Read Iban Esekiel 45 Bible Online

Esekiel 45 - Iban bible

Esekiel 45

¹Lebuh menua nya dibagi ngagai siti-siti raban bansa, sebagi enda tau enda diserahka ngagai TUHAN. Pemanjai iya enda tau enda 12.5 kilometer, lalu buka iya 10 kilometer.[61] Semua tanah nya kudus magang.

²Dalam kandang endur nya enda tau enda bisi siti kandang ti besegi empat, endur alai Rumah Sembiang bediri. Pemanjai tisi sepiak-sepiak 250 meter, dikelingi endur ti lapang buka 25 meter.

³Setengah ari endur nya, ti panjai 12.5 kilometer enggau buka 5 kilometer, enda tau enda disukat, nyadika endur alai nirika Rumah Sembiang, endur ti pemadu kudus.

⁴Endur nya deka nyadi endur ti kudus dalam menua nya, ti diagihka ngagai bala imam ke gawa ke TUHAN dalam Rumah Sembiang.

⁵Setengah ti bukai dalam kandang nya diagihka nyadika pesaka orang Lewi ke bekereja dalam Rumah Sembiang. Endur nya deka bisi nengeri alai sida diau.[62]

⁶Ngimbai endur ti kudus nya bisi siti sitak, ti panjai 12.5 kilometer enggau buka 2.5 kilometer, ti enda tau enda diagihka nyadika endur alai ngaga sebuah nengeri, alai sebarang orang Israel tau diau.

⁷Tanah enda tau enda mega diagihka ngagai raja. Ari garis entara menua ti muak ke barat ari endur ti kudus nya, kandang menua nya deka nganchau ke barat nyentuk ngagai Tasik Tengah. Lalu ari garis entara menua ti muak ke timur, menua nya deka nganchau nyentuk ngagai garis entara menua Israel di timur, ngambika menua nya deka sama pemanjai enggau menua ti diberi ngagai siti raban bansa orang Israel.

⁸Tu meh kandang menua ti deka diberi ngagai raja menua Israel, ngambika iya enda agi nekanka pengidup orang mayuh, tang deka nejuka endur bukai di menua nya diempu raban bansa orang Israel.

⁹Ku TUHAN Allah Taala bejaku, “Kita ke merintah menua Israel kelalu lama udah bedosa! Badu agi kasar enggau orang, lalu badu agi nekanka pengidup orang. Kereja utai ti ngena sereta lurus. Badu agi muru bala nembiak Aku ari tanah sida, ku TUHAN Allah Taala bejaku.

¹⁰ “Semua orang enda tau enda ngena timbang enggau takar ti betul:

¹¹“Satu epah ti dikena nakar utai ti rangkai enda tau enda sebaka enggau satu bat takar ti dikena nakar utai ti basah. Sukat ti diguna nya homer[63] baka tu ku takar: 1 homer = 10 epah = 10 bat

¹²Atur kena nimbang nya baka tu: 20 gerah = 1 sekel[64] 60 sekel = 1 mina

¹³“Tu atur kena kita ngenjuk piring kita: Gandum: sebagi ari enam puluh bagi ari utai ti diketau Barli: sebagi ari enam puluh bagi ari utai ti diketau Minyak kana: sebagi ari seratus bagi ari asil ti datai ari buah kana kita (Takar utai nya ngena bat: 10 bat = 1 homer = 1 kor.) Bedus: siku ari genap dua ratus iku bedus ti diambi ari padang rumput menua Israel “Kita enda tau enda mai piring tepung, jelu ti deka ditunu segala, enggau jelu nyadika piring pemaik, ngambika dosa kita diampun. Aku, TUHAN Allah Taala, ngasuh kita ngereja utai tu.

¹⁶“Semua orang di menua tu enda tau enda mai[65] piring tu ngagai raja menua Israel.

¹⁷Raja nya deka betanggungjawap meri jelu ti deka ditunu segala, piring tepung, enggau piring wain ke semua orang Israel lebuh Gawai Anak Bulan, Hari Sabat, enggau gawai ti bukai. Iya enda tau enda ngenjuk piring pengampun dosa, piring tepung, piring tunu segala, enggau piring pemaik, kena muai dosa orang Israel.”

¹⁸Ku TUHAN Allah Taala bejaku, “Kena satu hari bulan ti kesatu, kita enda tau enda meri siku sapi ti lelaki ti nadai penimpang nyadika piring kena nuchi Rumah Sembiang.

¹⁹Imam deka ngambi sekeda darah ari piring ti dikena muai dosa nya, lalu malitka darah nya ngagai tiang pintu Rumah Sembiang, ba empat iti sukut alta, enggau ba tiang pintu besai ti nuju ngagai tengah laman ti di dalam.

²⁰Kena tujuh hari bulan nya, kita enda tau enda mega ngereja utai nya baru, ngarika sebarang sapa ti udah bedosa enggau enda sengaja, tauka laban sida enda nemu diri udah bedosa. Nya meh jalai kita nguduska Rumah Sembiang.

²¹ “Kena empat belas hari bulan ti kesatu, kita enda tau enda belabuh ngerami Gawai Paska. Dalam kandang tujuh hari semua orang deka makai roti ti enda beragi.

²²Ba hari ti keterubah ke Gawai nya, raja enda tau enda meri siku sapi ti lelaki nyadika piring pengampun dosa iya empu, enggau dosa semua orang mayuh.

²³Genap hari dalam kandang tujuh hari Gawai nya diintu, raja enda tau enda meri tujuh iku sapi ti lelaki enggau tujuh iku bedus ti lelaki, ti nadai penimpang nyadika piring lalu nunu jelu nya segala. Iya enda tau enda mega meri siku kambin ti lelaki tiap hari nyadika piring pengampun dosa.

²⁴Ke genap iku sapi ti lelaki, enggau ke genap iku bedus ti lelaki ti digaga nyadika piring, 17.5 liter gandum, enggau 3 liter minyak kana enda tau enda diberi.

²⁵ “Kena ngintu Gawai Belangkau ti berengkah kena lima belas hari bulan ti ketujuh, raja deka meri, genap hari dalam tujuh hari nya, piring baka ke dikena muai dosa, piring ti deka ditunu segala, enggau piring tepung enggau minyak kana.”