Read Iban Esekiel 4 Bible Online

Esekiel 4 - Iban bible

Esekiel 4

¹Ku Allah Taala bejaku, “Anak mensia, ambi sigi batu bata, engkahka iya di mua nuan, lalu gaga kar nengeri Jerusalem ba batu bata nya.

²Udah nya, kena ngambarka nengeri nya dikelulung, gaga parit ti dalam, kuta tanah, kem, enggau kayu ti dikena ngentung pintu kuta, ngelingi nengeri nya.

³Ambi siti kali besi, lalu engkahka iya baka kuta, kena nyeraraka nuan ari nengeri nya. Kuingka mua nuan tunga ngagai nengeri nya. Nengeri nya dikelulung, lalu nuan empu ke ngelulung nengeri nya. Tu deka nyadi siti tanda ke orang Israel.

⁴“Udah nya nuan gali singit ke kiba, lalu Aku[4] deka ngengkahka ba nuan semua penyalah orang Israel. Nuan deka gali dia 390 hari natka pemerinsa ketegal penyalah sida, sehari ke genap taun orang Israel merinsa natka ukum sida.

⁶Lebuh nuan udah tembu ngereja nya, nuan bekalih ke kanan, lalu natka pemerinsa empat puluh hari ketegal penyalah orang Judah, sehari ke genap taun sida merinsa natka diri diukum.

⁷“Perening enggau bendar ngagai Jerusalem ti dikelulung munsuh. Kedarka jari nuan tunga ngagai nengeri nya, lalu benabi ngelaban nengeri nya.

⁸Aku deka nanchang nuan ngambika nuan enda ulih bekalih, datai ke nengeri nya udah tembu dikelulung.

⁹“Diatu ambi gandum, barli, kachang, retak, jawa enggau tepung gandum ti alus. Champurka semua utai nya, lalu gaga iya nyadi roti. Nya meh utai ti deka diempa nuan dalam kandang tiga ratus semilan puluh hari nuan ti gali singit ke kiba.

¹⁰Nuan tau makai dua ratus tiga puluh gram roti sehari, lalu roti nya enda tau enda mega chukup ke hari siti.

¹¹Nuan deka mega bisi mimit ai irup, dua changkir sehari.

¹²Nuan deka menyadika api ngena tai mensia ti udah rangkai, manggang roti ba api nya, lalu makai roti nya di mua semua orang mayuh.”

¹³Ku TUHAN bejaku, “Tu ngambarka chara orang Israel deka makai pemakai ti enda disagi Adat,[5] lebuh Aku ngachirka sida ngagai menua bukai.”

¹⁴Tang ku aku nyaut, “Anang baka nya, TUHAN Allah Taala! Aku nadai udah kala ngamahka diri. Kenyau ari aku agi mit, aku nadai udah kala makai dagin ari bangkai jelu ti enda temu pemati, tauka dagin ari jelu ti mati laban jelu babas. Aku nadai udah kala makai pemakai ti dikumbai enda tuchi.”

¹⁵Nya alai Allah Taala lalu bejaku, “Barang ku jaku. Aku deka nejuka nuan menyadika api ngena tai sapi, ukai ngena tai mensia, lalu nuan tau manggang roti nuan ba atas nya.”

¹⁶Lalu ku Allah Taala nambahka jaku Iya, “Anak mensia, Aku deka nagang orang mai pemakai ngagai Jerusalem. Orang dia deka balat tusah, sereta irau ati lebuh sida nakar pemakai ti diempa sida, enggau nakar ai irup sida.

¹⁷Roti enggau ai sida deka abis. Sida deka tusah ati, lalu sida deka mati laban dosa sida.”