Read Iban Esekiel 44 Bible Online

Esekiel 44 - Iban bible

Esekiel 44

¹Orang nya lalu nguluka aku ngagai pintu luar ti ba tisi timur kandang Rumah Sembiang. Pintu nya ditutup,

²lalu ku TUHAN bejaku ngagai aku, “Pintu tu deka mengkang ditutup, lalu enda tau dibuka. Nadai mensia tau tama nengah pintu tu, laban Aku TUHAN Allah Taala ke disembah orang Israel, udah tama nengah pintu tu. Nya alai pintu tu deka mengkang ditutup.

³Semina raja aja tau tama kia lalu makai pemakai ti kudus, di mua Aku. Iya enda tau enda tama enggau pansut ari pintu besai nengah bilik penama ti ba ujung ti muak ari dalam.”

⁴Udah nya orang nya mai aku nengah pintu utara ngagai mua Rumah Sembiang. Aku malik lalu tepedaka Rumah Sembiang penuh laban mulia TUHAN. Aku lalu nyungkurka diri ke tanah.

⁵TUHAN lalu bejaku ngagai aku, “Anak mensia, peratika semua utai ti dipeda enggau didinga nuan. Aku deka madahka ngagai nuan atur enggau adat ke Rumah Sembiang. Peratika enggau manah sapa ti tau tama-pansut ari Rumah Sembiang, lalu sapa ti enda tau.

⁶“Padahka ngagai orang Israel ke selalu deka angkat ngelaban, Aku TUHAN Allah Taala enggai agi meda utai ti jai ti dikereja sida.

⁷Sida udah ngamahka Rumah Aku laban sida udah nejuka orang ari bansa bukai ti enda ditutus, orang ke enda ngasika Aku, tama ngagai Rumah Aku lebuh lemak enggau darah ari piring benung diberi ngagai Aku. Nya alai bala nembiak Aku udah ngelanggar sempekat Aku ngena semua utai ti jai ti udah dikereja sida.

⁸Sida enda ngereja pengawa ti kudus dalam Rumah Aku, tang udah ngasuh orang bansa bukai ngereja pengawa nya.

⁹“Aku TUHAN Allah Taala madahka, nadai orang kampar ti enda ditutus, nadai orang ke enda ngasika Aku, tau tama ngagai Rumah Aku. Orang ari menua bukai ti diau begulai enggau orang Israel, pen enda mega tau.”

¹⁰Ku TUHAN bejaku ngagai aku, “Aku deka ngukum orang Lewi ti udah enggau orang Israel ti bukai ninggalka Aku lalu nyembah engkeramba.

¹¹Sida tau gawa ke Aku dalam Rumah Sembiang nyaga pintu, enggau ngereja pengawa dalam Rumah Aku. Sida tau munuh jelu ti diberi orang mayuh nyadika piring tunu, enggau nyadika piring, lalu sida enda tau enda gawa bekereja ke orang mayuh.

¹²Tang laban sida ngereja pengawa besembahka engkeramba ngarika orang Israel, lalu nguluka orang Israel bedosa, Aku TUHAN Allah Taala besumpah, sida enda tau enda diukum.

¹³Sida enda tau gawa ke Aku nyadi imam, tauka datai semak ngagai sebarang utai ti kudus, tauka tama ngagai Endur ti Pemadu Kudus. Tu meh ukum ketegal utai ti jai ti udah dikereja sida.

¹⁴Aku diatu meri ngagai sida pengawa ti kasar ti enda tau enda dikereja dalam Rumah Sembiang.”

¹⁵Ku TUHAN Allah Taala bejaku, “Sida imam ari raban bansa Lewi, ke datai ari peturun Sadok, mengkang gawa ke Aku enggau ati ti tetap dalam Rumah Sembiang, lebuh semua orang Israel ti bukai udah ninggalka Aku. Nya alai diatu, sida nya meh orang ke gawa ke Aku lalu datai di mua Aku, meri lemak enggau darah ari piring, ngagai Aku.

¹⁶Semina sida aja tau tama ngagai Rumah Aku, gawa ba alta Aku, lalu nguluka orang besembiang dalam Rumah Aku.

¹⁷ Lebuh sida tama pintu besai ngagai tengah laman ti di dalam Rumah Sembiang, sida enda tau enda ngerasukka pekayan ti digaga ari kain linin. Sida enda tau ngena utai ti digaga ari bulu bedus lebuh sida gawa dalam tengah laman ti di dalam, tauka dalam Rumah Sembiang.

¹⁸Ngambika sida enda peluh, sida enda tau enda ngena labung ti digaga ari kain linin, enggau tanchut panjai ti digaga ari kain linin, tang sida enda tau ngena belulang.

¹⁹ Sebedau sida mansang ngagai tengah laman ti di luar, alai orang mayuh ke begempuru, sida enda tau enda dulu muka gari ti dikena sida bekereja dalam Rumah Sembiang, lalu ninggalka gari nya dalam bilik ti kudus. Sida enda tau enda ngerasukka gari bukai, ngambika gari ti kudus nya enda ngemediska orang mayuh.[60]

²⁰ “Sida imam enda tau ngukur pala sida, tauka nejuka buk sida panjai. Sida semina tau nguntin buk sida penumbas iya pemanjai.

²¹ Imam enda tau ngirup wain sebedau sida tama ngagai tengah laman ti di dalam.

²² Imam enda tau jadi enggau indu ke udah belaki. Iya semina tau jadi enggau indu orang Israel ti agi dara bungas, tauka balu imam ti bukai.

²³ “Sida imam enda tau enda ngajar bala nembiak Aku ngelala bagi utai ti kudus enggau utai ti enda kudus, enggau entara utai ti tuchi enggau ti enda tuchi.

²⁴Lebuh orang bechara, sida imam enda tau enda ngatur pechara nya nitihka Adat Aku. Sida enda tau enda ngintu gawai pengarap nitihka atur enggau Adat Aku, lalu sida enda tau enda ngintu Hari Sabat kudus.

²⁵ “Imam enda tau ngamahka diri beteguka bangkai mensia, kelimpah ari bangkai apai indai iya empu, anak iya, tauka menyadi lelaki tauka menyadi indu iya ke apin belaki.

²⁶Lebuh iya udah nyadi tuchi baru, iya enda tau enda nganti tujuh hari

²⁷lalu udah nya tama ngagai tengah laman ti dalam Rumah Sembiang, lalu ngenjuk piring kena nuchi diri, ngambika iya tau gawa dalam Rumah Sembiang baru. Aku TUHAN Allah Taala, udah bejaku.”

²⁸ “Sida imam nadai diberi pesaka. Aku tu meh pesaka sida, lalu kita enda tau meri sida pesaka di menua Israel. Aku tu meh pesaka sida.

²⁹ Sida deka makai pemeri ti digaga ari gandum, piring pengampun dosa, enggau piring kena mayar penyalah. Lalu semua utai ti diserahka ngagai TUHAN dalam menua Israel, deka diempu sida magang.

³⁰Sida imam enda tau enda diberi utai ti pemadu manah ari utai ti terubah iya diketau, enggau ari semua utai bukai ti diberi ngagai Aku. Genap kali orang mayuh manggang roti, sida enda tau enda meri ngagai sida imam tuku roti ti terubah, nyadika piring. Nya baru Aku deka merekatka ruang bilik sida.

³¹ Sida imam enda tau makai burung tauka jelu ti enda ditemu pemati, tauka dibunuh jelu bukai.”