Read Iban Esekiel 47 Bible Online

Esekiel 47 - Iban bible

Esekiel 47

¹ Orang nya nguluka aku pulai baru ngagai mua pintu Rumah Sembiang. Ai bisi pansut ari baruh semetung pintu nya lalu rarat tunga ke timur, tunga ngagai mua Rumah Sembiang. Ai nya rarat ari baruh selatan Rumah Sembiang, lalu mansa tisi selatan alta.

²Orang nya lalu mai aku pansut ari kandang Rumah Sembiang nengah pintu utara, lalu nguluka aku ngagai pintu ti nunga ke timur. Siti sungai ti mit rarat ari tisi selatan pintu nya.

³Ngena batang penyukat iya, iya lalu nyukat 500 meter ngili sungai nya tunga ke timur, lalu ngasuh aku bejalai nengah ai nya. Ai nya semina ngampuhka buku-ali aku.

⁴Udah nya iya nyukat 500 meter baru, lalu ai nya ngampuhka pala patung aku. Iya nyukat 500 meter da agi, lalu ai nya datai ba ikas punggung aku.

⁵Iya nyukat 500 meter da agi, lalu ai dia kelalu dalam datai ke aku nyau enda ulih bejalai nengah ai nya agi. Ai nya kelalu dalam, lalu enda ulih ditengah enti enda nyemerai.

⁶Ku iya bejaku ngagai aku, “Anak mensia, peratika semua utai tu enggau manah.” Udah nya orang nya mai aku pulai baru ke tebing,

⁷lalu lebuh aku datai ba tebing, aku tepedaka mayuh amat kayu ba tebing sepiak-sepiak.

⁸Ku iya bejaku ngagai aku, “Ai tu rarat nengah menua tu tunga ke timur, lalu nurun ngagai Lebak Jordan, terus ngagai Tasik Mati. Lebuh ai sungai tu rarat ngagai Tasik Mati, iya nganti ai ti masin ba tasik nya ngena ai ti tabar.

⁹Enda milih tunga ai sungai nya rarat, endur nya deka bisi semua macham jelu enggau ikan. Ai sungai nya deka ngasuh ai dalam Tasik Mati tabar, lalu enda milih tunga ai nya rarat, iya deka ngasuh utai dia idup.

¹⁰Orang berikan deka seruran bisi ba tebing nya nyembui pukat sida kenyau ari Mata Ai di En-gedi, nyentuk ngagai Mata Ai di En-eglaim. Pemayuh macham ikan ba sungai nya deka ngemayuh macham ikan ti ba Tasik Tengah.

¹¹Tang ai ba paya enggau ba letung sepemanjai tebing sungai nya masin. Ai dia deka nyadi endur alai orang ngulihka garam.

¹² Ba tebing sepiak-sepiak sungai nya, semua macham kayu deka tumbuh lalu mansutka utai ti tau diempa. Daun sida enda nemu layu, lalu sida enda ngetu bebuah. Sida mansutka buah tiap bulan, laban sida bulih ai ari sungai ti rarat ari Rumah Sembiang. Kayu dia deka mansutka pemakai, lalu daun sida deka dikena ngeraika orang.”

¹³Ku TUHAN Allah Taala bejaku, “Tu garis entara menua ke menua ti deka dibagi ngagai dua belas raban bansa orang Israel, lalu raban bansa Josep deka nerima dua iti bagi.[68]

¹⁴Aku udah besemaya ngena sumpah enggau bala aki ini kita, deka meri sida menua tu. Nya alai, diatu bagi meh menua tu ulih kita.

¹⁵“Garis entara menua di utara berengkah ba Tasik Tengah terus ke timur ngagai nengeri Hetlon, ngagai Lebo-hamat, ngagai nengeri Sedad,[69]

¹⁶ngagai nengeri Berotah enggau Sibraim (nengeri nya ba entara menua perintah Damaskus enggau menua perintah Hamat), lalu ngagai nengeri Tikon (ba garis entara menua ke pelilih menua Hauran).

¹⁷Nya alai garis entara menua di utara berengkah ari Tasik Tengah lalu nuju ke timur ngagai nengeri Enon, ti tunga ke utara Damaskus lalu garis entara menua enggau Hamat tunga ke utara garis entara menua nya.

¹⁸“Garis entara menua di timur berengkah ba endur entara menua Damaskus enggau menua Hauran, lalu nuju ke selatan. Sungai Jordan nyadika garis entara menua kena nyeraraka menua Israel di barat enggau menua Giliat di timur, nyentuk ngagai Tamar ba Tasik Mati.

¹⁹“Garis entara menua di selatan berengkah ba Tamar lalu nuju ke selatan-barat ngagai mata ai Kades-meribah lalu udah nya nuju ke utara-barat niti garis entara menua Ejip, ngagai Tasik Tengah.

²⁰“Garis entara menua di barat nya Tasik Tengah, terus ke utara ngagai siti endur ti tunga ke barat Lebo-hamat.

²¹“Bagi menua tu ngagai raban bansa kita.

²²Menua tu nyadika pesaka kita. Orang ari menua bukai ti diau begulai enggau kita, lalu udah beranak betelesak di menua tu, enda tau enda bisi ungkup lebuh kita magi menua tu. Sida enda tau enda digaga sebaka enggau peranak orang Israel, lalu enda tau enda enggau bechabut undi ngambi ungkup menua sama enggau raban bansa orang Israel.

²³Semua orang bansa bukai ke diau ngentapka diri di menua tu deka nerima ungkup sama enggau raban bansa ti enggau sida begulai diau. Aku TUHAN Allah Taala, udah bejaku.”