Read Iban Esekiel 5 Bible Online

Esekiel 5 - Iban bible

Esekiel 5

¹Ku TUHAN bejaku, “Anak mensia, ambi pedang ti tajam, lalu kukur ragum enggau semua buk nuan. Udah nya timbang buk nya, lalu bagi buk nya ngagai tiga bagi.

²Tunu sebagi ari buk nya dalam nengeri lebuh pengawa ngelulung nya udah tembu. Ambi sebagi ti bukai, lalu pepat iya ngena pedang nuan lebuh nuan bejalai di luar nengeri nya. Taburka sebagi ti bukai ngagai angin, lalu Aku deka begagaika lalu mantap sida ngena pedang.

³Taruh dua tiga lambar buk, lalu bungkus sida dalam lepi gari nuan.

⁴Udah nya pansutka dua tiga lambar baru, lalu buai ngagai api ngambika angus. Api ari nya deka nyerarai ngagai semua bansa orang Israel.”

⁵Ku TUHAN Allah Taala bejaku, “Perening ngagai Jerusalem. Aku ngengkahka iya ba tengah-tengah dunya, dikelingi semua bansa bukai.

⁶Tang Jerusalem angkat ngelaban jaku Aku, lalu ngayanka diri lebih jai agi ari bansa bukai, lebih agi enda ngasi ari menua bukai ti ngelingi iya. Jerusalem udah nulak jaku Aku lalu enggai nitihka Adat Aku.

⁷Nya alai, Jerusalem, diatu pendingka utai ti disebut Aku TUHAN Allah Taala. Nuan udah balat agi ngenusahka Aku ari bansa ti ngelingi nuan, laban nuan enda ngasika Adat Aku, enda nitihka pesan Aku. Nuan udah nitihka adat asal bansa bukai.

⁸Nya alai Aku TUHAN Allah Taala, madahka ngagai nuan, Aku tu munsuh nuan. Aku deka ngukum nuan di mua semua bansa.

⁹Ketegal nuan udah ngereja utai ti dipegedika Aku, Aku deka ngukum Jerusalem baka ke nadai udah kala dikereja Aku suba tauka jemah ila.

¹⁰ Ketegal nya, bala apai indai di Jerusalem deka bepakaika anak sida, lalu bala anak deka bepakaika apai indai sida. Aku deka ngukum nuan, lalu ngachirka sebarang orang bukai ti agi idup ngagai semua endur.

¹¹“Nya alai, laban Aku endang Allah Taala ti idup - tu jaku TUHAN Allah Taala - laban nuan udah ngamahka Rumah Aku ngena semua utai ti jai sereta dipegedika Aku, Aku deka munuh nuan enggau nadai pengasih.

¹²Sebagi ari tiga bagi bala nembiak nuan deka mati laban penyakit enggau laban lapar pungkang dalam nengeri tu. Sebagi ari tiga bagi deka dibunuh ngena pedang di luar nengeri tu, lalu Aku deka ngerabuka sebagi ari tiga bagi ti tinggal ngagai angin, lalu Aku deka begagaika sida lalu mantap sida ngena pedang.

¹³“Nuan deka ngasaika semua kuasa pengeringat enggau pemedis ati Aku, datai ke Aku nyau puas ati. Lebuh semua utai tu nyadi, nya baru nuan deka arapka Aku ti TUHAN udah bejaku enggau nuan ketegal Aku ringat ngagai nuan laban nuan udah enda tetap ati ngagai Aku.

¹⁴Semua orang ari mayuh bengkah bansa ti ngelingi nuan, ti mansa nuan, deka enchebirka mulut ngeleseka nuan, lalu enggai datai semak nuan.

¹⁵“Lebuh Aku ringat pedis ati ngagai nuan lalu ngukum nuan, semua bansa ti ngelingi nuan deka takut. Sida deka kejika nuan, lalu beduan nuan.

¹⁶Aku deka nutup penatai pemakai nuan, lalu nejuka nuan keberuran. Nuan[6] deka ngasaika pemedis lapar baka laja ti tajam ti ditimbakka kena munuh nuan.

¹⁷ Aku deka ngasuh lapar pungkang enggau jelu babas munuh bala anak nuan, lalu ngasuh penyakit, pengachau, enggau perang munuh nuan. Aku ti TUHAN udah bejaku.”