Read Iban Esekiel 30 Bible Online

Esekiel 30 - Iban bible

Esekiel 30

¹TUHAN bejaku baru ngagai aku.

²Ku Iya, “Anak mensia, benabi lalu sebut: Ku TUHAN Allah Taala bejaku: Sebut enggau nyawa ti inggar: Naka meh pemalat hari nya!

³Laban hari nyau semak, hari TUHAN nyau semak. Hari nya deka petang laban mua hari, maya semua bansa deka diukum.

⁴Perang deka nyadi di menua Ejip lalu orang Etiopia deka irau ati lebuh orang Ejip dibunuh, lalu utai sida ditabanka munsuh lalu pugu menua Ejip diruntuhka.

⁵Etiopia, enggau Put, Lut, enggau semua Arabia, enggau Libia, enggau semua orang ke setanah enggau sida deka mati dibunuh ngena pedang.

⁶Ku TUHAN bejaku: Orang ke nyukung Ejip deka alah, lalu bala soldadu menua Ejip ti sumbung deka dirusak magang. Berengkah ari Migdol nyentuk ngagai Syene, sida deka mati dibunuh ngena pedang, ku TUHAN Allah Taala bejaku.

⁷Menua Ejip deka nyadi menua ti pemadu puang di dunya tu, lalu semua nengeri iya deka nyadi tembawai magang.

⁸Nya baru sida deka nemu Aku endang TUHAN, lebuh Aku nyelup menua Ejip ngena api, lalu semua orang ke nulung iya dibunuh magang.

⁹Ba hari nya, Aku deka ngirumka bala seruan ngena kapal kena ngemba orang menua Etiopia ti enda ngadang, lalu sida deka irau ati lebuh Ejip diukum, laban hari nya deka datai!”

¹⁰Ku TUHAN Allah Taala bejaku: Aku deka ngena Raja Nebukadnesar menua Babilon madamka pengaya menua Ejip.

¹¹Iya enggau bala soldadu iya deka datai lalu ngerusak menua nya. Sida deka nyerang menua Ejip ngena pedang, lalu menua nya deka penuh laban bangkai mensia.

¹²Aku deka ngerangkaika Sungai Nile, lalu nyual menua Ejip ngagai orang ke jai. Aku deka ngerusak menua nya enggau semua utai ti dalam iya ngena jari orang ke datai ari menua bukai. Aku ti TUHAN udah bejaku.”

¹³Ku TUHAN Allah Taala bejaku: Aku deka ngerusak semua engkeramba enggau petara ti pelesu di Mempis. Menua Ejip nadai agi raja lalu Aku deka ngemba semua orang di menua nya.

¹⁴Aku deka ngaga Patros nyadi menua puang, lalu nunu nengeri Zoan ti di utara lalu Aku deka ngukum nengeri Tebes.

¹⁵Aku deka mubuhka pengeringat Aku ngagai nengeri Pelusium, nengeri ti bekuta di menua Ejip lalu Aku deka ngerusak pengaya nengeri Tebes.

¹⁶Aku deka nunu menua Ejip. Nengeri Pelusium deka merinsa. Kuta nengeri Tebes deka bumbus, lalu nengeri Mempis deka diserang lebuh siang hari.

¹⁷Bala lelaki ke agi biak ari nengeri Heliopolis enggau nengeri Bubastis, deka mati dibunuh ngena pedang, lalu orang bukai di nengeri deka ditabanka nyadi orang tangkap.

¹⁸Di Tapanes siang hari deka piam lebuh Aku ngalahka kuasa menua Ejip, lalu madamka pengering ti dikemegahka sida. Nengeri nya deka dibap mua hari, lalu semua nengeri di menua nya deka ditabanka nyadi orang tangkap magang.

¹⁹Nya meh jalai Aku deka ngukum menua Ejip. Nya baru sida deka nemu Aku endang TUHAN.

²⁰Kena tujuh hari bulan ti kesatu dalam taun ti kesebelas kami udah dibuai ngagai menua Babilon, TUHAN bejaku ngagai aku.

²¹Ku Iya, “Anak mensia, Aku udah matahka lengan raja menua Ejip. Lengan nya apin dibalut ngambika gerai, lalu kering baru megai pedang.

²²Nya alai, ku TUHAN Allah Taala bejaku: Aku deka ngelaban raja menua Ejip, lalu matahka lengan iya kedua piak - lengan ti agi meruan, enggau lengan ti udah patah - lalu Aku deka ngasuh pedang tebelengka ari jari iya.

²³Aku deka ngachirka orang Ejip ngagai semua menua, lalu mambarka sida di serata dunya.

²⁴Aku deka ngeringka lengan raja menua Babilon, lalu meri pedang Aku ngagai jari iya, tang Aku deka matahka lengan raja menua Ejip, lalu iya deka bedemuh lalu mati di mua munsuh.

²⁵Sigi amat, Aku deka ngeringka lengan raja menua Babilon, tang Aku deka matahka lengan raja menua Ejip. Nya baru sida deka nemu Aku endang TUHAN lebuh Aku meri pedang Aku ngagai jari raja menua Babilon. Iya deka ngedarka lalu nunjukka pedang nya tunga ngagai menua Ejip,

²⁶lalu Aku deka ngachirka orang Ejip ngagai semua bansa lalu mambarka sida di serata dunya. Nya baru sida deka nemu Aku endang TUHAN.”