Read Iban Esekiel 8 Bible Online

Esekiel 8 - Iban bible

Esekiel 8

¹Kena lima hari bulan ti keenam, dalam taun ti keenam bala kami udah dibuai ngagai menua Babilon, dia bala tuai orang ke dibuai ari menua Judah bisi duduk enggau aku dalam rumah aku. Kuasa TUHAN Allah Taala lalu ngenyit nurun atas aku.

² Aku engkadah lalu meda utai ti baka gamal mensia ti beapi-api. Ari punggung ke baruh, tubuh iya baka api, lalu ari punggung ke atas iya beperenching baka temaga ti udah dipugar.

³Iya ngulurka utai ti baka jari, lalu nangkap aku ba buk, lalu dalam genera nya, Roh Allah Taala ngangkatka aku ke langit, lalu mai aku ngagai Jerusalem. Iya mai aku ngagai pintu utara Rumah Sembiang, alai orang udah ngengkahka siku engkeramba ti dipegedika Allah Taala.

⁴ Dia aku tepedaka siti penampak ti beperenching, ti nunjukka Allah Taala ke disembah orang Israel bisi dia, baka ke udah dipeda aku lebuh aku ba tebing Sungai Kebar.

⁵Ku Allah Taala bejaku ngagai aku, “Anak mensia, palik tunga ke utara.” Aku malik, lalu dia ba semak alta ti ngimbai penama ngagai pintu besai nya aku tepedaka engkeramba ti balat ngeringatka Allah Taala.

⁶Ku Allah Taala bejaku ngagai aku, “Anak mensia, kati nuan bisi meda utai ti nyadi? Peda nuan utai ti jai ti dikereja orang Israel ditu, ti ngasuh Aku jauh-sejauh ngejangka Diri ari endur Aku ti kudus. Nuan deka meda utai ti lebih agi ngemaluka, ari ti dipeda nuan ditu.”

⁷Iya mai aku ngagai penama ti nuju ngagai tengah laman ti di luar, lalu nunjukka siti lubang ba dinding.

⁸Ku Iya bejaku, “Anak mensia, bumbuska dinding kuta tu ba senentang tu.” Aku lalu mumbuska kuta nya, lalu tetemuka siti pintu.

⁹Ku Iya bejaku enggau aku, “Alai nuan tama ke dalam lalu peda nuan penyai utai ti dikereja sida dia.”

¹⁰Aku tama, lalu bepedaka utai dia. Dinding ba endur nya nyau penuh laban gambar ular enggau jelu bukai ti enda tuchi,[12] enggau utai bukai ti disembah orang Israel.

¹¹Tujuh puluh iku tuai orang Israel bisi dia, nyengkaum Jasaniah anak Sapan. Genap iku sida bela megai pekekas ti dikena nunu menyan, lalu asap pansut ari menyan nya.

¹²Allah Taala lalu nanya aku, “Anak mensia, kati nuan bisi meda utai ti dikereja bala tuai orang Israel ti dipelamka sida? Semua sida nya besembah dalam bilik ti penuh laban engkeramba, laban kenu ku sida, ‘TUHAN enda meda kitai! Iya udah ninggalka menua tu.’ ”

¹³Udah nya TUHAN lalu bejaku ngagai aku, “Nuan deka meda sida ngereja utai ti lebih jai agi ari nya.”

¹⁴Nya alai TUHAN lalu mai aku ngagai pintu utara Rumah Sembiang, lalu nunjukka ngagai aku bala indu ke nyabakka pemati petara Tamus. [13]

¹⁵Ku TUHAN nanya, “Anak mensia, kati nuan bisi meda utai nya? Nuan deka meda utai ti lebih agi jai ari nya.”

¹⁶Iya lalu mai aku ngagai tengah laman ti dalam Rumah Sembiang. Dia ba semak mua pintu endur ti kudus, ba entara alta enggau serambi, bisi kira dua puluh lima iku lelaki. Sida udah nguingka belakang sida ngagai endur ti kudus, lalu meremi tunga ke timur, nyembah mata hari tumbuh.

¹⁷Ku TUHAN bejaku ngagai aku, “Anak mensia, kati nuan bisi meda nya? Orang Judah tu enda puas ati semina ngereja semua utai ti jai, ti udah dipeda nuan ditu, enggau pengawa ti ngerembaika pengachau ngagai serata menua tu. Sida mega enda tau enda datai lalu ngereja semua utai nya dalam Rumah Sembiang tu, lalu nyungkak Aku balat agi ringat. Peda nuan jalai sida ngeleseka Aku ngena jalai ti pemadu jai![14]

¹⁸Sida deka ngasaika semua kuasa pengeringat Aku. Aku enggai ngalau sida, tauka kasihka sida. Sida deka manjung besampi ngagai Aku enggau pengabis penginggar nyawa sida, tang Aku enggai mendingka sida.”