Read Iban Esekiel 39 Bible Online

Esekiel 39 - Iban bible

Esekiel 39

¹Ku TUHAN Allah Taala bejaku, “Anak mensia, benabi nuan ngelaban Gok, iya ti nyadi tuai merintah bansa Mesek enggau Tubal, lalu padahka ngagai iya Aku ngelaban iya.

²Aku deka nguingka iya kebukai, lalu nguluka iya ari endur ti jauh di utara, datai ke nyau datai ba bukit di menua Israel.

³Udah nya Aku deka malu panah iya ari jari kiba iya, sereta malu laja ari jari kanan iya.

⁴Gok enggau bala soldadu iya, enggau orang ke setanah enggau iya deka rebah lalu mati ba bukit di menua Israel, lalu Aku deka ngelakka bangkai sida nyadika pemakai semua burung enggau jelu babas.

⁵Sida deka rebah mati ba padang. Aku TUHAN Allah Taala udah bejaku.

⁶Aku deka nyelup api di menua Magok, enggau di serata tebing tasik alai orang ke diau nadai utai ngachau. Nya baru semua orang deka nemu Aku endang TUHAN.

⁷Aku deka nentuka nembiak Aku Israel nemu nama Aku ti kudus, lalu Aku enggai agi ngelakka nama Aku dipechat. Nya baru semua bansa deka nemu Aku endang TUHAN Allah Taala ke disembah orang Israel ti kudus.”

⁸Ku TUHAN Allah Taala bejaku, “Hari ti dikenang Aku tu endang tetap deka datai.

⁹Orang ke diau dalam nengeri di menua Israel deka pansut lalu ngumpul senyata ti ditinggalka munsuh, nyadika kayu api. Sida deka menyadika api ngena terabai, panah, laja, sangkuh, enggau pemalu. Semua utai nya chukup dikena sida dalam pengelama tujuh taun.

¹⁰Sida enda ibuh begumpulka kayu api ba sebelah umai, tauka nebang kayu dalam utan, laban sida bisi senyata ti udah ditinggalka munsuh nyadika kayu api sida. Sida deka ngerumpak lalu ngerampas utai ari orang ke udah ngerumpak sereta ngerampas utai ari sida empu.” TUHAN Allah Taala udah bejaku.

¹¹Ku TUHAN bejaku, “Lebuh semua utai tu nyadi, Aku deka meri ngagai Gok siti kubur di menua Israel, ba Emperan Orang Kampar, tunga ke timur Tasik Mati.[47] Gok enggau bala soldadu iya deka dikuburka dia, lalu emperan nya deka dikumbai ‘Emperan Bala Soldadu Gok.’

¹²Orang Israel deka nguburka semua bangkai, lalu meresi menua nya baru, dalam pengelama tujuh bulan.

¹³Semua orang di menua nya deka nulung nguburka bangkai sida, lalu orang ke nguburka bangkai sida nya deka diberi basa lebuh hari pemenang Aku. Aku TUHAN Allah Taala udah bejaku.

¹⁴Lebuh tujuh bulan nya udah lepas, orang ke lelaki deka dipilih bejalai nengah serata menua begiga lalu nguburka bangkai [48] ti agi tinggal ba sebelah tanah, ngambika menua nya beresi.

¹⁵Lebuh sida bejalai ke atas ke baruh nengah menua nya, genap kali sida tetemuka tulang mensia, sida deka nirika kelai ngimbai tulang nya, ngambika orang ke numbak kubur ulih datai lalu nguburka iya ba Emperan Bala Soldadu Gok.

¹⁶(Sebuah nengeri ti semak nya dia deka diberi nama ngangkatka bala soldadu nya.) Nya meh jalai menua nya digaga nyadi beresi baru.”

¹⁷ Ku TUHAN Allah Taala bejaku ngagai aku, “Anak mensia, kangauka semua burung enggau jelu datai ari semua endur, ngambika sida makai piring ti disediaka Aku ke sida. Pengerami makai besai nya deka disediaka ba sebelah bukit di menua Israel, alai sida deka bepakaika dagin lalu ngirup darah.

¹⁸Sida deka bepakaika semua bangkai soldadu, lalu ngirup darah orang ke merintah di dunya tu, ti deka dibunuh baka bedus ti lelaki tauka anak domba, tauka kambin, tauka sapi ti lelaki ti gemu.

¹⁹Lebuh Aku munuh orang tu baka ke munuh jelu ti deka diberi nyadika piring, sida burung enggau jelu enda tau enda makai lemak naka ti ulih diempa sida, lalu ngirup darah datai ke sida nyau mabuk.

²⁰Ba mija Aku sida deka makai kuda enggau orang ke nepan kuda, enggau bala soldadu, enggau semua orang ke tau serang, naka ti ulih diempa sida. Aku TUHAN Allah Taala udah bejaku.”

²¹Ku TUHAN bejaku, “Aku deka ngasuh semua bansa meda mulia Aku, lalu ngayanka ngagai sida jalai Aku ngena kuasa Aku bejalaika pemutus penemu Aku ti lurus.

²²Kenyau ari nya orang Israel deka nemu Aku endang TUHAN Allah Taala sida.

²³Lalu semua bansa deka nemu orang Israel udah dibuai ngagai menua Babilon ketegal dosa ti udah dikereja sida ngelaban Aku. Aku ngelengkaka sida lalu ngelakka munsuh sida ngalahka sida, lalu munuh sida lebuh beperang.

²⁴Aku udah meri sida utai ti patut ketegal sida enda tuchi, enggau ketegal penyai sida, lalu Aku ninggalka sida.”

²⁵Ku TUHAN Allah Taala bejaku, “Tang diatu Aku deka kasihka peturun Jakop, orang Israel, lalu ngasuh sida nyadi kaya-raja baru. Aku deka nyaga nama Aku ti kudus.

²⁶Lebuh sida diau likun baru di menua sida empu, lalu enda agi diemba orang, nya baru sida deka badu agi ingatka chara sida udah dipechat ketegal sida udah nipu Aku.

²⁷Kena Aku mandangka Diri endang kudus ngagai mayuh bengkah bansa, Aku deka mai bala nembiak Aku pulai baru ari semua menua munsuh sida.

²⁸Nya baru bala nembiak Aku deka nemu Aku endang TUHAN Allah Taala sida. Sida deka nemu nya laban Aku udah ngasuh sida kena tangkap, lalu diatu Aku ngempuruka sida lalu mai sida pulai baru ngagai menua sida empu. Siku pen nadai meh sida deka ditinggalka.

²⁹Aku deka nuang Roh Aku atas orang Israel, lalu enda agi ngelengkaka sida. Aku TUHAN Allah Taala udah bejaku.”