Read Iban Esekiel 7 Bible Online

Esekiel 7 - Iban bible

Esekiel 7

¹Ku TUHAN bejaku ngagai aku,

²“Anak mensia, tu utai ti disebut Aku TUHAN Allah Taala ngagai menua Israel: Tu meh pengujung ke semua menua Israel!

³“Israel, pengujung nuan udah datai. Nuan deka ngasaika pengeringat Aku, laban Aku ngakim nuan ketegal utai ti udah dikereja nuan. Aku deka malas semua ulah nuan ti jai.

⁴Aku enda ngalau nuan, tauka kasihka nuan. Aku deka ngukum nuan ketegal utai ti jai ti udah dikereja nuan, ngambika nuan nemu Aku endang TUHAN.”

⁵Tu utai ti disebut TUHAN Allah Taala: “Penusah ti besai deka betangkan-tangkan ninggang nuan.

⁶Semua utai udah abis magang. Tu meh pengujung iya. Nuan tu abis.

⁷Kita ti diau di menua tu deka abis magang. Maya nyau semak alai nadai agi pengerami ba endur alai besembiang ba sebelah bukit, tang semina penyarut aja.[8]

⁸Enda lama da agi kita deka ngasaika semua kuasa pengeringat Aku. Aku ngakim kita ketegal utai ti udah dikereja kita, lalu Aku deka malas semua ulah kita ke jai.

⁹Aku enggai ngalau kita, tauka kasihka kita. Aku deka ngukum kita ketegal utai ti jai ti udah dikereja kita, ngambika kita nemu Aku endang TUHAN, lalu Aku tu meh Iya ti ngukum kita.”

¹⁰Hari penusah ti besai nyau deka datai. Pengachau balat amat nyadi. Penyumbung balat amat nyadinyau nyadi.[9]

¹¹Pengachau ngasuh penyai balat agi nyadi. Nadai siti utai sida agi tinggal, nemuka nya pengaya, pemanah gaya, tauka mulia.

¹²Maya nyau deka datai. Hari nyau semak alai pengawa ti bebeli enggau bejual nadai reti agi, laban ukum Allah Taala deka ninggang semua mensia.

¹³Nadai orang dagang sempat mulaika ungkus diri, laban Allah Taala ringat ngagai semua mensia. Sida ke jai enda ulih idup.[10]

¹⁴Terumpit disepu, lalu semua mensia sedia magang. Tang nadai orang mansang beperang, laban Allah Taala ringat ngagai semua mensia.

¹⁵Orang bamuk ba sebelah jalai raya, lalu orang ke diau di rumah keberuran lalu kena laban penyakit. Barang sapa pansut ari nengeri deka mati beperang, lalu semua orang ke diau di nengeri deka kena laban penyakit sereta keberuran.

¹⁶Sekeda orang ulih ngerarika diri ngagai bukit baka burung achang ti terebai ari lebak. Semua orang nya deka bedemuh ketegal dosa sida.[11]

¹⁷Semua orang nya lembut tulang, lalu patung sida getar-getar.

¹⁸Sida deka ngerasukka kain guni, lalu sida deka getar-getar. Pala sida deka dikukur, lalu semua sida deka dipechat magang.

¹⁹Sida deka nikauka emas enggau pirak sida ngagai jalai raya baka ke muai uras, laban pirak enggau emas sida enda ulih ngelepaska sida lebuh TUHAN mubuhka pengeringat Iya. Sida enda ulih ngena utai nya ngemuaska pengingin sida, tauka ngasuh perut diri kenyang. Emas enggau pirak nya ti udah mai sida bedosa.

²⁰Dulu menya sida temegahka batu ti berega, tang sida udah ngena utai nya begagaka engkeramba. Nya kebuah TUHAN udah ngasuh sida begedika pengaya diri.

²¹Ku TUHAN bejaku, “Aku deka ngasuh orang kampar ngerumpak sida, lalu orang ke ngelanggar adat deka ngerampas semua pengaya sida, lalu ngamahka utai nya.

²²Aku enggai ibuh lebuh sida ngamahka Rumah Sembiang ti dikesayauka Aku, lebuh bala perumpak tama lalu ngamahka iya.

²³“Semua utai nyau charut. Orang di menua nya mayuh amat bebunuhka pangan diri, lalu nengeri penuh laban pengachau.

²⁴Aku deka mai mayuh bengkah bansa ti pemadu jai kitu, lalu ngemendarka sida bempu rumah kita. Bala kita ke lelaki ke pemadu kering deka lemi semengat lebuh Aku ngasuh mayuh bengkah bansa ngamahka endur ti alai kita besembah.

²⁵Kita deka tusah ati. Kita deka ngiga pemaik tang nadai tetemuka iya.

²⁶Penusah ti besai deka datai betangkan-tangkan, lalu berita ti jai deka datai enda putus-putus. Kita deka minta bala nabi mandangka utai ti deka nyadi. Bala imam nadai utai diajar ngagai orang mayuh, lalu bala tuai nadai jaku lalau diberi.

²⁷Raja deka ngulit; anak raja deka nadai agi utai diadang, lalu orang mayuh deka getar-getar takut. Aku deka ngukum kita ketegal semua utai ti udah dikereja kita, lalu Aku deka ngakim kita baka kita ke udah ngakim orang bukai. Tu deka nunjukka Aku tu TUHAN.”