Read Iban Esekiel 32 Bible Online

Esekiel 32 - Iban bible

Esekiel 32

¹Kena satu hari bulan ti kedua belas dalam taun ti kedua belas kami udah dibuai ngagai menua Babilon, TUHAN bejaku ngagai aku.

²Ku Iya, “Anak mensia, beri jaku tangkan ngagai raja menua Ejip. Beri pesan tu ngagai iya ari Aku: Nuan ngaga diri baka singa di mua mayuh bengkah bansa, tang nuan baka baya ti enchapak nengah sungai. Nuan ngeruh ai ngena kaki nuan lalu ngamahka mayuh bengkah sungai.

³Lebuh mayuh bengkah bansa begempuru, Aku deka nangkap nuan ngena pukat Aku, lalu nejuka sida narit pukat nya ke tebing.

⁴Aku deka ngempaska nuan ke tanah, lalu ngasuh semua burung enggau jelu di dunya tu makai nuan.

⁵Aku deka ngelamun semua bukit enggau semua lebak ngena but bangkai nuan.

⁶Aku deka mubuhka darah nuan datai ke mungkur semua bukit lalu ngemenuhka semua sungai.

⁷ Lebuh Aku ngerusak nuan, Aku deka mungkur langit lalu ngelamun bintang. Mata hari deka belalai ari belakang remang, lalu bulan enda meri penampak.

⁸Aku deka madamka semua penampak di langit lalu ngasuh menua nuan petang. Aku TUHAN Allah Taala udah bejaku.”

⁹“Semua bansa deka tusah ati lebuh Aku nusui berita pasal pengerusak nuan di menua ti enda kala didinga nuan.

¹⁰Utai ti dikereja Aku ngagai nuan deka ngasuh mayuh bengkah bansa tekenyit ati. Lebuh Aku miauka pedang Aku, bala raja deka getar-getar takut. Lebuh nuan alah, semua sida deka getar-getar takut enggai ke diri mati.”

¹¹Ku TUHAN Allah Taala bejaku enggau raja menua Ejip, “Nuan deka diserang pedang raja menua Babilon.

¹²Aku deka nejuka bala soldadu ari mayuh bengkah bansa ti mangah, nyintak pedang sida lalu munuh semua nembiak nuan, lalu semua sida enggau semua utai ti dikemegahka nuan deka dirusak magang.

¹³Aku deka munuh jelu sapi nuan ba sebelah tebing sungai, ngambika mensia tauka jelu sapi nadai agi ngeruh ai.

¹⁴Aku deka ngasuh sungai nuan chiru lalu rarat enda beriak. Aku TUHAN Allah Taala udah bejaku.

¹⁵Lebuh Aku ngaga menua Ejip nyadi menua ti nadai orang nguan sereta kusi, lalu ngerusak semua orang ke diau dia, nya baru sida deka nemu Aku endang TUHAN.

¹⁶Jaku tangkan tu deka nyadika leka sabak kena nyenggai orang ke mati. Sida ke indu ari semua bansa deka ngena leka sabak tu ngulitka menua Ejip enggau semua nembiak iya. Aku TUHAN Allah Taala udah bejaku.”

¹⁷Kena lima belas hari bulan ti kesatu dalam taun ti kedua belas kami udah dibuai ngagai menua Babilon, TUHAN bejaku ngagai aku.

¹⁸Ku Iya, “Anak mensia, ngulit meh nuan ke orang Ejip. Kirumka sida ngagai dunya pemati sama enggau bansa bukai ti bekuasa.

¹⁹Sebut ngagai sida: “Kati kita ngumbai diri bajik agi ari semua orang bukai? Kita deka nurun ngagai dunya pemati lalu gali dia begulai enggau orang ke enda nangika Allah Taala.

²⁰“Orang Ejip deka mati sama enggau sida ke mati beperang. Siti pedang sedia deka munuh semua sida.

²¹Bala bujang berani enggau orang ke beperang setanah enggau orang Ejip, ngelaluka penatai orang Ejip ngagai dunya pemati. Ku sida manjung: “Orang ke enda arapka Allah Taala, ke mati beperang, udah datai ditu, lalu ditu meh endur alai sida gali!’

²²“Asiria bisi dia, dikelingi kubur bala soldadu iya. Semua sida nya udah mati beperang magang,

²³lalu kubur sida nya ba buntut dunya pemati. Semua soldadu iya udah mati beperang, lalu kubur sida ngelingi lumbung iya. Tang dulu menya sida balat ngenakutka dunya orang ke idup.

²⁴“Elam bisi dia, dikelingi kubur bala soldadu iya. Semua sida nya udah mati beperang, lalu sida nurun, enda ditutus, ngagai dunya pemati. Lebuh sida agi idup, sida balat ngenakutka orang, tang diatu sida garing-garing mati sereta dipechat.

²⁵Elam gali begulai enggau sida ke udah mati beperang, lalu kubur bala soldadu iya ngelingi iya magang. Semua sida nya enda ditutus, semua mati beperang. Lebuh sida agi idup suba, sida balat ngenakutka orang, tang diatu sida garing-garing mati sereta dipechat, sama enggau orang ke udah mati beperang.

²⁶“Mesek enggau Tubal bisi dia, dikelingi kubur bala soldadu seduai iya. Semua sida nya enda ditutus magang, lalu semua sida mati beperang. Tang taja pia, sida udah balat ngenakutka orang ke idup.

²⁷Sida iya enda dikuburka enggau basa baka ke nguburka sida bujang berani ti dulu kelia,[39] ke nurun mai semua senyata sida ngagai dunya pemati, lalu pedang sida diengkahka di baruh pala sida, lalu terabai sida [40] diengkahka ba atas tubuh sida. Dulu suba sida ke bujang berani tu udah chukup bekuasa ngenakutka orang ke idup.

²⁸“Nya meh gaya orang Ejip deka betagaring mati begulai enggau orang ke enda ditutus, ke mati beperang.

²⁹Edom bisi dia sama enggau bala raja enggau bala pemerintah iya. Sida nya soldadu ti bekuasa dulu suba, tang diatu sida garing-garing di dunya pemati, begulai enggau orang ke enda ditutus, ke mati beperang.

³⁰“Semua anak raja ke datai ari utara bisi dia magang, lalu pia mega orang Sidon. Dulu menya kuasa sida balat amat ngenakutka orang, tang diatu sida udah dipechat lalu nurun begulai enggau sida ke mati beperang, lalu dikuburka enda ditutus. Sida dipechat sama enggau sida ke nurun ngagai dunya pemati.

³¹“Lebuh raja menua Ejip meda orang ke mati beperang, iya enggau bala soldadu iya deka lantang ati meda sida,” ku TUHAN Allah Taala bejaku.

³²“Aku Empu ti udah ngasuh raja menua Ejip ngenakutka orang ke idup, tang iya enggau bala soldadu iya deka kena bunuh, lalu dikuburka begulai enggau semua orang ke enda ditutus, ke mati beperang.” TUHAN Allah Taala udah bejaku.