Read Iban Esekiel 42 Bible Online

Esekiel 42 - Iban bible

Esekiel 42

¹Udah nya orang nya lalu mai aku ngagai tengah laman ti di luar, lalu nguluka aku ngagai sebuah rumah ti ba tisi utara Rumah Sembiang, enda jauh ari rumah ti ba ujung barat Rumah Sembiang nya.

²Rumah nya panjai 50 meter, lalu buka iya 25 meter.

³Tisi sepiak nunga ngagai endur siti ti lapang, ti buka 10 meter, ti ngimbai Rumah Sembiang, lalu tisi sepiak nunga ngagai siti jalai ti ba tengah laman ti di luar. Rumah nya tiga ringkat, iya ke di atas disuika jauh mimit ari ringkat ti di baruh.

⁴Ba tisi utara rumah nya bisi siti tempuan. Buka iya 5 meter, lalu pemanjai iya 50 meter, lalu bisi penama ba tisi nya.

⁵Bilik ti ba ringkat atas rumah nya, sempit agi ari bilik ti ba ringkat tengah enggau ringkat ti di baruh, laban bilik nya udah disuika jauh agi.

⁶Semua bilik ti ba ringkat tiga iti nya digaga ba atas teres, lalu enda didudukka ba atas tiang baka rumah ti bukai ba tengah laman nya.

⁷Ba ringkat baruh, 25 meter dinding luar rumah nya endang dinding aja, setengah ari semua pemanjai dinding nya, lalu dalam setengah ti nangkanka nya, ti panjai 25 meter, mayuh bilik. Ba ringkat ti di atas bendar, semua ringkat nya penuh laban bilik.

⁹Ari baruh bilik nya, ba ujung rumah nya ti ngadap ke timur, ba endur alai dinding tengah laman nya berengkah, bisi siti penama ngagai tengah laman ti di luar. Ba tisi selatan[57] Rumah Sembiang, bisi sebuah rumah ti sebaka gaya enggau rumah nya, ti enda jauh ari rumah ti tunga ke barat Rumah Sembiang.

¹¹Di mua rintai bilik nya bisi siti tempuan, baka ke ba tisi utara. Pemesai tempuan nya sebaka gaya enggau tempuan di tisi utara.

¹²Ari baruh bilik ti ba tisi selatan, bisi siti bilik, ba ujung timur alai dinding nya berengkah.

¹³Ku orang nya bejaku enggau aku, “Rumah dua buah tu kudus. Nya meh endur alai sida imam tama betemu enggau TUHAN, makai piring ti pemadu kudus. Laban bilik nya kudus, imam deka nyimpan piring ti pemadu kudus dia, iya nya, piring tepung, enggau piring ti diberi kena muai dosa, tauka kena bebayar.

¹⁴Lebuh sida imam udah tama ngagai Rumah Sembiang, lalu deka bejalai ngagai tengah laman, sida enda tau enda ninggalka, dalam bilik nya, gari ti kudus ti dikena sida lebuh sida gawa ke TUHAN. Sida enda tau enda ngerasukka gari bukai sebedau sida pansut ngagai endur alai orang mayuh begempuru.”

¹⁵Lebuh orang nya udah tembu nyukat Rumah Sembiang nya muak ari dalam, iya lalu mai aku pansut nengah pintu timur, lalu udah nya nyukat endur ti muak ari luar.

¹⁶Iya mai batang penyukat lalu nyukat tisi timur, lalu pemanjai iya 250 meter.

¹⁷Udah nya iya nyukat tisi utara, tisi selatan, enggau tisi barat. Pemanjai sida sama 250 meter magang.

²⁰Kandang endur alai Rumah Sembiang nya besegi empat, lalu dikelingi enggau dinding. Pemanjai dinding ba tisi sepiak-sepiak nya 250 meter. Dinding nya nyeraraka utai ti kudus ari utai ti enda kudus.