Read Iban Esekiel 3 Bible Online

Esekiel 3 - Iban bible

Esekiel 3

¹ Ku Allah Taala bejaku, “Anak mensia, empa gulung surat nya. Udah nya mupuk nuan lalu bejaku ngagai orang Israel.”

²Aku lalu merangapka nyawa aku, lalu Iya meri gulung surat nya ngagai aku ngambika aku makai iya.

³Ku Allah Taala bejaku, “Anak mensia, empa gulung surat ti diberi Aku ngagai nuan, ngambika perut nuan kenyang.” Aku lalu makai gulung surat nya, lalu iya manis asai ai manyi.

⁴Udah nya Allah Taala bejaku, “Anak mensia, alai nuan mansang ngagai orang Israel, lalu sebut ngagai sida sebarang utai ti diasuh Aku sebut nuan.

⁵Aku ukai ngasuh nuan mansang ngagai bansa orang ke enda ditemu nuan jaku, tang ngagai orang Israel.

⁶Enti Aku ngasuh nuan mansang ngagai bansa ti besai, ti enda ditemu nuan jaku, sida deka mendingka nuan.

⁷Tang orang Israel enggai mendingka nuan. Indah Aku Empu deh enda dipendingka sida. Semua sida nya endang kieh sereta deka ngelaban magang.

⁸Diatu Aku deka ngasuh nuan kieh sereta kering ati baka sida.

⁹Aku deka ngasuh nuan teguh baka batu, kering baka intan. Anang takutka sida ke angkat ngelaban nya.”

¹⁰Ku Allah Taala nampung jaku Iya, “Anak mensia, dingaka enggau manah, lalu kingatka semua utai ti dipadahka Aku ngagai nuan.

¹¹Udah nya mansang nuan ngagai orang ke ari bansa nuan empu, ti agi mengkang di menua ti alai sida udah dibuai, lalu padahka utai ti disebut Aku TUHAN Allah Taala ngagai sida, nemuka sida mending tauka enda.”

¹²Udah nya Roh Allah Taala lalu ngangkatka aku, lalu aku ninga munyi nyawa ti inggar bejaku ari belakang aku, “Pujika mulia TUHAN ti di serega di atas!”

¹³Aku ninga munyi kebap sayap utai ti idup di langit, enggau munyi kaki kerita, ti inggar munyi tanah ti berenyang.

¹⁴Kuasa TUHAN lalu balat amat nurun atas aku, lalu lebuh Roh TUHAN mai aku, aku berasai pedis ati sereta ringat.

¹⁵Aku lalu datai di Tel Abip ba tebing Sungai Kebar, alai bala orang ke udah kena buai diau, lalu aku diau dia tujuh hari, tusah ati laban utai ti dipeda enggau didinga aku.

¹⁶Udah lepas tujuh hari nya, TUHAN bejaku ngagai aku.

¹⁷Ku Iya, “Anak mensia, Aku udah ngaga nuan nyadika jejaga orang Israel. Nuan enda tau enda madahka ngagai sida jaku tangkan ari Aku.

¹⁸Enti Aku madahka orang ke jai nya deka mati, tang nuan enda meri jaku tangkan nya ngagai iya lalu ngasuh iya ngubah ulah diri ngambika iya ulih ngidupka nyawa diri, orang ke jai nya deka mati ketegal dosa iya empu, tang Aku deka nekanka nuan betanggungjawapka pemati iya.

¹⁹Enti nuan meri jaku tangkan nya ngagai orang ke jai, lalu iya enda badu bedosa, iya deka mati ketegal dosa iya empu, tang nuan empu deka nyelamatka nyawa diri.

²⁰“Enti orang ke manah belabuh ngereja penyai, lalu Aku ngengkahka iya ba endur ti tau ngasuh bebadi, iya deka mati, enti nuan enda meri jaku tangkan ngagai iya. Iya deka mati ketegal dosa iya empu, lalu Aku enggai ngingatka utai ti manah ti udah dikereja iya, tang Aku deka nekanka nuan betanggungjawapka pemati iya.

²¹Enti nuan meri jaku tangkan ngagai orang ke manah ngambika iya enda bedosa, lalu iya mendingka nuan lalu enda bedosa, iya deka mengkang idup, lalu nuan empu deka mega idup.

²²Aku ngasaika kuasa TUHAN bisi ba aku, lalu aku ninga Iya nyebut ngagai aku, “Angkat nuan lalu mansang ngagai lebak. Aku deka bejaku enggau nuan dia.”

²³Nya alai aku lalu mansang ngagai lebak nya, lalu dia aku meda mulia TUHAN, baka ke udah dipeda aku ba tebing Sungai Kebar. Aku lalu nyungkurka diri ke tanah,

²⁴tang Roh Allah Taala tama ngagai aku lalu ngangkatka aku bediri. Ku TUHAN bejaku ngagai aku, “Pulai nuan ke rumah, lalu tutup diri empu dalam rumah nya.

²⁵Anak mensia, nuan deka ditanchang ngena tali, lalu nuan enda ulih pansut betemu enggau orang.

²⁶Aku deka nagang dilah nuan engkebut, ngambika nuan enda ulih meri jaku tangkan ngagai orang ke angkat ngelaban tu.

²⁷Udah nya, lebuh Aku bejaku ngagai nuan baru, lalu ngasuh nuan ulih bejaku baru, nuan deka madahka ngagai sida utai ti disebut Aku TUHAN Allah Taala. Sekeda sida deka mending, tang sekeda enggai ibuhka nuan, laban sida tu endang bansa orang ke angkat ngelaban.”