Read Iban Esekiel 34 Bible Online

Esekiel 34 - Iban bible

Esekiel 34

¹Ku TUHAN bejaku ngagai aku,

²“Anak mensia, alai nuan benabi ngelaban bala orang ke megai perintah di menua Israel. Benabi ngelaban sida, lalu padahka ngagai sida utai ti disebut Aku TUHAN Allah Taala: Tulah mmeh kita ke pengibun orang Israel ke udah nupi diri empu! Nama kebuah kita enda ngibun raban bedus?

³Kita makai lemak tusu. Kita bekenaka gari ti digaga ari bulu bedus, nyayat lalu makai jelu bedus ti pemadu gemu. Tang kita enda ngibun bedus.

⁴Kita enda ngintu bedus ti lemi ngambika sida kering; kita enda ngubat sida ke sakit; kita enda malut telih sida ke enda ulih bejalai; kita enda mai sida ke tesat pulai baru; kita enda ngiga sida ke lenyau, lalu kita ngena chara pejal enggau chara ti kasar lebuh kita merintah sida.

⁵ Sida pambar pendiau, laban sida nadai pengibun; lalu sida diempa semua jelu babas.

⁶Raban bedus Aku lelang ba sebelah munggu ti tinggi enggau ba sebelah bukit. Sida ngachir di serata dunya, lalu nadai orang ngiga sida tauka nguji nemu endur alai sida.

⁷“Kita ke pengibun bedus, pendingka utai ti dipadahka Aku ti TUHAN ngagai kita diatu.

⁸Laban Aku tu Allah Taala ti idup, kita enda tau enda mendingka Aku. Raban bedus Aku udah diterekam, lalu diempa jelu babas, laban sida nadai orang ngibun. Bala pengibun bedus Aku nadai nguji begigaka bedus Aku ti lenyau. Sida semina ngintu diri empu aja, ukai ngintu bedus Aku.

⁹Nya alai pendingka Aku, kita ke pengibun bedus.

¹⁰Aku TUHAN Allah Taala madahka Diri ngelaban kita. Aku deka ngerampas bedus Aku ari jari kita, lalu enggai agi ngasuh kita nyadika pengibun sida. Aku enggai agi nejuka kita semina ngintu diri empu aja. Aku deka ngelepaska bedus Aku ari jari kita, lalu enggai nejuka kita makai sida.

¹¹“Aku TUHAN Allah Taala madahka Aku deka ngiga bedus Aku, lalu ngibun sida.

¹²Baka pengibun bedus ke ngiga bedus iya ti lenyau, baka nya meh Aku deka ngiga bedus Aku. Bedus Aku pambar lebuh mua hari ti petang pegari. Lalu Aku deka mai sida pulai baru ari semua endur ti udah alai sida ngachir.

¹³Lalu Aku deka mai sida pansut ari semua bansa, lalu ngempuruka sida ari semua menua, lalu mai sida ngagai menua sida empu. Aku deka nupi sida ba sebelah bukit di menua Israel, semak mata ai, enggau ba semua endur ti bisi mensia.

¹⁴Aku deka nupi sida ba padang rumput ti galak; sida deka gali ba padang rumput ti galak, lalu ngulam rumput ti galak ti tumbuh ba bukit menua Israel.

¹⁵Aku Empu deka nyadika Pengibun raban bedus Aku, lalu Aku deka ngiga endur alai sida ulih belelak. Aku TUHAN Allah Taala udah bejaku.

¹⁶“Aku deka ngiga sida ke tesat, mai sida ke lelang pulai baru, malut telih sida, lalu ngeraika sida ke sakit. Tang Aku deka ngerusak sida ke gemu sereta kering, laban Aku tu Pengibun Bedus ti ngereja utai ti ngena.

¹⁷“Nya alai, kita ke bedus Aku, Aku TUHAN Allah Taala, madahka ngagai kita: Aku deka ngakim genap iku kita lalu nyeraraka kita ke manah ari kita ke jai, nyeraraka bedus ari kambin.

¹⁸Sekeda kita enda puas ati ngulam rumput ti galak; indah rumput ti enda diulam kita deh abis dilunjak kita. Kita ngirup ai ti chiru lalu ngeruh ai ti enda diirup kita!

¹⁹Bedus Aku ti bukai nadai chara bukai, tang makai rumput ti udah dilunjak kita, lalu ngirup ai ti udah keruh laban kita.

²⁰“Nya alai diatu Aku TUHAN Allah Taala, madahka ngagai kita: Aku deka ngakim entara kita bedus ke gemu enggau kita bedus ke kurus.

²¹Kita nyeging sida ke sakit, lalu nanduk sida datai ke sida pansut ari raban kita.

²²Tang Aku deka ngelepaska bedus Aku lalu enda agi nejuka sida kena perinsa. Aku deka ngakim genap iku bedus Aku, lalu nyeraraka sida ke manah ari sida ke jai.

²³ Aku deka meri ngagai sida siku raja ke sebaka enggau nembiak Aku David, ngambika iya nyadi pengibun sida, lalu ngintu sida.

²⁴ Aku ti TUHAN deka nyadi Allah Taala sida, lalu siku raja ti sebaka enggau nembiak Aku David deka nyadi raja sida. Aku ti TUHAN udah bejaku.

²⁵Aku deka ngaga siti sempekat enggau sida, kena netapka pengelikun sida. Aku deka muai semua jelu ti mangah ari menua tu, ngambika bedus Aku tau diau likun di padang lalu tinduk ba sebelah utan.

²⁶“Aku deka merekatka sida, lalu nejuka sida diau ngelingi bukit Aku ti kudus.[41] Dia meh endur alai Aku deka merekatka sida enggau ujan nitihka musin.

²⁷Kayu deka bebuah, umai deka mansutka asil, lalu semua orang deka diau likun ba tanah diri empu. Lebuh Aku mutuska rantai ti nanchang nembiak Aku, lalu ngelepaska sida ari orang ke udah ngaga sida nyadi ulun, nya baru sida deka nemu Aku endang TUHAN.

²⁸Orang bansa bukai nadai agi ngerumpak sida, lalu jelu babas nadai agi munuh tauka makai sida. Sida deka diau likun, lalu nadai orang agi ngemba sida.

²⁹Aku deka ngasuh menua sida mansutka mayuh macham asil, ngambika sida enda agi lapar, lalu enda agi dikeleseka orang bansa bukai.

³⁰Semua orang deka nemu Aku endang TUHAN ti Allah Taala sida, lalu sida endang nembiak Aku. Aku TUHAN Allah Taala udah bejaku.

³¹“Kita tu bedus Aku, raban ke ditupi Aku, kita endang nembiak Aku, lalu Aku endang Allah Taala kita,” ku TUHAN Allah Taala bejaku.