Read Iban Daniel 1 Bible Online

Daniel 1 - Iban bible

Daniel 1

¹ Dalam taun ti ketiga Jehoiakim nyadi raja menua Judah, dia Raja Nebukadnesar menua Babilon datai ngagai Jerusalem lalu ngelulung nengeri nya.

² Lalu TUHAN nyerahka Raja Jehoiakim ngagai jari Raja Nebukadnesar sama enggau reta tengkira ti berega dalam Rumah Sembiang. Lalu Nebukadnesar nabanka sekeda orang tangkap ngagai menua Babilon. Iya mai lalu nyimpan reta tengkira dalam bilik setor rumah petara iya.

³Raja nya ngasuh Aspenas, ti nyadi tuai ke bala pemesai iya, milih orang Israel ke agi biak, ke ari peturun raja, enggau ari peturun orang ke tinggi pangkat,

⁴ke nadai penimpang, sigat, bepenemu-dalam sereta bepelajar, ke ulih bekereja dalam istana raja. Iya ngasuh Aspenas ngajar sida macha enggau nulis jaku orang Babilon.

⁵Raja mega meri atur ngasuh sida tiap hari diberi pemakai enggau wain ti diberi ngagai raban orang ke di istana raja. Lebuh sida udah dilatih tiga taun, sida lalu dibai betemu enggau raja.

⁶Bala sida nya nyengkaum Daniel, Hananiah, Misael, enggau Asariah, ke datai ari raban bansa Judah.

⁷Tuai pemesai nya meri sida nama baru: Daniel dikumbai iya Beltesasar; Hananiah dikumbai iya Sadrak; Misael dikumbai iya Mesak; lalu Asariah dikumbai iya Abednego.

⁸Daniel mutuska runding enggai ngamahka diri makai pemakai raja, tauka ngirup wain ti diirup raja, lalu iya minta Aspenas ngemendarka iya ngereja nya.

⁹Lalu Allah Taala ngasuh Aspenas kasihka Daniel.

¹⁰Tang ku Aspenas bejaku enggau Daniel, “Aku takutka raja; laban raja udah ngeletak utai ti patut diempa enggau diirup kita. Enti iya meda kita kurus agi ari orang bujang ke seumur enggau kita, iya tentu deka munuh aku.”

¹¹Udah nya Daniel lalu bejaku enggau orang jaga ti udah diasuh Aspenas ngemataka sida:

¹²“Awakka nuan nguji kami dalam kandang sepuluh hari. Beri kami sayur enggau ai irup aja.

¹³Udah nya nuan tau mandingka kami enggau orang bujang ke makai pemakai raja, lalu ngaga pemutus nuan beduduk ba utai ti dipeda nuan.”

¹⁴Orang jaga nya besetuju nejuka sida Daniel ngujika diri dalam kandang sepuluh hari.

¹⁵Lebuh timpuh nyau chukup, sida berupai manah agi gaya, sereta gemu agi ari semua orang bujang ke makai pemakai raja.

¹⁶Nya alai, orang jaga nya ngambi pemakai raja ari sida, lalu meri sida sayur.

¹⁷Allah Taala meri sida penemu macha enggau nulis, sereta meri sida penemu-dalam. Nambahka nya, Iya meri Daniel pengelandik nerangka reti genera enggau mimpi.

¹⁸Ba ujung timpuh ti udah diletak raja, Aspenas mai semua orang bujang nya ngagai Nebukadnesar.

¹⁹Raja berandau enggau semua sida, lalu iya puas agi ati enggau Daniel, Hananiah, Misael, enggau Asariah ari sida ti bukai. Nya alai sida empat lalu diletak nyadi raban orang ke bekereja di istana raja.

²⁰Dalam semua pekara pasal penemu-dalam enggau pasal meretika utai ti ditanyaka raja ngagai sida, raja nemu sida sepuluh kali pandai agi ari semua orang ke tau keramat, tauka orang ke nyadi lemambang ke di menua ti dipegai iya.

²¹Daniel mengkang bekereja di istana raja nyentuk ngagai maya Raja Sairus.