Read Iban Esekiel 35 Bible Online

Esekiel 35 - Iban bible

Esekiel 35

¹ Ku TUHAN bejaku ngagai Aku,

²“Anak mensia, kuingka mua nuan tunga ngagai menua Edom, lalu benabi ngelaban iya.

³Padahka ngagai orang mayuh utai ti disebut Aku, TUHAN Allah Taala: “Bukit menua Edom, Aku ngelaban kita! Aku deka ngaga kita nyadi menua ti kusi sereta nadai orang nguan.

⁴Aku deka ngasuh semua nengeri kita nyadi tembawai lalu menua kita nadai orang nguan. Nya baru kita deka nemu Aku endang TUHAN.

⁵“Kita endang seruran nyadi munsuh menua Israel, lalu ngasuh bala nembiak iya kena bunuh lebuh sida dituntung penusah, lebuh menua nya diukum ke penudi iya ketegal dosa iya.

⁶Nya alai, dalam nama Aku, TUHAN Allah Taala ti Pemadu Tinggi, pemati meh nyadika ungkup kita, lalu kita enda ulih ngerarika diri ari nya. Kita udah salah [42] bebunuhka orang, lalu pengawa bebunuhka orang nya deka nitihka kita.

⁷Aku deka ngasuh menua ti bebukit di menua Edom nyadi menua ti kusi, lalu munuh semua orang ke bejalai nengah menua nya.

⁸Aku deka ngelamun semua bukit ngena bangkai mensia, lalu bukit enggau lebak deka dilamun enggau bangkai sida ke mati beperang.

⁹Aku deka ngaga nuan nyadi menua ti nadai orang nguan belama iya, lalu nadai agi orang deka diau dalam nengeri nuan. Nya baru nuan deka nemu Aku endang TUHAN.

¹⁰“Nuan udah bejaku madahka dua bengkah bansa nya, Judah enggau Israel, enggau tanah sida, enggi nuan, lalu nuan madahka diri deka bempu sida, taja pen Aku tu TUHAN Allah Taala sida.

¹¹Nya alai, laban Aku tu TUHAN Allah Taala, Allah Taala ti idup, Aku deka malas ngelaban kita laban kita udah ringat, udah kepapas, udah begedika nembiak Aku. Sida deka nemu Aku ngukum kita ketegal utai ti udah dikereja kita ngagai sida.

¹²Nya baru kita deka nemu Aku ti TUHAN udah ninga kita mechat Aku lebuh kita madahka bukit di menua Israel nadai orang nguan, lalu kita deka makai sida.

¹³Aku udah ninga kita temegah ngapa bejaku ngelaban Aku.”

¹⁴Ku TUHAN Allah Taala bejaku, “Aku deka ngaga menua kita nyadi menua puang, datai ke semua dunya tu deka rami gaga lebuh kita alah,

¹⁵baka kita ke rami gaga lebuh pesaka Aku Israel dirusak. Bukit menua Seir, semua menua Edom deka nyadi menua puang magang. Nya baru semua orang deka nemu Aku endang TUHAN.”