Read Iban Esekiel 29 Bible Online

Esekiel 29 - Iban bible

Esekiel 29

¹ Kena dua belas hari bulan ti kesepuluh dalam taun ti kesepuluh kami udah dibuai ngagai menua Babilon, TUHAN bejaku ngagai aku.

²Ku Iya, “Anak mensia, perening ngagai raja menua Ejip, lalu benabi ngelaban iya enggau ngelaban semua menua Ejip.

³Bejaku lalu sebut: Ku TUHAN Allah Taala bejaku: Aku ngelaban nuan, raja menua Ejip, naga ti besai ti meradai ba arus ai, ti ngumbai Sungai Nile nya enggi nuan, lalu ngumbai diri udah ngaga sungai nya.[35]

⁴Aku deka ngaitka ginti ba rang nuan, lalu ngasuh ikan ti dalam Sungai Nile lekat ba tisik nuan, lalu Aku deka narit nuan pansut ari sungai nya, sama enggau semua ikan ari sungai nuan ti lekat ba tisik nuan.

⁵Lalu Aku deka nikauka nuan ngagai menua puang, nuan enggau semua ikan nya ari sungai nuan. Nuan deka labuh ba menua puang lalu enda dikuburka, lalu bangkai nuan deka nyadika pemakai burung enggau jelu.

⁶ Nya baru semua orang ke diau di menua Ejip deka nemu Aku endang TUHAN. Laban nuan endang tungkat buluh orang Israel,

⁷lebuh sida megai nuan ngena jari sida, nuan patah, lalu ngachuk kechiak sida, lalu lebuh sida bekering ba nuan, nuan patah, lalu ngasuh punggung sida begetar.[36]

⁸Nya alai ku TUHAN Allah Taala bejaku: Aku deka ngasuh pedang mantap nuan, lalu deka ngetas ari nuan mensia enggau jelu,

⁹lalu menua Ejip deka nyadi menua ti nadai orang nguan sereta kusi. Nya baru sida deka nemu Aku endang TUHAN. Laban nuan udah ngumbai Nile nya sungai nuan, lalu nuan ngumbai diri udah ngaga iya,

¹⁰nya alai Aku deka ngelaban nuan sereta ngelaban sungai nuan, lalu Aku deka ngaga menua Ejip kusi sereta nadai orang nguan, kenyau ari Mikdol nyentuk ngagai Syene, terus ngagai garis entara menua enggau menua Etiopia.

¹¹Nadai mensia tauka jelu deka bejalai nengah menua nya. Menua nya nadai orang nguan dalam kandang empat puluh taun.

¹²Lalu Aku deka ngaga Ejip nyadi menua ti pemadu puang di dunya tu, lalu nengeri iya nyadi nengeri ti nadai orang nguan dalam kandang empat puluh taun, ti lebih agi dirusak ari semua nengeri bukai. Aku deka ngachirka orang Ejip ngagai semua menua bukai, lalu mambarka sida ba semua menua bukai.

¹³Laban ku TUHAN Allah Taala bejaku: Ba pengujung empat puluh taun nya ila, Aku deka ngempuruka orang Ejip ari semua menua ti udah alai Aku ngachirka sida,

¹⁴lalu Aku deka ngasuh sida diau di selatan menua Ejip, ti endang menua asal sida, lalu sida deka nyadi perintah ti lemi,

¹⁵perintah ti pemadu lemi ari semua perintah ti bukai, lalu sida enda agi ngeninggika diri ari atas bansa bukai. Aku deka ngaga sida nyadi bansa ti pemadu mit, datai ke sida enda agi ulih merintah bansa bukai.

¹⁶Orang Ejip nadai agi dikarapka menua Israel nulung sida. Sida deka ingatka penyai orang Ejip, lebuh sida nguing ngagai orang Ejip minta tulung. Nya baru sida deka nemu Aku endang TUHAN Allah Taala.

¹⁷Kena satu hari bulan ti kesatu dalam taun ti kedua puluh tujuh kami udah dibuai ngagai menua Babilon, TUHAN bejaku ngagai aku.

¹⁸Ku Iya, “Anak mensia, Raja Nebukadnesar menua Babilon udah nyerang nengeri Tire. Iya udah mejalka bala soldadu iya mai ma ti kelalu berat datai ke pala sida nyau abis lasu, lalu kulit bau sida nyau ngeliti. Tang raja tauka bala soldadu iya nadai bulih utai ari nengeri nya setipak enggau pengiruh sida.

¹⁹Nya alai tu utai ti disebut Aku TUHAN Allah Taala: Aku deka nyerahka menua Ejip ngagai Raja Nebukadnesar menua Babilon. Iya deka ngerumpak menua nya, lalu nabanka semua pengaya menua Ejip kena iya mayar gaji bala soldadu iya.

²⁰Aku udah meri menua Ejip ngagai iya kena Aku ngaji iya ti udah gawa, laban bala soldadu iya udah gawa ke Aku. Aku TUHAN Allah Taala udah bejaku.

²¹Lebuh utai nya nyadi, Aku deka ngasuh orang Israel kering lalu ngasuh nuan, Esekiel, bejaku ngagai semua sida. Nya baru sida deka nemu Aku endang TUHAN.”