh ti nadai pengasih, nyerang nuan. Sida deka ngerusak semua utai ti manah ti udah ulih nuan ngena pengelandik enggau penemu-dalam nuan.

⁸Sida deka munuh nuan, lalu muai bangkai nuan ngagai tasik

⁹Lebuh sida datai lalu munuh nuan, kati nuan agi deka majak ngumbai diri petara? Lebuh nuan betunga mua enggau orang ke deka munuh nuan, nya baru nuan deka nemu diri endang semina mensia aja, ukai petara.

¹⁰Nuan deka mati baka ukui ba jari orang bansa bukai ke enda arapka Allah Taala. Aku TUHAN Allah Taala udah bejaku.”

¹¹Ku TUHAN bejaku ngagai aku baru,

¹²“Esekiel, anak mensia, awakka nuan tusah ati ke utai ti deka nyadi ba raja menua Tire. Padahka ngagai iya munyi tu: Ku TUHAN Allah Taala bejaku: Nuan suba udah nyadi teladan ke utai ti pemadu manah. Nuan suba endang bepenemu-dalam sereta sigat!

¹³Nuan udah diau di menua Eden, kebun Allah Taala, lalu nuan udah ngias diri ngena semua macham batu ti berega: batu akek, batu intan, batu sebarajat, batu perusah, batu unam, batu asija, batu nilam, batu samerut, enggau batu berega ti mirah. Nuan bisi perengka emas, ti digagaka nuan lebuh nuan empu digaga.

¹⁴Aku udah ngengkahka siku melikat ba endur nya ngambika iya nyaga nuan. Nuan udah diau ba bukit Allah Taala ti kudus, lalu udah bejalai nujah kapar batu berega ti beperenching.

¹⁵Ulah nuan suba nadai jalai mantah kenyau ari maya nuan ditempa nyentuk ngagai maya nuan belabuh ngereja penyai.

¹⁶Lebuh nuan suba kiruh bejual-bebeli, nuan mangah, lalu nuan bedosa. Nya alai Aku muai nuan ari bukit Allah Taala ti kudus, lalu melikat ke nyaga nuan, muru nuan ari batu berega ti beperenching nya.

¹⁷Nuan udah temegahka penyigat gamal diri, lalu nama nuan ti tebilang ngasuh nuan ngulah diri baka orang ke beli. Ketegal nya Aku udah ngempaska nuan ke tanah, lalu nejuka nuan dia kena ngajar raja ti bukai.

¹⁸Nuan udah ngereja mayuh bengkah penyai lebuh nuan bejual-bebeli; nuan udah ngamahka endur alai nuan besembah. Nya alai Aku nyelup nuan ngena api lalu nunu nuan datai ke nuan retung nyadi amau, dipeda semua orang ke merening ngagai nuan.

¹⁹Semua orang ke nemu nuan balat geli meda nuan. Nuan nadai agi lalu deka lesap belama iya.”

²⁰ Ku TUHAN bejaku ngagai aku,

²¹“Anak mensia, perening tunga ngagai Sidon, lalu benabi ngelaban iya,

²²munyi tu: Ku TUHAN Allah Taala bejaku, ‘Aku ngelaban nuan, Sidon, lalu Aku deka bulih mulia ba tengah-tengah nuan. Orang ke dalam nuan deka nemu Aku endang TUHAN lebuh Aku ngukum nuan lalu mandangka pengudus Aku dalam nuan,

²³laban Aku deka ngasuh penyakit ninggang nuan, lalu ngasuh orang bebunuh ba jalai raya nuan, lalu orang deka rebah mati dibunuh ngena pedang munsuh ti nyerang lalu ngelulungka nuan. Nya baru nuan deka nemu Aku endang TUHAN.

²⁴Orang Israel enda agi diachuk duri orang bansa bukai ke ngelingi iya, ti udah ngeleseka iya. Nya baru sida deka nemu Aku endang TUHAN Allah Taala.”

²⁵Ku TUHAN Allah Taala bejaku: Lebuh Aku ngempuruka orang Israel ari semua menua ti udah alai Aku ngachirka sida, lalu ngayanka mulia Aku dalam sida, dipeda semua bansa, nya baru sida deka diau ngentapka diri di menua sida empu, menua ti udah diberi Aku ngagai nembiak Aku Jakop.

²⁶Sida deka diau likun dia, lalu deka nirika rumah, lalu numbuhka kebun anggur. Sida deka diau likun lebuh Aku ngukum semua orang ke berimbai pendiau enggau sida ke udah ngeleseka sida. Nya baru sida deka nemu Aku endang TUHAN Allah Taala sida.”