Read Iban Esekiel 38 Bible Online

Esekiel 38 - Iban bible

Esekiel 38

¹Ku TUHAN bejaku ngagai aku,

² “Anak mensia, kuingka mua nuan tunga ngagai menua Gok lalu benabi ngelaban iya, orang ke nyadi tuai megai bansa Mesek enggau Tubal di menua Magok. Bejaku nuan ngelaban iya

³lalu padahka ngagai iya, Aku TUHAN Allah Taala ngelaban iya.

⁴Aku deka musinka iya, ngaitka ginti ba rang iya, lalu ngirit iya enggau semua bala soldadu iya ngagai endur bukai. Bala soldadu iya, enggau kuda sida, enggau orang ke bepekayan sereta nepan kuda nya mayuh bendar, lalu genap iku soldadu bela mai terabai lalu besenyataka pedang.

⁵Bala soldadu ari Persia, Etiopia, enggau ari Libia bisi enggau iya, lalu semua sida nya bisi terabai enggau selapuk kebal magang.

⁶Semua bala soldadu ari menua Gomer enggau ari Bet Togarmah di utara bisi enggau iya, lalu baka nya mega orang ari mayuh bengkah bansa ti bukai.

⁷Asuh iya empu sedia, lalu semua bala soldadu ke dipegai iya mega sedia magang.

⁸Berapa taun udah bekau nya ila, Aku deka ngasuh iya nyerang sebengkah menua ti diuan orang ke udah dibai pulai baru ari mayuh bengkah menua. Iya deka nyerang bukit ti di menua Israel, ti lama udah nadai orang nguan sereta puang, tang diatu diuan mayuh mensia enggau likun.

⁹Iya enggau bala soldadu iya, sereta enggau mayuh bengkah bansa ti setanah enggau iya, deka nyerang baka kabut, lalu ngelamun menua nya baka mua hari.”

¹⁰Tu utai ti disebut TUHAN Allah Taala ngagai Gok: “Lebuh maya nya ila, nuan deka berengkah berunding begagaka pelan ti jai.

¹¹Nuan deka mutuska runding deka nyerang sebengkah menua ti nadai daya, endur alai orang ke diau dalam pemaik enggau pengelikun dalam nengeri ti enda bekuta, lalu nadai utai nyaga.

¹²Nuan deka ngerumpak lalu ngerampas utai ari orang ke diau dalam nengeri ti udah dirusak nyadi tembawai dulu agi ari nya. Sida udah digempuruka ari mayuh bengkah menua, lalu diatu sida bisi jelu tupi enggau reta tengkira, lalu diau ba endur alai orang ke ari mayuh bengkah bansa betemu.

¹³Orang ari Sheba enggau ari Dedan, enggau orang dagang ari nengeri ti di menua Spain deka nanya nuan, ‘Kati nuan udah ngempuruka bala soldadu nuan, lalu nyerang, ngerumpak enggau ngerampas? Kati nuan bisi ati deka ngambi pirak enggau emas, jelu tupi enggau reta tengkira, lalu nabanka semua perapasan nya?’ ”

¹⁴Nya alai TUHAN Allah Taala lalu ngasuh aku madahka ngagai Gok utai ti disebut Iya ngagai Gok: “Diatu, kala lebuh bala nembiak Aku Israel benung diau likun, angkat [45] meh nuan

¹⁵ari menua nuan ti di utara, lalu uluka bala soldadu ti besai sereta kering, ti datai ari mayuh bengkah bansa, semua sida nepan kuda magang.

¹⁶Nuan deka nyerang bala nembiak Aku orang Israel baka kabut ti mangka ba menua nya. Lebuh maya nya ila, Aku deka ngasuh nuan nyerang menua Aku, kena ngayanka ngagai semua bansa sapa Aku tu, kena ngayanka pengudus Aku ngena utai ti dikereja Aku nengah nuan.

¹⁷Nuan tu meh orang ke udah dikenang Aku dulu kelia lebuh Aku madahka nengah bala nembiak Aku, iya nya bala nabi menua Israel, pasal Aku ti deka ngasuh siku orang nyerang menua Israel jemah ila.” TUHAN Allah Taala udah bejaku.

¹⁸Ku TUHAN Allah Taala bejaku, “Ba hari Gok nyerang menua Israel, Aku deka pedis ati.

¹⁹Ba hari nya ila, Aku deka balat ringat, lalu madahka tanah deka balat amat berenyang di menua Israel.

²⁰Semua ikan enggau burung, semua jelu ti besai enggau ti mit, enggau semua mensia di dunya tu, deka getar-getar nangika Aku. Bukit deka runtuh, tingkah deka tusur, lalu semua kuta deka runtuh magang.

²¹Aku deka ngenakutka Gok ngena semua macham penusah.[46] Aku TUHAN Allah Taala udah bejaku. Bala iya deka bepantapka pangan diri ngena pedang.

²²Aku deka ngukum iya ngena penyakit enggau perang. Ujan ti lebat enggau ujan batu, sama enggau api sereta enggau merirang, deka ninggang iya enggau bala soldadu iya, sereta ninggang mayuh bengkah bansa ti setanah enggau iya.

²³Nya meh jalai Aku deka ngayanka ngagai semua bansa Aku endang kering sereta kudus. Nya baru sida deka nemu Aku endang TUHAN.”