Read Iban Esekiel 6 Bible Online

Esekiel 6 - Iban bible

Esekiel 6

¹Ku TUHAN bejaku ngagai aku,

²“Anak mensia, perening tunga ngagai bukit ti di menua Israel, lalu beri pesan Aku ngagai sida.

³Asuh bukit ti di menua Israel ningaka jaku TUHAN Allah Taala, ningaka utai ti disebut Aku TUHAN Allah Taala ngagai bukit, munggu, darung, enggau lebak: Aku deka ngasuh pedang ngerusak endur alai orang mayuh besembahka engkeramba.

⁴Semua alta deka diruntuhka lalu alta ti alai nunu menyan deka dirubuh. Semua orang ke diau dia deka dibunuh magang di mua engkeramba sida.

⁵Aku deka ngachirka bangkai orang Israel. Aku deka ngachirka tulang sida ngelingi alta nya.

⁶Semua nengeri di menua Israel deka dirusak magang, ngambika semua alta enggau engkeramba sida dipalu redak. Alta alai sida ke nunu menyan deka dipechahka, lalu semua utai ti udah digaga sida deka lesap magang.

⁷Orang deka dibunuh di semua endur, lalu sida ke agi idup deka ngaku Aku tu TUHAN.

⁸“Aku deka nejuka sekeda sida enda dibunuh, lalu diachirka ngagai mayuh bengkah bansa,

⁹alai sida deka dibuai. Dia sida deka ingatka Aku lalu nemu Aku udah ngukum sida, lalu ngemaluka sida,[7] laban sida enda tetap ati lalu udah ninggalka Aku, lalu sida rindu agi ke engkeramba ari ti rinduka Aku. Lalu sida deka begedika diri empu ketegal penyai enggau utai ti kamah ti udah dikereja sida.

¹⁰Sida deka nemu Aku endang TUHAN, lalu jaku tangkan ti diberi Aku nya ukai jaku ngapa.”

¹¹Ku TUHAN Allah Taala bejaku, “Pulaska jari! Enditka kaki nuan! Nyabak sinu ati ketegal semua penyai, semua utai ti dipegedika, ti udah dikereja orang Israel. Sida deka mati beperang, tauka mati keberuran, tauka mati laban penyakit.

¹²Sida ke jauh deka sakit lalu mati. Sida ke semak, deka mati beperang. Sida ke agi idup deka mati keberuran. Sida deka ngasaika semua kuasa pengeringat Aku.

¹³Bangkai sida deka ngachir begulai enggau bala engkeramba, enggau ngelingi alta, ngachir ba sebelah munggu ti tinggi, ba tuchung semua bukit, di baruh semua pun kayu enggau semua pun kayu oak ti besai, ba semua endur ti udah alai sida nunu piring ke engkeramba sida. Udah nya baru semua orang deka nemu Aku endang TUHAN.

¹⁴Sigi amat, Aku deka ngunjurka jari Aku lalu ngerusak menua sida. Aku deka ngaga menua nya nyadi menua ti kusi, berengkah ari menua puang ti di selatan nyentuk ngagai nengeri Riplah di utara. Nadai siti menua ti alai orang Israel diau dikelaungka. Nya baru semua orang deka nemu Aku endang TUHAN.”