Read Iban Esekiel 37 Bible Online

Esekiel 37 - Iban bible

Esekiel 37

¹Aku ngasaika kuasa TUHAN bisi enggau aku, lalu Roh Iya mai aku, lalu ngengkahka aku ba siti lebak ti penuh laban rangkah tulang.

²Iya lalu nguluka aku bejalai ngerenchah rangkah tulang nya, lalu aku meda mayuh amat rangkah tulang. Tulang nya rangkai amat.

³Ku TUHAN bejaku ngagai aku, “Anak mensia, kati tulang nya ulih idup baru?” Ku Aku nyaut, “TUHAN Allah Taala, semina Nuan aja nemu nya!”

⁴Ku TUHAN bejaku, “Benabi nuan ngagai rangkah tulang tu. Asuh rangkah tulang tu mendingka jaku TUHAN.

⁵Padahka ngagai sida, Aku TUHAN Allah Taala nyebut tu ngagai sida: Aku deka meri kita seput, lalu kita deka idup baru.

⁶Aku deka meri kita urat enggau isi, lalu malut kita ngena kulit. Aku deka meri kita seput, lalu ngasuh kita idup baru. Nya baru kita deka nemu Aku endang TUHAN.”

⁷Nya alai aku lalu benabi nitihka asuh TUHAN. Lebuh aku benung benabi, aku ninga munyi utai bekeretak, lalu rangkah tulang nya belabuh bejantil enggau pangan diri.

⁸Lebuh aku benung merening, tulang nya lalu dibalut urat enggau isi, lalu udah nya, kulit. Tang tubuh nya nadai seput.

⁹Allah Taala lalu bejaku ngagai aku, “Anak mensia, benabi nuan ngagai ribut.[44] Padahka ngagai ribut, TUHAN Allah Taala ngasuh iya datai ari semua endur, lalu ngesuhka seput ngagai semua bangkai nya, ngambika sida idup baru.”

¹⁰ Nya alai aku lalu benabi nitihka asuh TUHAN. Seput lalu tama ngagai semua tubuh nya. Sida idup, lalu bediri. Pemayuh tubuh sida chukup kena numbuhka siti raban soldadu ti besai.

¹¹Ku Allah Taala bejaku ngagai aku, “Anak mensia, orang Israel baka tulang nya. Sida ngumbai diri rangkai, nadai pengadang agi.

¹²Nya alai benabi nuan ngagai nembiak Aku Israel, lalu padahka ngagai sida, Aku TUHAN Allah Taala deka muka kubur sida. Aku deka ngambi sida pansut, lalu mai sida pulai baru ngagai menua Israel.

¹³Lebuh Aku muka kubur alai bala nembiak Aku udah dikuburka, lalu mai sida pansut, nya baru sida deka nemu Aku endang TUHAN.

¹⁴Aku deka ngesuhka seput Aku ke dalam sida, ngambika sida idup baru, lalu nejuka sida diau di menua sida empu. Nya baru sida deka nemu Aku endang TUHAN. Aku udah besemaya deka ngereja utai tu, lalu Aku endang deka ngereja iya. Aku ti TUHAN udah bejaku.”

¹⁵Ku TUHAN bejaku ngagai aku baru,

¹⁶“Anak mensia, ambi siti kayu, lalu tuliska ba kayu nya leka jaku tu, ‘Perintah menua Judah.’ Udah nya ambi siti agi kayu, lalu tuliska ba kayu nya leka jaku tu, ‘Perintah menua Israel.’

¹⁷Udah nya pegai kayu dua iti nya betampung ujung, ngambika kayu dua iti nya nyadi baka siti kayu.

¹⁸Lebuh bala kita minta nuan madahka reti utai nya,

¹⁹padahka ngagai sida, Aku TUHAN Allah Taala, deka ngambi kayu ti ngambarka menua Israel lalu nampungka kayu nya enggau kayu ti ngambarka menua Judah, lalu Aku deka ngaga kayu dua iti nya nyadi siti, lalu megai iya.

²⁰“Pegai kayu dua iti nya, lalu awakka orang meda.

²¹Udah nya padahka ngagai sida, Aku TUHAN Allah Taala deka ngambi semua nembiak Aku ari semua menua ti udah alai sida pambar, ngempuruka sida, lalu mai sida pulai baru ngagai menua sida empu.

²²Aku deka ngempung sida nyadi siti bansa di menua tu, ba bukit ti di menua Israel. Sida deka bisi siku aja raja merintah sida, lalu sida enda agi dibagi ngagai dua bengkah bansa, tauka belah dua nyadi dua bengkah perintah.

²³Sida enda agi ngamahka diri ngena engkeramba, tauka ngamahka diri ngena dosa. Aku deka ngelepaska sida ari semua jalai ti dikena sida bedosa, ti nyual Aku. Aku deka nuchi sida. Sida deka nyadi nembiak Aku, lalu Aku deka nyadi Allah Taala sida.

²⁴ Siku raja ke sebaka enggau nembiak Aku David deka nyadika raja sida. Semua sida deka begempung di baruh siku raja nya lalu sida deka, enggau ati ti tetap, ngasika Adat Aku.

²⁵Sida deka diau di menua ti udah diberi Aku ngagai nembiak Aku Jakop, menua ti udah endur alai bala aki ini sida diau menya. Sida deka diau dia belama iya, lalu baka nya mega bala anak enggau peturun sida. Siku raja ke sebaka enggau nembiak Aku David deka merintah sida belama iya.

²⁶Aku deka ngaga siti sempekat enggau sida kena nyamin pengelikun sida belama iya. Aku deka ngentapka sida diau dia, lalu nambahka pemayuh tubuh sida, lalu netapka Rumah Aku bediri belama iya di menua sida.

²⁷ Aku deka diau dia begulai enggau sida. Aku deka nyadi Allah Taala sida, lalu sida deka nyadi nembiak Aku.

²⁸Lebuh Aku nirika Rumah Aku dia ba tengah-tengah sida belama iya, nya baru semua bansa deka nemu Aku ti TUHAN udah milih orang Israel nyadika nembiak Aku.”