Read Iban Esekiel 31 Bible Online

Esekiel 31 - Iban bible

Esekiel 31

¹Kena satu hari bulan ti ketiga dalam taun ti kesebelas kami udah dibuai ngagai menua Babilon, TUHAN bejaku ngagai aku.

²Ku Iya, “Anak mensia, sebut ngagai raja menua Ejip enggau ngagai semua nembiak iya: Nadai orang besai agi kuasa ari nuan!

³Nuan tu baka [37] kayu sidar ti di menua Lebanon, ti manah dan sereta lebat daun, ti tumbuh nyaruk remang.[38]

⁴Ai dia chukup kena iya idup, lalu ai ti di dalam tanah ngasuh iya tumbuh tinggi, lalu ai nya rarat ngelingi endur alai iya udah ditanam, sereta rarat ngagai semua kayu ti ba tanah nya.

⁵Laban kayu nya chukup ai, nya alai iya galak agi ari kayu bukai. Dan iya besai sereta jurai.

⁶Semua macham burung begagaka tansang ba dan iya. Jelu babas beranak belindung di baruh dan iya. Semua bansa dalam dunya tu belelak di baruh iya.

⁷Kayu nya manah amat gaya, laban dan iya jurai, laban urat iya ngunjam ke dalam ngagai endur ti mayuh ai.

⁸ Nadai kayu sidar ti ba kebun Allah Taala ulih dibandingka enggau kayu nya. Nadai kayu pain kala bisi dan ti baka nya, Kayu plan pen nadai dan ti baka nya. Nadai kayu dalam kebun Allah Taala ti ngemanah nya.

⁹Aku tu ke ngaga iya manah gaya sereta mayuh dan. Semua kayu di Eden, iya nya kebun Allah Taala, bela ngining iya magang.

¹⁰Nya alai ku TUHAN Allah Taala bejaku: Laban iya tinggi lalu puchuk iya nyaruk remang, lalu iya temegahka peninggi diri,

¹¹Aku deka nyerahka iya ngagai raja menua bukai. Raja nya deka ngereja ngagai iya setipak enggau penyai ti udah dikereja iya. Aku udah muai iya.

¹²Orang ari menua bukai ti nadai pengasih deka nebang iya, lalu ninggalka iya. Dan enggau pating iya ti patah deka labuh ninggang semua bukit enggau lebak di menua nya. Semua bansa ti udah belindung di baruh iya, deka angkat ari endur nya.

¹³Burung deka datai lalu inggap ba kayu ti udah rebah nya, lalu jelu babas deka ngelunjak dan iya.

¹⁴Utai tu nyadi ngambika nadai kayu ti ba tebing sungai tau tumbuh tinggi, tauka nyaruk remang, sereta ngambika nadai kayu bukai tinggi baka sida, laban semua sida deka diukum mati baka mensia ti dibuai ngagai dunya pemati.”

¹⁵Ku TUHAN Allah Taala bejaku: Lebuh kayu nya nurun ngagai dunya pemati, Aku nutup semua ai enggau sungai nyadika tanda ngulitka iya. Aku nagang semua mata ai enggau sungai rarat. Aku mungkur Bukit Lebanon ngena pemetang nyadika tanda sida ngulit, lalu semua kayu dalam utan nya layu magang.

¹⁶Aku ngasuh semua bansa getar-getar lebuh sida ninga munyi kayu nya rebah, lebuh Aku numbangka iya lalu nurunka iya ngagai dunya pemati. Semua kayu di Eden, enggau semua kayu ti manah di Lebanon, semua kayu ti chukup ai, deka gaga ati meda kayu nya rebah.

¹⁷Sida mega mansang ngagai dunya pemati sama enggau kayu nya, ngagai orang ke udah dibunuh ngena pedang, enggau ngagai orang ke setanah enggau sida, ke belindung di baruh iya dalam mayuh bengkah bansa.

¹⁸Raja menua Ejip, semua utai nya deka nyadi ba nuan enggau ba bala nembiak nuan! Dulu suba nuan udah baka kayu nya, tinggi agi sereta tegap agi ari semua orang bukai di dunya tu. Tang diatu nuan deka ditebang, lalu enda tau enda mati baka kayu ti dalam kebun Eden. Nuan deka dibuai ngagai dunya pemati, lalu nuan deka diau begulai enggau orang ke enda arapka Allah Taala, begulai enggau orang ke mati dibunuh ngena pedang. Aku TUHAN Allah Taala udah bejaku.”