Read Iban Esekiel 41 Bible Online

Esekiel 41 - Iban bible

Esekiel 41

¹Udah nya orang nya mai aku ngagai bilik tengah, iya nya Endur ti Kudus. Iya nyukat tempuan ti nuju ngagai endur nya. Pemanjai tempuan nya 3 meter[56]

²lalu buka iya lima meter. Penebal dinding nya dua meter setengah ari sepiak-sepiak. Iya nyukat bilik nya: pemanjai bilik nya dua puluh meter, lalu buka iya sepuluh meter.

³Udah nya iya lalu tama ngagai bilik ti di dalam bendar. Iya nyukat tempuan ti nuju ngagai bilik nya. Pemanjai iya satu meter, lalu buka iya tiga meter, dikelingi dinding ti tiga setengah meter penebal.

⁴Iya nyukat bilik nya. Bilik nya sepuluh meter besegi. Bilik nya ngilah bilik tengah. Udah nya iya madahka ngagai aku, “Tu Endur ti Pemadu Kudus.”

⁵Orang nya nyukat penebal dinding ti di dalam ke Rumah Sembiang. Penebal iya tiga meter. Nungking ba dinding ngelingi Rumah Sembiang nya mayuh bilik ti mit, buka dua meter.

⁶Bilik tu beringkat tiga, tiga puluh iti bilik ba siti-siti ringkat. Dinding luar Rumah Sembiang ba siti-siti ringkat mipau agi ari dinding ba ringkat ti di baruh, ngambika bilik nya ulih duduk ba atas dinding Rumah Sembiang nya, lalu enda ibuh dibantilka ngagai dinding nya.

⁷Nya alai, dipeda ari luar, dinding Rumah Sembiang nya baka ke sama penebal ari baruh ke atas. Ngempit ngagai dinding Rumah Sembiang, ari luar, bisi digagaka dua iti tangga ti besai buka, ngambika bisi dikena bejalai ari ringkat ti di baruh ngagai ringkat tengah, enggau ngagai ringkat atas.

⁸Penebal dinding luar ke tiap-tiap iti bilik nya dua meter setengah. Genap iti bilik ti ba tisi utara, enggau tisi selatan Rumah Sembiang, bisi siti pintu penama. Aku bisi meda siti teres, buka dua meter setengah, ngelingi Rumah Sembiang. Teres nya tiga meter ari atas tanah, tang sama peninggi enggau penuduk bilik ti ba dinding Rumah Sembiang. Ba entara teres nya enggau rumah ti dikena bala imam, bisi siti endur ti lapang, buka sepuluh meter, ngelingi Rumah Sembiang.

¹²Ba ujung endur ti lapang nya, muak ari tisi barat Rumah Sembiang, bisi siti rumah ti panjai empat puluh lima meter enggau buka tiga puluh lima meter. Penebal dinding iya dua meter setengah.

¹³Orang nya lalu nyukat Rumah Sembiang nya ari luar. Pemanjai iya 50 meter. Lalu buka tengah laman enggau Rumah Sembiang nya 50 meter.

¹⁴Pemesai buka netak mua Rumah Sembiang nya, nyengkaum tengah laman ti ba sepiak-sepiak Rumah Sembiang nya, mega 50 meter.

¹⁵Iya nyukat pemanjai rumah nya nuju ke barat, nyengkaum tempuan ari sepiak-sepiak rumah nya, lalu pemanjai iya 50 meter. Bilik penama ngagai Rumah Sembiang, Endur ti Kudus, enggau Endur ti Pemadu Kudus

¹⁶semua di lapis ngena kayu kenyau ari geladak nyentuk ngagai jenila. Jenila nya ulih ditutup.

¹⁷Dinding Rumah Sembiang muak ari dalam, kenyau ari baruh nyentuk ngagai ari atas pintu, abis diukir magang

¹⁸ngena gambar kayu engkerema enggau gambar bala melikat cherub ti besayap, ti betunda-udi, meling bilik nya. Genap iku melikat cherub nya bisi dua iti mua:

¹⁹mua mensia ti nguing tunga ngagai sekayu engkerema ti ba tisi sepiak, enggau mua singa ti nguing tunga ngagai sekayu engkerema ba tisi sepiak. Nya meh gaya utai nya ngelingi bilik nya,

²⁰kenyau ari geladak nyentuk ngagai endur ba ari atas pintu.

²¹Tiang ke Endur ti Kudus besegi empat. Di mua penama ngagai Endur ti Pemadu Kudus bisi siti utai ti baka

²²alta ti digaga ari kayu. Peninggi iya 1.5 meter lalu buka iya 1 meter. Tiang sukut iya, penuduk enggau tisi iya digaga ari kayu magang. Ku orang nya madahka ngagai aku, “Tu mija ti di mua TUHAN.”

²³Ba ujung tempuan nya ti nuju ngagai Endur ti Kudus bisi siti pintu. Lalu pintu pen bisi mega ba ujung tempuan ti nuju ngagai Endur ti Pemadu Kudus.

²⁴Tiap tiap pintu nya dua iti berimbai, lalu tebuka ba tengah-tengah.

²⁵Gambar kayu engkerema enggau melikat cherub ti besayap bisi diukirka ba pintu ti nuju ngagai Endur ti Kudus, baka ke ba dinding. Luar pintu ngagai bilik penama dilapis enggau kayu.

²⁶Ba tisi bilik tu bisi jenila, lalu dinding bilik tu dilagu ngena ukir gambar kayu engkerema.