Read Iban Esekiel 9 Bible Online

Esekiel 9 - Iban bible

Esekiel 9

¹Udah nya aku ninga Allah Taala ngangau enggau nyawa ti inggar, “Datai kitu, bala kita ke deka ngukum nengeri tu. Bai senyata kita.”

²Tekala nya enam iku orang lalu datai ari pintu utara Rumah Sembiang, mai senyata siti siku. Sama datai enggau sida bisi siku orang ke ngena kain linin, mai utai dikena nulis. Semua sida datai lalu bediri ngimbai alta temaga.

³Udah nya penampak mulia Allah Taala ke disembah orang Israel lalu angkat ari melikat cherub ti besayap, lalu mindah ngagai mua pintu Rumah Sembiang. TUHAN lalu ngangauka orang ke ngena kain linin,

⁴ “Alai nuan bejalai nengah serata nengeri Jerusalem, lalu lekatka tanda ba kening semua orang ke tusah ketegal semua utai ti jai ti benung dikereja dalam nengeri tu.”

⁵Aku lalu ninga Allah Taala bejaku ngagai sida lelaki ti bukai, “Titihka iya bejalai nengah serata nengeri tu, lalu bunuh orang. Anang kasihka sida.

⁶Bunuh sida lelaki ke tuai umur, lelaki ke agi biak, indu ke agi biak, sida ke indu, enggau bala anak mit. Tang anang negu orang ke bisi tanda ba kening sida. Kita berengkah ari Rumah Aku tu.” Nya alai sida lalu berengkah ba bala tuai ke bediri dalam Rumah TUHAN.

⁷Ku Allah Taala bejaku ngagai sida, “Kamahka Rumah Sembiang. Isi tengah laman Rumah Sembiang enggau bangkai mensia. Kereja nya diatu!” Nya alai sida lalu belabuh bebunuhka orang dalam nengeri nya.

⁸Lebuh pengawa bebunuh nya benung nyadi, aku diau kediri-diri dia. Aku lalu nyungkurka diri ke tanah, lalu ngangau enggau nyawa ti inggar, “TUHAN Allah Taala, nama kebuah Nuan ngemalat nya ringat ngagai Jerusalem datai ke Nuan nyau munuh semua orang ke agi tinggal di menua Israel?”

⁹Allah Taala lalu nyaut, “Orang Israel enggau orang Judah udah bedosa. Sida udah munuh orang di serata menua tu, lalu udah ngisi Jerusalem enggau pengawa ti jai. Sida ngumbai Aku ti TUHAN udah ninggalka menua sida, lalu ngumbai Aku enda meda sida.

¹⁰Tang Aku enggai sinuka sida. Aku deka ngereja utai ngagai sida baka ke udah dikereja sida ngagai orang bukai.”

¹¹Udah nya orang ke ngena kain linin pulai lalu madahka ngagai TUHAN, “Aku udah bejalaika atur Nuan.”