Read Iban Daniel 10 Bible Online

Daniel 10 - Iban bible

Daniel 10

¹Dalam taun ti ketiga Sairus udah nyadi raja besai menua Persia, siti pesan bisi dipandangka ngagai Daniel, ke dikumbai Belsasar. Pesan nya endang amat, tang kelalu mar diperatika.[19] Pesan nya udah diterangka ngagai Daniel dalam genera.

²Lebuh maya nya aku benung ngulit tiga minggu.

³Aku enda makai pemakai ti nyamai, tauka dagin, enda ngirup wain, tauka nyugu buk aku datai ke tiga minggu nya udah lempus.

⁴Kena dua puluh empat hari bulan ti kesatu taun nya, aku bediri ba tebing Sungai Tigris ti besai.

⁵ Aku engkadah lalu tepedaka siku orang ke ngena pekayan linin, enggau belulang ti digaga ari emas ti tulin.

⁶Tubuh iya beperenching baka batu ti berega. Mua iya bepijar baka kilat, lalu mata iya baka daun api. Lengan enggau kaki iya beperenching baka temaga ti udah dipugar, lalu nyawa iya inggar munyi panjung bala mayuh.

⁷Semina aku aja ke meda genera nya. Sida ke enggau aku nadai meda utai, tang sida balat takut, rari lalu belalai.

⁸Semina aku aja agi tinggal dia, ke meda genera ti nyelai nya. Aku nyau lembut tulang, lalu mua aku puchat.

⁹Lebuh aku ninga nyawa orang nya, aku luput lalu rebah tetingkap ke tanah.

¹⁰Udah nya siti jari megai aku lalu ngangkatka aku, lalu aku angkat betunjang ngena jari enggau patung aku. Aku agi getar-getar.

¹¹Ku melikat nya bejaku enggau aku, “Daniel, Allah Taala rinduka nuan. Bediri nuan lalu pendingka enggau manah utai ti deka disebut aku. Aku udah diasuh betemu enggau nuan.” Lebuh iya nyebut nya, aku lalu bediri, tang agi getar-getar.

¹²Udah nya ku iya bejaku, “Daniel, anang takut. Allah Taala udah ninga sampi nuan kenyau ari nuan ke terubah mutuska runding deka ngemaruhka diri ngambika nuan ulih meretika utai. Aku datai ditu laban aku deka nyaut sampi nuan.

¹³ Melikat ke megai menua Persia udah ngelaban aku dua puluh satu hari. Udah nya Mikael, siku ari bala tuai melikat, datai nulung aku, laban aku udah ditinggalka kediri-diri di menua Persia.

¹⁴Aku udah datai ditu laban aku deka ngasuh nuan meretika utai ti deka nyadi ba bala nembiak nuan jemah ila. Genera tu nunjukka utai ti deka nyadi jemah ila.”

¹⁵Lebuh iya udah nyebut nya, aku lalu tegenung merening ke tanah, enda tepansutka jaku.

¹⁶Udah nya melikat nya, ke baka gamal mensia, ngangkatka jari iya lalu negu mulut aku. Ku aku bejaku enggau iya, “Tuan, genera tu ngasuh aku lembut tulang lalu aku enda ulih badu getar-getar.

¹⁷Aku nyau baka ulun ke bediri di mua tuan iya. Baka ni ku aku ulih bejaku enggau nuan? Aku nyau lembut tulang lalu enda ulih enseput.”

¹⁸Orang ke baka gamal mensia nya negu aku baru, lalu ngasuh aku berasai kering.

¹⁹Ku iya bejaku, “Anang takut, menyadi. Nuan nadai utai ngawa. Nuan enda tau enda kering sereta berani!” Lebuh iya bejaku ngagai aku, aku berasai kering, lalu ku aku bejaku, “Bejaku meh nuan, tuan, laban nuan udah ngasuh aku kering.”

²⁰Iya lalu bejaku, “Kati nuan nemu kebuah aku datai ngagai nuan? Diatu aku enda tau enda pulai baru lalu beperang ngelaban melikat menua Persia, lalu lebuh aku udah ngalahka iya, melikat menua Gerika deka datai.

²¹Tang aku deka madahka ngagai nuan utai ti ditulis dalam bup pemendar. Nadai orang bukai nulung aku ngelaban melikat dua iku nya, semina Mikael aja, melikat ke nyaga nuan.