Read Iban Esekiel 43 Bible Online

Esekiel 43 - Iban bible

Esekiel 43

¹Orang nya mai aku ngagai pintu ti adap ke timur,

² lalu dia aku tepedaka penampak mulia Allah Taala ke disembah orang Israel datai ari timur. Nyawa Allah Taala munyi segum pangka gelumbang, lalu tanah beperenching laban penampak mulia Iya.

³Genera nya sebaka enggau genera ti udah dipeda aku lebuh Allah Taala datai ngerusak Jerusalem, enggau genera ti dipeda aku ba tebing Sungai Kebar. Udah nya aku lalu nyungkurka diri ke tanah.

⁴Penampak ti beperenching nya bejalai nengah pintu timur, lalu tama ngagai Rumah Sembiang.

⁵Roh TUHAN ngangkatka aku lalu mai aku ngagai tengah laman ti di dalam, lalu aku meda Rumah Sembiang nya penuh laban mulia TUHAN.

⁶Orang nya bediri ngimbai aku dia, lalu aku ninga TUHAN bejaku ngagai aku ari dalam Rumah Sembiang nya.

⁷“Anak mensia, tu endur alai kerusi diraja Aku. Aku deka diau ditu begulai enggau orang Israel, lalu merintah sida belama iya. Orang Israel enggau raja sida deka badu agi ngamahka nama Aku ti kudus enggau pengawa besembahka petara bukai, tauka nguburka bangkai [58] raja sida ke mati.

⁸Sida raja ngaga semetung enggau tiang pintu ke istana sida ngimbai semetung enggau tiang pintu Rumah Aku, datai ke semina dinding aja nyeraraka sida ari Aku. Sida udah ngereja penyai lalu ngamahka nama Aku ti kudus. Nya alai, Aku ringat lalu ngerusak sida.

⁹Diatu sida enda agi tau nyembah petara bukai, lalu badu agi mindahka bangkai[59] raja sida. Enti sida enda agi ngereja utai nya, nya baru Aku deka diau enggau sida belama iya.

¹⁰Lalu ku TUHAN nampung jaku Iya, “Anak mensia, padahka ngagai orang Israel pasal Rumah Sembiang nya, lalu asuh sida beratika pelan Rumah nya, ngambika sida nemu malu ke penyai diri.

¹¹Udah nya, enti sida nemu maluka utai ti udah dikereja sida, padahka pelan Rumah Sembiang nya ngagai sida: tukuh iya, pintu ti ditengah tama-pansut, gaya iya, jalai semua utai diatur dalam Rumah Sembiang nya, enggau semua adat ti dikena dalam Rumah Sembiang nya. Tuliska semua utai nya ke sida ngambika sida ulih meda chara semua utai dia diatur, lalu ulih bejalaika semua atur nya.

¹²Tu adat Rumah Sembiang: Semua kandang ti ngelingi Rumah Sembiang ba tuchung bukit nya, tuchi sereta kudus magang.”

¹³ Baka tu ku gaya alta ti disukat ngena penyukat ti dikena nyukat Rumah Sembiang. Ngelingi penuduk alta nya bisi siti parit. Penalam parit nya 50 sentimeter lalu buka iya 50 sentimeter, lalu lilit tisi parit nya ari luar 25 sentimeter peninggi.

¹⁴Peninggi ringkat ti pemadu baruh nya 1 meter. Ringkat ti kedua berengkah 50 sentimeter ngejang ari tisi ringkat ti keterubah, ngeliling alta nya, lalu peninggi iya 2 meter. Ringkat ti ketiga mega berengkah 50 sentimeter ngejang ari tisi ringkat ti kedua, ngeliling alta nya.

¹⁵Ringkat ti ketiga tu endur alai nunu piring. Peninggi iya mega 2 meter. Tanduk ba empat iti sukut alta nya tinggi agi ari puchuk alta nya empu.

¹⁶Geladak alta nya besegi empat, 6 meter pemanjai ba tisi sepiak-sepiak.

¹⁷Ringkat ti kedua mega besegi empat, 7 meter pemanjai ba tisi sepiak-sepiak, lalu bisi lilit ti tinggi 25 sentimeter ba tisi luar ke ringkat nya. (Buka parit iya 50 sentimeter.) Tangga kena niki ngagai alta nya ba tisi ti muak ke timur.

¹⁸ Ku TUHAN Allah Taala bejaku enggau aku, “Anak mensia, pendingka utai ti dipadahka Aku ngagai nuan. Lebuh alta nya digaga, nuan enda tau enda nunu piring ba iya lalu mechik iya ngena darah jelu ti diberi nyadika piring.

¹⁹Semina imam ari raban bansa Lewi, ke datai ari peturun Sadok aja tau tama ngagai endur Aku lalu gawa ke Aku. Aku TUHAN Allah Taala ngasuh utai tu dikereja baka tu. Nuan deka meri ngagai sida siku sapi ti lelaki ti agi biak nyadika piring pengampun dosa.

²⁰Nuan enda tau enda ngambi sekeda darah jelu nya, lalu malitka iya ngagai tanduk sukut alta nya, ba sukut ringkat ti kedua, enggau ngelingi semua tisi iya. Nya meh jalai nuan nuchi lalu nyeraraka alta nya.

²¹Nuan enda tau enda ngambi sapi ti lelaki ti diberi nyadika piring pengampun dosa, lalu nunu iya ba endur ti udah diletak ari luar kandang Rumah Sembiang.

²²Hari siti nuan enda tau enda ngambi siku kambin ti lelaki, ti nadai penimpang, lalu meri iya nyadika piring pengampun dosa. Tuchi alta nya ngena darah kambin nya, baka nuan ke nuchi iya ngena sapi ti lelaki nya.

²³Lebuh nuan udah tembu ngereja utai nya, ambi siku sapi ti lelaki ti agi biak, enggau siku bedus ti lelaki ti agi biak, ti sama nadai penimpang,

²⁴lalu bai jelu dua iku nya ngagai Aku. Sida imam deka ngerabuka garam ba jelu dua iku nya, lalu nunu jelu nya nyadika piring.

²⁵Tiap hari, dalam kandang tujuh hari, nuan enda tau enda meri siku kambin, siku sapi ti lelaki, enggau siku bedus ti lelaki nyadika piring pengampun dosa. Semua jelu nya enda tau enda jelu ti nadai penimpang magang.

²⁶Dalam kandang tujuh hari bala imam enda tau enda nyeraraka alta nya, lalu nyendiaka iya dikena.

²⁷Lepas seminggu nya, bala imam enda tau enda belabuh meri ba alta nya piring tunu, enggau piring pemaik ke orang mayuh. Nya baru Aku deka gaga ati ke semua kita. Aku TUHAN Allah Taala, udah bejaku.”